:: Miyuki 開心 Blog 一番 ::: 11/01/2010

2010年11月8日星期一

2010.11 東京．輕井澤紅葉之旅 (感想)

話咁快九天的紅葉之旅又完結左喇. 今次行程都大致順利的, 尤其係天氣更加係完全配合到, 真的好感恩 ~~~

輕井澤的天氣比想像中較暖, 不過可幸紅葉還真的見到不少, 滿山紅葉當然更加震撼, 但有唔同色彩的自然景色原來也很吸引的. 今次就好幸運的見到了綠, 黃, 紅的樹葉走在一起的鏡頭, 真的好好看.

在輕井澤享受了幾天大自然的美景之後, 回到東京又碰巧有一點 Xmas 的燈飾可看, 心中不禁大叫 Good Timing! 不過執相需時, 給我一點時間好好整理一下, 遊記希望可以盡快推出吧.

P.S.: 一向我為大家安排出外旅行係為了給大家一個気分転換的好chance, 可惜事與願違, 在旅行的尾聲, 團友們有點不咬弦, 大大破壞了一個原本開心輕鬆的旅程, 令我完全覺得係"臨尾香". 雖則說一家人無隔夜仇, 但換轉係一個小氣的記仇鬼, 仇可以不止是隔夜的, 有可能是隔月, 隔年, 更甚者係隔幾年的也會翻箱倒篋的一次過大爆發. 不過在此希望發洩者在發洩過後心情會愉快點吧. 但對其他唔相關的團友所造成的不便, 真的很抱歉, 平白浪費了一個大好的假期 ~ 我覺得還真是有點始料不及的.

2010年11月7日星期日

2010.11 東京．輕井澤紅葉之旅 (行程總覽)

本年度繼4月份去花見後, 11月再度出發去賞紅葉. 其實決定乜野時間去旅行, 去幾耐全部都係取決於各位團友可以請到邊個時段而決定. 所以每次去旅行都係靠運氣睇下有乜景點 / 自然風景夾到o岩時機. 好似今次賞紅葉咁. 其實今年日本天氣都幾熱, 知道10月尾出發去睇紅葉其實都係膽博膽的, 好彩o既咪睇囉, 唔好彩睇唔到都無法, 有得出去鬆一鬆已經好開心咖喇.

Book Package 時又再一次跟 JAL 的package無緣了, 開初連 ANA 的package都 book 唔到早上機, 如果坐下晝機的話, 入到東京市區就真係連晚飯都趕唔切食了. 好彩最後都改到 ANA的早機 09:45 出發. 不過出發前又真係勢估唔到10月尾日本都仲有台風警報 ~~~ 驚嚇一輪後好彩都能順利到達目的地. 另外今次出發前要做o既準備功夫就係要買定 JR East Pass, 今次都幾好運撞o岩 JR East 有 Special Campaign o岩晒我地由東京落輕井澤o既行程, 我地出發前就經網上買左一人一套的 "3-day flexible pass" 由換票日起計可自由選用3天任搭JR, 我地揀左其中2日用黎往返東京至輕井澤的新幹線, 咁樣一來一回, 呢個價值10000日圓的套票就真係無蝕底咖喇.

同時今次去o既日數唔太多, 頭尾夾埋先有9日, 當中仲會去輕井澤住番一個3日2夜. 所以留o係東京行街的時間真係無得幾多. 而我亦係好 hea 咁連行程都無乜點寫, 只係有個好 rough o既 idea, 寫低左有乜新景點要去, 所以今次個遊記可能精彩欠奉, 只能寄望仲有d靚紅葉相補救下吧!

