想一想爸爸已經離開我們一個月了. 在爸爸離開後, 我一直嘗試努存將生活 / 心情整理. 生活上各樣事物看似都返回正軌了, 星期一至五, 每日番工放工的規律生活沒有多大變化. 不過心情上的整理我覺得自己還是處理得唔夠好. 有時會以為自己放得低了, 但誰不知, 別人的一句說話, 一個動作有時對我的牽動會這麼大. 在這一個月裡很多時我都會不明不白的無端哭起來, 有時又會忽然極度的想念爸爸, 心情又會無故的失落. 我當然明白要學會 Let Go, 但真係談何容易! 好多時腦海中不期然又會諗番起之前跟爸爸的對話, 想起爸爸在家的各種姿態, 早上搭車番工時又會記起往日大約去到邊個站就會收到爸爸的來電 / SMS 跟我報平安, 話我知做完晨運番緊屋企, 仲有每次爸爸住院時當我地探病完畢後離開的每一次hi-touch, etc. 至此發現原來我還是放唔得低的. 我成日都會覺得 / 埋怨自己做得唔夠好, 帶唔到爸爸去更多o既地方玩, 食更多佢鐘意o既美食. 之前每次去旅行都總覺得有美中不足的安排, 每次我同自己講Don't mind 下次有機會再補番, 點知原來輕易地講 "下次補番啦" 係一件咁奢侈o既事, 因為而家我無機會再補番比爸爸喇, 我成日都會諗點解上次去邊度邊度時唔帶佢試埋呢樣野呢? 點解唔同佢去埋呢度呢? 點解唔同佢映多幾張相呢? 心雖然知道而家講乜都補救唔到, 亦都知之前其實做得唔算差. 但自愧 / 自責o既心情就經常揮之不去. 每次一有咁o既情況出現, 就感到好心痛, 好想大哭一場發洩.
而o係呢個月之內, 很多爸爸生前要好的朋友 / 同僚 / 上司都曾經黎探過我地了, 同我地一齊懷緬下生前點滴, 每個人都對爸爸過往所做的一切作出了高度的評價, o係度我都想多謝各界友好對爸爸的尊重, 相信爸爸聽到的話一定會好開心的. 不過每次聽著大家訴說跟爸爸一起的以往種種時真係好難控制淚水. 不過亦好開心聽到原來咁多人懷念同埋讚賞我爸爸的. 的確我一直都很proud of my dad的!
究竟我真係要幾耐先學識放低呢? 抑或其實我係永遠都放唔低呢? 再過多2個星期左右就到爸爸上位的日子了, 希望那天的我可以堅強點面對吧.
