:: Miyuki 開心 Blog 一番 ::: 2011年2月20日

Macau．水舞間兩日一夜之旅 (Day 1 下篇)

Dinner Buffet @ 金沙 888：以為又去錯黑店

睇完咁精彩o既水舞間後, 大家分頭行左一陣, 約7:15 就再集合搭shuttle 出番去市區的金沙 Casino, 因為我地book 左8:00 buffet @ 金沙888.

同早上去蘇浙匯的情況一樣, 一到步去到 reception counter 問左booking details 後就要先比晒$$ ~ 多奇怪的安排! 今次我地用左搭船時派發的一本旅遊小冊子內的 discount coupon 有75折呀. 交好晒$$後就安排入座. 一入餐廳就已經個心又沉一沉....乜好似去左 food court 食飯咁o既, 心中不禁(再次) 大叫中計!!!

坐低後二話不說就即刻去拎野食先啦. 好彩食物o既供應都算幾足, 而最開心o既就係見到仲有我地最想試o既美國燒牛肉. o係香港而家都好少 buffet 會有燒牛肉提供, 好多時都變左係什麼燒牛扒之類的貨色. 就算有燒牛肉的 buffet , 水準亦唔出色. 難得之前睇過介紹話金沙888 的 buffet 有燒牛肉提供, 當然就想試下啦. 開初見到個餐廳環境咁樣真係好擔心. 不過既然都一場黎到, 無理由唔試咖嘛. 於是就照樣點了燒牛肉試下. 你睇, 我地各人分工合作下, 一坐低無耐就拎到成個枱面都係食物了.

唔好講少, 即刻就要試下件燒牛肉先. 嘩, 唔係講笑, 真係好得. 肉質鬆軟得黎仲好夠味. 近邊的位置好香!

食完番尋味, 再去encore 時, chef 仲好好咁幫我再煎熟少少, 因為我怕食生的, medium well對我黎講都幾苦手的了. Chef 幫我再略煎完的燒牛肉 ... 當然更加好味啦! 抵讚!

其他o既食物種類都唔少的, 我地試過o既魚生都好得, 好新鮮肥美. 海螺都好新鮮咖.

食完主菜後當然要試埋甜品o既, 呢度o既甜品都唔差咖, 起碼 cheese cake 真係好好味.

生果選擇都好多, 仲要好甜添咖.

是晚大家食到飽一飽, 雖然餐廳環境真係有點 food court feel, 但難得食物水準唔錯, 而家有埋 discount, 今晚 4個人o既消費都係$921. 真係唔錯了, 起碼我覺得抵食過上次新年時去九龍酒店食果餐buffet 先啦.

食飽飽後我地就差唔多時候又再搭車番去 Hyatt 的, 番到去就順便o係新濠天地附近行下, 經過 Hard Rock Hotel , 個lobby 好細啊.

另外仲o係附近o既名店行左一陣街, 出去出面又映下夜景咁都幾寫意的.

行完一陣幫助消化後就差唔多時間要番上房休息了.

Macau．水舞間兩日一夜之旅 (Day 1 中篇)

食完一星午餐後又差唔多時間番去Hyatt 拎房 & 出飛了. o係澳門玩其實都幾方便, 因為有shuttle bus 來回於各大 casino. 番到 Hyatt 都已經差唔多4:00 了, 去拎房時又有小問題, 原來只係得一間房 ready, 另一間就要再多15 mins先 okay, 惟有叫佢地轉頭將 key 送上去吧.

跟住再去拎埋水舞間o既 tickets, 好好彩呀. 今次個 seat 都唔錯, 係 Row G, 即係差唔多B zone的後排. 因為睇呢個 show 坐得愈後會愈清楚的. 所以覺得今次個位幾正!

順利拎完飛之後就上房了. 今次住o係另一邊的Tower 19/F! 一入房就覺得都幾好, 都幾大間. 唔使問, 趁間房未亂之時當然係映左相先啦.

之後o係房度稍為休息一陣就差唔多夠鐘落去睇 show 了. 我地今次係 book 左20/02 (Sun) 5:00 的場次. 入場時會經過賣紀念品的 counter, 不過d products 唔係太吸引. check 完飛入到去我地仲買左一包 pop-corn 點知係好難食的.

坐低之後當然就係映下個舞台先啦, 由於係第一次去睇呢類o既表演, 感覺好新鮮! 老實講之前一直都好擔心個 show 會取消咖, 因為之前都聽過唔少人話去到之後開場前先知個 show cancel 左, 所以一直都好擔心的. 好彩今次無問題!

個 show 都算準時開始, 一開始已經欣賞到好精彩的舞台變化, 由無水變有水, 又有演員不停表演高台跳水, 真係好精彩.

惟獨是中段有少少悶場, 但都只不過係悶左好少時間, 因為緊接著就有好緊張o既電單車飛車表演, 我覺得係全場o既高潮所在, 所有觀眾都睇到嘩嘩聲的, 真係無得頂.

另外亦都好欣賞個show 完結時各表演單位再次出場致謝時的一幕! 真係好值得鼓掌!

整體來說水舞間係絕對值得去睇的. 我地都睇得好開心呀. 不過最令我唔鐘意o既就係坐o係我地後一排o既兩位"阿嬋" 久唔久無啦啦就大聲講大聲笑咁, 真係頂佢地唔順.

睇完 show 後時間尚早我地就番房休息左一陣後再出發食 dinner去了.

Macau．水舞間兩日一夜之旅 (Day 1 上篇)

Lunch @ 蘇浙匯：差點以為去錯左黑店

玩完番黎真係超唔想開工 ~ 不過唔開工又點會有$$再去玩呢? 所以嘛, 惟有寫下遊記方便自己回憶下快樂o既旅程!

今次之所以會去澳門黎一個短trip 係因為之前媽咪提起話想去睇水舞間, 咁我地幾個又有假期於是就決定齊齊去macau行番轉. 今次我地都係 through Agency 訂酒店連 show tickets的套票, 價錢係約每位$1800 包Grand Hyatt 雙人房一晚住宿連早餐, 水舞間 B區 ticket, & 來回船飛. 今次我地選搭金光飛航, 由港澳碼頭直達氹仔. 個人覺得幾方便, 仲唔會好似舊碼頭果邊咁迫人. 而且一出碼頭有 shuttle bus 直達多間酒店, 真係好方便的.

星期日早上10:30 船出發, 約一個鐘就過到澳門了, 天陰陰的, 不過好彩係無落出雨, 天氣都幾舒服. 坐shuttle 好快就去到位於新濠天地的 Grand Hyatt 酒店, 雖然知道咁早都無房 ready, 但都做左 pre check in 先, 順手放低個大袋先再出去食lunch. 想講o既係 Grand Hyatt 的環境真係唔錯, 大堂我覺得幾 Grand的.

最鐘意個大堂check in counter附近的百合花陣, 真係好靚, 同埋好香百合花味!

不過d staff 做野有點慢同埋唔夠 smart. 攪左一大輪 pre check in 後又要再攪一大輪 for 水舞間 tickets, 點知finally佢都係話暫時出唔到飛, 叫我地3點後先再試. 咁既然無野做到, 我地就只好出發去醫肚先啦. 由Grand Hyatt 行番出去等車時經過映的可愛燈飾.