好, 先黎一個行程o既 overview先:

Day 1: 10月30日(星期六) 到步 + 新宿蟹道樂晚餐

Day 2: 10月31日(星期日) 再戰越谷 Lake Town

Day 3: 11月1日 (星期一) 輕井澤到着 [上篇] / [下篇]

Day 4: 11月2日 (星期二) 白糸滝 + 雲場池 + 輕井澤 Outlet [上篇] / [中篇] / [下篇]

Day 5: 11月3日 (星期三) 輕井澤 Outlet + 回歸新宿 [上篇] / [下篇]

Day 6: 11月4日 (星期四) 田原町道具街 + 秋葉原 / 新宿

Day 7: 11月5日 (星期五) 表參道 + 吉祥寺 + 東京 Tower [上篇] / [中篇] / [下篇]

Day 8: 11月6日 (星期六) 新宿一日遊

Day 9: 11月7日 (星期日) 回程

2010.11 東京．輕井澤紅葉之旅 (Day 9: 回程篇)

Day 9: 11月7日 (星期日) 回程篇

回程真係無乜太特別吧, 尤其係當大家心情唔好時真係無乜野做到. 基本上都係夠鐘check out後就放低行李o係酒店先, 之後各自出發進行2小時的最後衝刺, 我就跟老公走左去Yuzawaya行一轉, 果然比我買到野呀. 有我鐘意o既和布同埋一個十字繡DIY Kit!

行下行下又差唔多夠鐘了, 齊齊番去酒店lobby集合, 媽咪仲趁機去左買呢個咁得意o既 Minnie 手機座比我添 ~

由酒店出機場的整個車程以至到左機場做check-in時大家都真係無乜兩句, 我最怕最討厭就係呢種氣氛. 不過氣未消又可以點呢, 恢復原狀都要點時間的, 於是check in 弄妥後, 媽咪就自己四圍行, 佢話會自己識得去Gate等的了, 咁okay啦, 淨番我地3個就o係機場再逛逛吧. 我地先行去左return 手機, 跟住就去左書店行, 估唔到我o係呢度買到兩本高木直子o既作品 ~

跟住行行下我地就走左去老麥食個lunch先, 今次我地試左 Salt & Lemon Chicken Burger, 不過唔太好食的. 但心情欠佳之下真係求其食飽就算了. 期間我仲諗住去買個壽司外賣上機食的, 但又唔太多選擇, 最終諗住過海關後先買都得, 點知係就係有食店但就無壽司囉, 最後惟有買左個三文治就算了, 但後來竟然發現個三文治都唔係太好味的

今日原定搭的6:40分班機delay到7:00幾, 而在boarding gate 等待上機時我就走去跟媽咪傾下計希望可以調解下啦. 當然咁少時間下我真係做唔到d乜啦, 不過有人傾下我估總係好d o既. 番到香港後大家各自搭的士番屋企休息了.

以下呢d 係媽咪於機場時買的各式美食, 番到香港後好快就比我地清晒了 ~

總結: 今次紅葉之旅大致上係算成功的. 起碼睇到紅葉, 映到靚相, 而且仲開開心心咁試過住Cottage, 算係一個唔錯的經驗! 唔知下次會幾時大家再一齊去旅行呢? 下一個目的地又會係邊呢? 我都好期待呀! 最後當然係希望以後一家人和和氣氣, 唔好再咁多拗撬了. (雖然我知事實又點會如我所想咁完美呢?)

2010年11月6日星期六

2010.11 東京．輕井澤紅葉之旅 (Day 8: 新宿一日遊)

Day 8: 11月6日 (星期六) 新宿一日遊 (意想不到的結局)

今日已經差唔多黎到行程o既尾聲了, 我都無特別地方要帶各團友去的, 照慣例最後一個full day我地都係會選擇在新宿附近行下街, 因為又近, 唔使再搭車來來回回, 二來新宿都真係有好多地方o岩行的, 所以o係度spend 一日絕對唔係問題. 食過早餐後大家就約定10:30集合出發了. 由於早食完的關係, 我跟老公先行去左酒店附近一間比較大的Lawson睇下見唔見鬆弛熊的products, 有就有不過好似無上次花見時咁多囉. 有d想買呢個Jelly杯的, 但想起屋企都已經有好多未開的杯時最終都係放棄左, 映張相就算了.

行過高島屋時見到有工作人員已經開始準備緊聖誕佈置了, 你睇, 日本人幾有design idea, 今年用左膠樽去做聖誕裝飾呀, 都真係幾靚咖.

行到咁上下時間就要跟老公分手喇, 因為今日老公會獨自遠征日間的東京鐵塔, 因為點都係想買番果兩款紀念品, 二來我地行生地館的話對老公黎講就會再點悶. 所以分頭行事都係一個唔錯o既決定. 以下就係老公於日間睇到o既東京鐵塔喇, 果然跟晚上亮左燈o既感覺又唔同左.

