Day 2: 3月25日 (星期四) 越谷Lake Town (重點: 行到收舖都未行晒)
今日一早起身睇睇天氣報告再望望窗外, 肯定揀去shopping而押後花見係一個正確o既選擇, 因為都真係幾大雨的. 咁o既天氣即使櫻花滿開都好難欣賞到啦, 更何況花見預測網站顯示櫻花大部份只係得花蕾, 因為天氣急凍, 趕唔切開花了. 唔好理咁多住啦, 出發前當然要食番個豐富早餐先啦, 今次黎到碰o岩的旬之果物係イチゴ, 我當然唔客氣食番10幾粒先啦.
食飽飽後出發, 順利去到越谷了, 一出站不久就見到今次目的地的Lake Town. 呢個Lake Town主要係分做兩大區, 分別係『風 Kaze』 同埋『 森 Mori』.
兩個區其實都真係好大的, 我地主要o既 target 係位於 Mori 的 Jusco, 因為佢有手藝部, 可以有排睇了, 而地下果層仲有超市, 真係行都有排行啦, 結果大家去到Jusco後就解散了, 行到約莫1400再集合, 大家都有點體力不支, 於是就提議先去食番d野補充體力, 但由於媽咪早餐食得好飽, 佢就選擇o係商場入面坐下休息下先, 而我地3個就決定去搵野食, Lake Town其實都真係好多食店的, 不過我地最後都係決定左去Town內的一蘭食拉麵, 因為.....實在係太掛住日本的拉麵了. 難得一蘭分店多之餘仲keep到每間分店的質素都有番咁上下, 完全唔會令人失望的.
食完個熱辣辣o既美味拉麵後再度出發, 呢個時候雨勢都真係幾勁, 我諗如果天氣好的話, 呢度會真係幾好行的, 而且周圍的環境亦相當優美, 四處都可以見到好多唔同品種o既花卉咖. 雖然落住大雨, 但難得老公依然不厭其煩的替我打著傘子, 等我可以慢慢映相.
映完一大輪後就再番入去 Mall 暖番下先, 同時亦順道探下路睇下今晚食乜好, 行左地下餐廳附近一陣就決定到我地今晚dinner o既好去處了! 同時亦在地下果層的Jusco超市內見到了安室...... Coke Zero的檔口!
跟住我地就再度分道揚鑣各自去explore下呢個大到傻的商場. 個商場內的環境真係相當唔錯的, Deco仲好靚添咖!
之後我地再於1600集合去左之前在自由が丘都有分店的Nana Green Tea Cafe 食番個Tea先. 今次我都係食番Green Tea Frozen, 真係無得頂, 超好味呀.
嘆完 Tea 後我地就齊齊去左一間眼鏡店, 開初係諗住幫媽咪搵下有無o岩用的眼鏡, 點知 end up 變左係我同細妹各自搵到心頭好! 我仲要即場驗埋眼, 配埋鏡都係30分鐘左右就有得拎, service真係一流呀. 而且又唔貴, 我買o既呢款都係6000円唔使, 抵到爛, 更開心o既係呢份係妹妹買比我o既導遊禮物黎咖!!!
而o係等拎鏡之時我地就繼續行街, 點知今次比細妹搵到另一間手藝店, 呢間係附屬於ユザワヤ的店子, 真係好大, 好多工具 / 材料都可以搵到, 真係行到不亦樂乎. 同時我亦順利於這裡的 Tower Record 幫表弟入手了佢所 order 的3張CD!
任務完成後, 又到左搵食o既時間, 無錯, 又係食喇, 今個旅程真係食個唔停的. 今晚我地就揀左去呢間叫做『籠菜』 的店子, 係食しゃぶしゃぶ(鍋)為主的, 最好的仲要係放題喎, 有國產牛 / 豚肉, 野菜 & 飲品都可以隨意自選, 真係食到你飽到反艇為止的.
放題仲每位包埋一枝好好味的牛奶冰條, 食完火鍋再黎枝冰條, 真係人生一大樂事啦.
由於食得真係幾飽o既關係, 我地之後一直o係 Lake Town入面行到d店都差唔多收舖先走, 不過行左成日都真係只可以叫做勉強行左大半個 Mori 區, 我完全無行到 Kaze 區.... 下次有機會可以考慮下再黎多次了!
結果是夜又要11:00幾先番到酒店休息, 真係攰到傻呀. 以下就係今日的戰利品了, 最鐘意就係買到櫻花模樣的Gel Gem. 我估貼o係屋企露台o既大玻璃門應該會好靚的!
不過點都唔夠拎到安室寶物咁開心的了! Yeah!
番到酒店當然係要繼續研究下第二日o既行程啦, 雖然天氣報告話明天晴 / 陰, 不過由於天氣真係幾凍, 我覺得櫻花開花o既情況應該都仲未係太理想的, 於是就決定繼續係行街先, 花見就要再押後一點了. 而聽日就輪到我跟老公出發去佢最愛行的秋葉了, 由於細妹同媽媽都唔係太o岩行, 所以我另行安排左佢地去了位於新宿附近的Okadaya. 相信應該滿足到佢地掛.
