2010.11 東京 ．輕井澤紅葉之旅 (Day 2: 再戰越谷 Lake Town)

Day 2: 10月31日(星期日) 再戰越谷 Lake Town (行極都行唔完的Lake Town)

訓醒一覺見到窗外還有點微雨, 心中只好期望雨落埋今天好了, 明天就要出發到輕井澤了, 雖說未致見到滿山紅葉, 但都總唔想天陰陰去映相咖嘛. 但係天氣o既野又唔到我控制, 還是一切隨緣吧, 我相信爸爸自然會好好給我們安排妥當的了. 出發前的一個豐富早餐少不免, 今期的新鮮生果係蜜瓜, 不過唔係件件都又甜又多汁的, 真係要揀過先得.

今日我地決定又再一次遠征上次行左一半都無o既越谷Lake Town! 去到越谷見到附近工地都在開工, 心想而家都行唔晒, 如果將來真係再擴展的話, 點行呀??? 今次我地主要係想行下上次完全未行過的Kaze (風)區, 上次都勉強算行左位於Mori (森) 區的商店. 當然有好多舖頭我地根本都只係過門不入咁行, 相比起 Kaze 區, 我地真係近乎一間店都無行過. 不過一到步首要任務都係去左Mori區的手作店行番個轉先. 不過就咁話行番轉都結果無左半日了, 行完後都差唔多時間搵地方食個lunch了, 媽咪早上食得太飽, 唔跟我地搵食, 得番我地3個當然食乜都無特別所謂o既, 結果都係揀番<<一蘭>>, 因為實在太掛住拉麵了. 熟悉的環境, 熟悉的食器, 再加上熟悉的味道 ~ 好開心好滿足的一餐!!

之後大家分開行左一陣, 又再集合去左Nana's Green Tea 食番個醒神甜品先. 今次我仲試左佢地o既わらび餅!

之後我地就開始商議下半日o既佈處了, 由於唔想一日3餐都跟上次o既一樣, 同埋如果又係食番Shabu的話, 即係又要行完Kaze後走番過黎Mori咁樣一來一回都幾浪費時間的. 所以最後我跟老公決定先去Kaze區行下街, 之後食飯時先再o係Kaze區搵間新店試下吧.

Kaze區呢邊都真係唔少野睇的, 當然衫褲鞋襪呢d店子我地都好少入的, 反而行得最多o既係買廚房用品, Life Style 精品的店子, 行下行下估唔到比我地搵到一間看似唔錯的牛扒餐廳. 行過門口時被香味吸引住了. 再望望餐牌好似都叫幾抵食. 咁唔好諗咁多啦, 今晚o既晚餐一於就係呢間攪掂佢啦 ~~~~

我地大家都各自order左唔同o既和牛 Steak 餐, 老公個餐加埋一個牛肉清湯, 好好味. 大家都對於呢餐好滿意呀, 因為件和牛扒真係好得呀, 用鐵板上熱騰騰的, 淨係香味都已經滿分了.

食完後又差唔多要番去喇, 因為今晚仲要pack好luggage轉輕便裝準備聽日開始一連3日2夜的輕井澤紅葉觀賞之旅!

今日一轉的收獲都唔算少, 一見到d書 & 得意實用的咭套就忍唔住要買 ~~~~

2010.11 東京 ．輕井澤紅葉之旅 (Day 1: 到步 + 新宿蟹道樂晚餐)

Day 1: 10月30日(星期六) 到步 + 新宿蟹道樂晚餐 (遇上台風有驚無險)

今次出發前o既早點我地放棄左去美心飲茶, 因為唔抵食, 改為去左對面的恆香棧, 不過個價錢就一d都唔棧了, 呢個睇相都知一般的茶餐廳貨色早餐A, 竟然要成HK$50.00, 真係好大咬. 睇黎下次真係要再搵下有無其他更好o既選擇了.

一向好少選擇Weekend出發o既我, 今次破例於星期六出發, 原因係團友們就唔到假, 原先只係擔心 weekend出發機場會太迫, 過到東京過關時間會耐同埋怕遇上塞車. 但估唔到今次仲會遇埋一個10月尾先出現仲要直撲日本的台風14號!!! 香港呢邊天氣咁好當然起飛無問題, 但係在boarding gate時聽到o既廣播就真係擔心左成程機了. 個廣播係話"由於台風關係, 航班雖然會如常出發, 但有可能改為於關西空港降落" 關西空港 ~~~~ 聽到係咪嚇一跳先. 飛機餐一向都唔係我杯茶, 不過今次o既 salad 叫做幾好味.