在老公自己漫遊東京鐵塔之時, 我就帶住細妹 & 媽咪出發去新宿的生地館, 一去到大家都朝著唔同o既目標樓層出發. 我跟媽媽先去毛冷部, 因為媽咪睇中了日本的毛冷 & 尼龍草, 諗住入定貨番屋企慢慢起貨的. 攪完一輪後跟獨闖鐵塔後回歸的老公集合同細妹去左新宿一蘭食個快lunch!!! 食完後順道跟細妹在附近多逛一會先回去跟媽咪集合.

我o係生地館同佢地行到咁上下之後就跟老公集合去在附近行下, 因為我都完全未行過Yuzawaya 同埋 Tokyu Hands. 而且我仲要o係高島屋搜羅我最鐘意買的日本長Socks!!! 正當我o係Tokyu Hands行緊街之際就接到細妹來電說了一句 "反左面呀" !!!!! 唔係掛 .... 乜搵d咁o既野攪呀? 試問聽到之後你叫我仲點有心情行街? 好彩老公都知我性格, 所以只係極速地逛左Tokyu Hands 一陣就陪我番過酒店睇下發生乜事. 當然就梗係六國大封相啦.

老實講我一向都好怕家嘈屋閉的, 我明兩個性格唔夾的人真係好難長期好好相處的, 加上一個咁操控系o既人真係點忍都遲早會爆, 只係估唔到去旅行都會攪出事 ~ 不過無計當有人唔聽勸, 當有人自以為身份唔同就唔講道理之時, 呢d 結果真係一個cycle 會不停loop的. 但無計啦, 家家有本難唸的經, 我相信每個家庭都有難處的, 我呢d 可能只係小兒科罷了.

就係咁大家o係面左左o既情況之下都總叫食埋呢個最後的魚生晚餐:

兼仲有又甜又好味的巨形柿做飯後果.

食完後大家就各自開始忙於執拾行李預備明天check out 番香港了. 真的估唔到一個大好o既旅程竟然會有咁樣o既一個結局.

Anyway, 以下係今日的收獲, 都算唔差吧, 起碼我最想入手的長socks都入左唔少了. 當然最開心的仲係買到那個鐵塔毛公仔 & 水樽吧.

2010年11月5日星期五

2010.11 東京．輕井澤紅葉之旅 (Day 7:表參道 + 吉祥寺 + 東京 Tower) [下篇]

Day 7: 11月5日 (星期五) 表參道 + 吉祥寺 + 東京 Tower [下篇]

(Xmas Illumination 始動)

上回講到o係吉祥寺食完鳥良後就拉大隊往是日行程的最後一個景點出發. 今晚我地就係打算去呢度: Tokyo Tower.

講真黎左日本咁多次都無正式黎過Tokyo Tower 的, 最多都係去過六本木遠望過Tokyo Tower, 而今次之所以想親身到一到呢個將會比Sky Tree取代的地標係因為佢o既 Xmas Illumination 在11月3號已經始動了. 所以一於就帶大家去睇下, 當提早一點感染下東京的聖誕氣氛吧. 一出赤羽橋站就見到著左紫 / 紅色燈的東京鐵塔了.

當然就要停低落黎映番幾張相先啦. 跟住就沿路直往Tower了. 去到時都已經9:00了, 知道展望台仲係營業中, 拿拿聲買飛上去睇下, 順道諗住買少少紀念品. 點知 ..... 原來最想買的幾款紀念品都要o係另一層的 Gift Shop 先有得賣, 但果間 Gift Shop 就已經 Closed 了....真失望!!! 好彩買左飛上黎仲有個靚夜景睇下補番數!!!

運完桔後番落地面見到好靚好大棵o既 Xmas Tree 亮燈了. o係Tokyo Tower 底的 Xmas Tree 真係好靚呀. 感覺非常聖誕!!!

呢個咪就係我想買o既其中一件紀念品 - 鐵塔毛公仔囉.

