Day 7: 11月5日 (星期五) 表參道 + 吉祥寺 + 東京 Tower [上篇]
(Xmas Illumination 始動)
由於唔想一到步就走去食拉麵因為真係剛剛食完個早餐無幾耐大家都應該未食得落咖喇. 所以我地先行沿住表參道行一陣先啦, 期間經過由於building重建而要暫時結業的Kiddy Land原址, 有工作人員在街頭派傳單通知大家Kiddy Land o係呢段時間其實係搬左去附近繼續營業的. 於是大家就跟住張傳單去搵下新o既 Kiddy Land了. 無幾耐搵到喇.
雖然話呢個新店都只係暫時性質但都裝修得幾可愛咖, 一入去就見到我上次o係 Disney Store 買唔到的 Toys Story 公仔 ~ 好鐘意佢呢個造型呀, 好得意. 跟住仲見到有鬆弛熊的大 Counter, 雖然話一陣 lunch後就會落吉祥寺都一樣有鬆弛熊專賣店, 但o係度見到都係忍唔到手買左少少貨. 另外仲有呢個好特別的 3-D 透明 Rody Puzzle, 要自己砌番隻Rody 出黎咖, 當然呢個重要任務就當然係番香港時留番比老公處理啦. 好彩係呢度見到買左咋, 因為後來去幾間玩具店都見唔番喇.
大家o係 Kiddy Land 行左一陣就轉身繼續行程, 點知比我發現左原來黑超B o既專門店o係呢度喎. 我其實唔係黑超B的粉絲, 不過有時佢o既造型真係幾正, 所以就諗住走入去睇下啦. 果然一睇就中了, 於是惟有乖乖放低銀兩買左呢隻魔鬼造型o既黑超 B 番去了, 其實仲見到有好多得意野咖, 不過 Yen 價太高了, 所以最後只好放棄.
行到去表參道Hills門口就比佢呢棵聖誕樹吸引住了.
但其實好戲在後頭, 因為據我出發前所搵到的資料顯示表參道Hills內已於昨天舉行了聖誕亮燈的儀式了. 果然一入去就見到呢棵由Swarovski贊助o既閃閃聖誕樹了.
配合著唔同o既燈光就有唔同o既效果, 當中最fancy o既就係當燈轉做粉紅色果陣喇.
除左呢棵咁靚咁閃o既聖誕樹外, 商場內仲有好靚o既聖誕花添咖.
映完一輪後我地就去左呢間名叫 MIST 的拉麵店食午餐了.
呢間拉麵店跟平時我地去開果d最大分別就係店內o既環境, 呢間MIST感覺上係走比較高檔o既路線, 所以價錢都偏貴, 一個淨麵都要1000多 Yen, 要 Topping 的話就要逐樣加錢的. 而Menu的選擇方面就帶一點西式的味道, 最好o既就係佢o既拉麵 set 係有 Full / Half 份量的, 咁就唔怕食唔晒啦.
今次媽咪跟細妹都係要左鹽味拉麵 Half Set, Topping要了叉燒, 半熟蛋 & 紫菜.
而老公就要了一個Full Set 的, 我就散叫了一碗醬油拉麵. 套餐係包埋一個好的式o既頭盤, 似係玉子燒咁樣, 不過味道麻麻地.
跟住拉麵登場喇, 之前媽咪想試呢個係因為有食評話佢o既湯底唔會太肥膩, 不過我就覺得分別唔太大, 好彩係味道唔差都幾有水準的.
呢個就係跟套餐送的杏仁豆腐了. 味道尚可的.
食飽飽後就繼續o係商場入面行左陣順道再映多幾多聖誕樹o既靚相.
同場仲見到原來有一個<<東京甜品 / 蛋糕展覽>>, 有好多款精美甜品 / 蛋糕 展出, 當中我覺得最得意o既係呢個有Bearbrick做埋Display的蛋糕!
映完後又準備向下一個目標出發 ~
沒有留言:
張貼留言