4月2日 (星期五) 池袋 + 新宿 (重點: 無敵家依然無敵)
距離花見旅程完結仲有幾日, 今日一於就行下久別的池袋吧, 反正見到池袋西武開左幾間手藝店, 相信都應該幾多野睇掛. 於是我地食完早餐就出發了, 去到池袋首先就帶大家上左Seibu先, 果然真係幾多野睇喎, 各自都有點收獲. 之後解散後我就同老公去左Loft, 估唔到一樣有好多野o岩睇o岩買的. 由於想o係無敵家食埋拉麵先再行番去Tokyu Hands果邊所以行完Loft後我跟老公就轉左去Big Camera了, 池袋呢間店真係幾好行, 仲有一層係專賣玩具的, 有時有d貨仲好平添咖. 行完Big Camera後我就話比其餘兩位團友知我會先行去無敵家等位, 果陣雖然都3:00幾, 但係都有唔少人排緊隊, 睇得出好多都係遊客黎o既, 無計啦鬼叫真係超掛住佢o既拉麵咩. 黎到池袋唔黎食番次真係有點唔甘心嘛. 就當我地一邊排隊一邊落定order時, 兩位團友都相繼到達了, 等多一陣就有位. 呢碗麵真係掛左好耐喇, 超好味呀..... 唔知下次幾時先再有機會食呢?
食完後又再繼續行街, 我就同老公去左Tokyu Hands附近行, 之後仲去左Sunshine City入面的Toy'sRus, 不過無野入手. 好耐無行黎呢邊, 估唔到連間HMV都變左Book Off 了. 行到咁上下就收到團友來電話今晚不如o係池袋呢邊o既地下街買魚生番去酒店食啦, 又好喎. 反正今日食完拉麵後我跟老公去左視察環境都唔見到有邊間燒肉店好食, 既然係咁不如轉一轉plan番酒店食啦, 至於爭細妹o既一餐燒肉, 我一定會再搵日補番比佢的.
估唔到今日行下行下又買左一堆野....