睇完咁靚o既聖誕燈飾後就搭車番酒店了, 點知番到酒店樓下的平台見到 .... 試燈中的聖誕樹, 唔理喇, 一於照映! Yeah, 今次仲唔係賺到了 ~ 連呢個唔expect 睇到的燈飾都睇埋, 爸爸 ~ 你都應該滿意吧!

是日收獲 ~ 好鐘意o係Kiddy Land 買到的Toy Story公仔, 太可愛了.

明天將會係離開東京前的最後一個 Full Day了, 我地無乜特別plan只係會留o係新宿行下生地館, Tokyu Hands 同埋 Yuzawaya 都應該夠晒行了 ~~~~

2010.11 東京．輕井澤紅葉之旅 (Day 7:表參道 + 吉祥寺 + 東京 Tower) [中篇]

Day 7: 11月5日 (星期五) 表參道 + 吉祥寺 + 東京 Tower [中篇]

(Xmas Illumination 始動)

上回講到o係Omotesando Hills 的 MIST試完呢個新式拉麵後我地又再起行了, 今次都係去番上次的手作店, 不過無野買到, 於是我就提議帶大家去一間新搵到o既店子食個甜品吧. 因為之前次次黎到原宿 / 表參道一帶都係去同一間cafe 係甜品, 今次諗住試下新野. 呢間店子就係位於表参道的「茶茶の間」了.

基本上店子係主力賣綠茶的, 所以佢o既甜品亦都係為左配合綠茶而設的, 當我地坐低落好order之後, 就有服務員即席o係我地面前沖來幾杯<<今日推介>>的綠茶比我地試飲, 都真係幾香濃的.

至於甜品方面, 除左我之外, 其他3位都係點了アイスが選べる茶々パフェ, 即係自選一款雪糕口味 (有綠茶 / 黑糖 / 黑芝麻 / 雲呢拿) 的芭菲, 而我就揀左另一款黑糖雪糕配白玉 / 紅豆 / 蜜餞芭菲. 兩款甜品o既外形都好吸引咖. 味道就未份人人o岩食了. 因為佢所配的紅豆茸係帶點咸味的, 可能係想帶番起個綠茶雪糕o既味道, 不過之前佢送黎試飲o既綠茶可能太濃, 所以令到杯綠茶雪糕o既綠茶味比下去了. 整體黎講佢地覺得個綠茶芭菲普通左d囉. 至於我自己果個黑糖雪糕芭菲就不過不失啦, 無乜特別驚喜.

食完甜品後我地都係時候離開表參道向下個目的地出發 -- 吉祥寺. 路過見到呢種小果實好靚呀, 好似 Pearl 一樣咁呀.

今次去吉祥寺係因為佢有一間新o既商場Coppice開左, 連鬆弛熊都o係果度開左第二號專門店咖. 我地到步後在通往鬆弛熊專門店之前經過了一個扭蛋陣, 我地o係果度見到好得意o既 Rody 扭蛋呀. 當然大家都唔執輸一人扭左一隻啦, 咁好彩我地4個人都扭到唔同color的Rody. 呢款Rody扭蛋最特別o既地方就係佢好多部位都可以拆出黎的, 即係話你可以調亂佢o既 parts再重新組合成一隻唔同color的 Rody.

扭完蛋後就開始解散各有各行了, 我同老公當然係走去搵鬆弛熊啦, 不過之前行過Kiddy Land所以都唔係太多新野買, 反而想買的吉祥寺限定鬆弛熊店長就完賣了. 不過我都買到一隻新o既保溫 / 保冷杯. 跟住行完鬆弛熊店後就走左去隔離的Miffy店, 點知又中呀. 呢對咁得意o既Miffy公仔其實係USB memory黎咖,平平地又得意一於就買埋佢地啦 ~ 不過呢間Cappice 唔算太多野行, 所以行左一陣我地就約埋過左隔離的 Loft 了.

o係 Loft 行左一陣後就差唔多時間去食dinner 了, 今次我地揀左鳥良位於吉祥寺的另一分店. 由於已是晚飯時間的高峰期, 所以餐廳都幾爆滿的. 由於大家都有點累, 所以睇menu 揀野食就由我一個人負責吧. 呢碗係餐前o既小食, 估唔到酸酸地咁又幾開胃喎, 仲有果件八爪魚, 好有咬勁的, 好食!