Day 7: 11月5日 (星期五) 表參道 + 吉祥寺 + 東京 Tower [中篇]
(Xmas Illumination 始動)
上回講到o係Omotesando Hills 的 MIST試完呢個新式拉麵後我地又再起行了, 今次都係去番上次的手作店, 不過無野買到, 於是我就提議帶大家去一間新搵到o既店子食個甜品吧. 因為之前次次黎到原宿 / 表參道一帶都係去同一間cafe 係甜品, 今次諗住試下新野. 呢間店子就係位於表参道的 「茶茶の間」了.
基本上店子係主力賣綠茶的, 所以佢o既甜品亦都係為左配合綠茶而設的, 當我地坐低落好order之後, 就有服務員即席o係我地面前沖來幾杯<<今日推介>>的綠茶比我地試飲, 都真係幾香濃的.
至於甜品方面, 除左我之外, 其他3位都係點了アイスが選べる茶々パフェ, 即係自選一款雪糕口味 (有綠茶 / 黑糖 / 黑芝麻 / 雲呢拿) 的芭菲, 而我就揀左另一款黑糖雪糕配白玉 / 紅豆 / 蜜餞 芭菲. 兩款甜品o既外形都好吸引咖. 味道就未份人人o岩食了. 因為佢所配的紅豆茸係帶點咸味的, 可能係想帶番起個綠茶雪糕o既味道, 不過之前佢送黎試飲o既綠茶可能太濃, 所以令到杯綠茶雪糕o既綠茶味比下去了. 整體黎講佢地覺得個綠茶芭菲普通左d囉. 至於我自己果個黑糖雪糕芭菲就不過不失啦, 無乜特別驚喜.
食完甜品後我地都係時候離開表參道向下個目的地出發 -- 吉祥寺. 路過見到呢種小果實好靚呀, 好似 Pearl 一樣咁呀.
今次去吉祥寺係因為佢有一間新o既商場Coppice開左, 連鬆弛熊都o係果度開左第二號專門店咖. 我地到步後在通往鬆弛熊專門店之前經過了一個扭蛋陣, 我地o係果度見到好得意o既 Rody 扭蛋呀. 當然大家都唔執輸一人扭左一隻啦, 咁好彩我地4個人都扭到唔同color的Rody. 呢款Rody扭蛋最特別o既地方就係佢好多部位都可以拆出黎的, 即係話你可以調亂佢o既 parts再重新組合成一隻唔同color的 Rody.
扭完蛋後就開始解散各有各行了, 我同老公當然係走去搵鬆弛熊啦, 不過之前行過Kiddy Land所以都唔係太多新野買, 反而想買的吉祥寺限定鬆弛熊店長就完賣了. 不過我都買到一隻新o既保溫 / 保冷杯. 跟住行完鬆弛熊店後就走左去隔離的Miffy店, 點知又中呀. 呢對咁得意o既Miffy公仔其實係USB memory黎咖,平平地又得意一於就買埋佢地啦 ~ 不過呢間Cappice 唔算太多野行, 所以行左一陣我地就約埋過左隔離的 Loft 了.
o係 Loft 行左一陣後就差唔多時間去食dinner 了, 今次我地揀左鳥良位於吉祥寺的另一分店. 由於已是晚飯時間的高峰期, 所以餐廳都幾爆滿的. 由於大家都有點累, 所以睇menu 揀野食就由我一個人負責吧. 呢碗係餐前o既小食, 估唔到酸酸地咁又幾開胃喎, 仲有果件八爪魚, 好有咬勁的, 好食!
今晚我地叫左好多新野試呀. 不過當然一d 好好食o既舊菜式我地都唔會放過啦, 好似呢個滑到傻的豆腐就真係次次都要食的.
仲有梗係鳥良的招牌雞翼了, 今次一樣係叫左中辛 & 甘口, 兩款都一樣咁好味!
另外今晚仲試左呢個炸雞肉 + 薯條, 好正呀. d 雞肉係估唔到咁juicy的.
另外串燒都係好好食的.
呢個係腐皮包雞蛋, 夠晒特別.
仲有呢個鐵板牛油煎雞腿, 正!
大家飲飽食醉後又係時候起行去今日行程的最後一個景點了, 下集再講 ~~~ 而在行去車站的途中見到吉祥寺的 Xmas Deco 都已經亮燈了, 簡簡單單但都幾有氣氛!
沒有留言:
張貼留言