食完睇下 movie 話咁快又差唔多到步喇. 一邊聽住機師廣播一邊擔心佢要改飛關西. 好彩最終無事於成田空港降落了. 不過降落之前所遇o既氣流就真係唔係講笑的, 十足坐過山車咁咖.

出奇地今日過海關係超順利, 基本上唔使排隊就可以去等行李. 出左海關後先安置好媽咪 & 細妹後, 我地兩公婆就忙於走去拎租借o既手機啦, 再要走去 JR counter換領 JR East Pass, 順道 book 埋於11月1日由東京出發往輕井澤 11:24 a.m. 的 Asami 新幹線列車的指定席 ~ 一切弄妥後就要趕去買機場巴士飛, 點知都係趕唔到早一班, 結果要搭17:35的一班, 但係又咁好彩地當日真係無乜點塞車, 而且愈入市區就見到雨愈來愈細了. 順順利利的去到新宿都係7:00幾. 出發前諮詢了各團友意見, 大家都對上次o既蟹宴念念不忘, 所以我在香港時已予約了到步後第一個晚餐就係再去蟹道樂食了. 我地比原定時間早左15 mins到, 個室已為我地準備好了. 熟悉的環境 ~

不過餐牌內容已經轉左喇.

今次我地4個人叫左3款唔同o既餐, 媽媽跟細妹叫左同一款餐, 我就跟老公試唔同o既野, 咁大家就可以交換黎試啦嘛.

可以咁講, 呢餐蟹宴係一定唔會令人失望的, 每一道菜唔單止賣相一流, 味道更加係令人再三回味的. 每一道菜都可以試出蟹o既唔同食法, 而每個唔同o既食法都真係感受到蟹o既鮮甜美味, 抵讚. 個人最喜歡的當然就係刺身o既食法吧. 食完真係好難忘記蟹o既鮮味. 今次我點o既套餐其中一道菜係可以試到3個唔同品種的蟹. 當然我唔係什麼食家, 你問我我真係講唔出3個品種有乜分別, 只知長毛蟹o既蟹咪係特別唔同的.

而老公所點的套餐中有一款係迷你蟹グラタン (即係好似芝士焗咁樣的). 意外地好味, 真係好正, 芝士味剛好, 唔會濃到蓋過蟹味.

套餐內的天婦羅水準都真係相當高, 薄薄的炸粉好香口.

當然仲有食完想再encore的蟹肉壽司 ~

 清清地的一碗蟹腳湯我鐘意!

當然飯後甜品o既綠茶雪糕亦令整個晚飯更錦上添花了.

食飽飽出黎無再落雨了, 於是一行人慢慢行番酒店, 途中經過 Lawson 當然少不免要入去行番轉啦, 就係咁飯後都有少少收獲咖, 今次鬆弛熊o既糖果盒好可愛呀. 難得連老公都搵到佢o既至愛"初號機糖果盒", 當然無慮即決吧. 另外一行4人每人都抽左一個鬆弛熊盒蛋, 由於Yen價高企, 每人都係小抽一盒過下手癮便算了. 當中4人都無抽重覆算幾 lucky! 我地3個都係抽啡熊, 就只得媽媽一個抽到白熊咋.

而媽咪就趁機買左呢個新口味的綠茶OREO試下.

2010.11 東京 ．輕井澤紅葉之旅 (前言)

一睇到呢張相都應該知道又係一篇出發去玩前的Blog了 ~

無錯, Blog主會跟屋企人一家4口再度出發去日本東京, 今次之旅o既主要target係睇紅葉!!! 所以除左慣常的shopping 行街之外, 仲會走去輕井澤玩番一個3日2夜的紅葉觀賞!

今次係我第一次去輕井澤, 事前雖然都刨左唔少資料, 但始終第一次去心情難免緊張, 希望一切順利吧, 最希望的當然係天氣晴朗等我地可以好好欣賞紅葉o既景色啦!


咁o岩今次出發之時日本東JR推出左Flexible 3 day pass, o係呢個日圓高企o既時候都總算可以慳番一點車費吧. 另外都check過紅葉予想圖, o係輕井澤應該無問題睇到紅葉的, 不過係咪全紅就仲未知, 但總比睇唔到好啦 ~~~ 仲有有點擔心o既就係控制範圍以外的天氣了, 出發前不停check住都知天氣唔太好, 陰天 + 落雨好似少不免了, 只希望唔好撞正去睇紅葉果幾日吧. 還有還有 …出發前香港天氣突然轉涼, 家中有兩位團友都好像有點著涼, 希望無大問題吧.
東京天氣預報:

輕井澤天氣預報:

今次個 trip 唔係太長, 會由10月30起至11月7日為止, 希望各團友們都可以好好 enjoy 今次o既短 trip 吧. 東京．紅葉 We're Coming!