Day 3: 11月1日(星期一) 輕井澤到着 [下篇] (天氣由陰轉晴, 感恩!)
今次我地獲安排的 Cottage 係 No. 908 ~
在酒店大堂會有小型車仔接截住客來往 Cottage 及 Lobby的. 我地所坐o既就係呢款車仔喇.
其實行過去都唔係太遠, 不過見拎住咁多行李就貪得意坐下車吧. 沿路大家都係超級興奮的. 因為我事前無特別同團友講我地會住邊種酒店嘛, 就當係留番一個小驚喜比佢地啦. 雖然我在book酒店時都睇左唔少 reference, 但到左自己親眼見到時還是覺得很有新鮮感的.
入左屋仔後, 大家二話不說就係圍住間屋仔四圍映, 第一次住呢種木屋仔, 感覺係好warm好屋企feel之餘又有自己的空間, 我地4個人, 每pair 都有自己o既睡房, 有自己o既 washroom, 個living room 就係共用的.
由屋仔望出去o既景色都真係好正咖, 一大片草地 ~
之後等大家settle down & 映完相後我地就出發決定先行一小部份的 outlet shops了. 因為踏入冬天後太陽真係好快落山, 基本上4:30後已經開始天黑, 我都唔想夾硬帶大家出去其他景點映相, 倒不如明早先出發, 今晚就先行一陣 outlet 兼可以食埋dinner 嘛. 因為 outlet 的店鋪都會在7:00就閂門的了, 所以有興趣shopping 的朋友真係要趁早開動, 否則一入夜後就真係無野睇無野食的了. 沿路由Cottage行番出去 Outlet 的風景實在太正了, 一邊行一邊忍唔住不停四處映!
呢個係位於Outlet內的其中一間露天Cafe, 個環境真係一流呀.
大家只係分頭行左幾間店後就再集合去ろぐ亭食晚飯了. 揀呢間餐廳係因為佢夠出名 ~ 好多人食完都強烈推薦的. 而且佢仲係專食烤肉的国產牛專門店, 再加上價錢相宜, 咁梗係要一試啦.
我地book左5:30分入座. 開初都唔係太多客人, 但點知愈夜就開始愈來愈多客人了. 我地攪左一輪先order到, 因為原來佢有d 餐係定食來的, 即係唔使你自己動手燒, 牛肉係Steak上. 咁我地4個人有3個都想自己郁手, 所以經商議後細妹決定自己要一個Steak 定食, 淨番o既3個就每人叫左一個套餐, 另外再散叫其他追加單品 ~
等左一陣首先送黎係每人一客的沙律前菜, 酸酸地幾開胃.
跟住就輪到細妹o既定食首先登場! 好香呀 ~ 賣相好得.
之後就到我地果3份セット喇. 每份都有3種唔同部位o既牛肉, 有ヒレ、ロース、カルビ、咁靚o既牛都係３８００円就有一Set 了!! 一邊燒一邊享受肉香, 好滿足啊 ~~~
當然我地又點會只係每人一Set 就夠呢? 之後我地仲追加左好好味o既牛舌同埋另一款o既カルビ, 真係好正呀.
雖然話就話食到好飽, 但轉過頭離開了ろぐ亭後就馬上過左隔離呢間咖啡店買左杯Moca Softcream 做甜品了. 好好味呀.
呢頭食完熱辣辣的和牛燒, 果頭就食杯凍冰冰的軟雪糕, 呢d仲唔係至高享受!!!
只可惜 Outlet o既店實在太早關門喇....食飽飽出黎後差唔多所有店都閂晒門了, 我地就盡最大努力連酒店大堂果間便利店都唔放過, 一於照行照買. 大滿足過後, 媽咪同細妹就拎住戰利品坐車仔番 cottage, 而我嘛就梗係把握呢個良辰美景同老公漫步番cottage 啦 ~ 沿路抬頭都見到好多好閃o既星星, 想一想都不知多久沒有在香港舉頭能望見星星了.
話咁快就番到cottage, 真係好似o係香港o既屋企一樣, 大家可以圍埋o係 living room 睇下電視, 食下薯片, 嘆下 Beer! 好爽呀真係. 難得今晚o既 TV program 唔錯, 有我最鐘意睇的お試しか、同埋 ＴＶチャンピオン. 真係睇電視都睇到大滿足 ~
以下呢d全部都係o係 Outlet 內的手信店所賣到的手信!
呢款芝士蛋糕就買黎自己食o既, 真係唔錯咖.
就係咁輕輕鬆鬆第一日o既輕井澤行程完成了. 希望聽日會繼續放晴, 因為將會跟大家走訪一兩個必睇的景點, 希望映到多d紅葉靚相啦.
