平安大餐 @ 米芝蓮2星．明閣

一連4日的聖誕假期, 我就安排左2場美食節目同屋企人一齊慶祝, 首先就係於12月24日平安夜去左位於朗豪酒店的米芝蓮二星中菜餐廳．明閣食餐勁的! 

準時於晚上6:30 到達明閣!  同樣被安排坐於 Platform 上的一張大圓枱, 位置闊落舒適 ~

由於之前餐廳已電郵了菜單給我, 所以大抵心中都知要 order 乜野菜色.  記得上次到訪時錯過了老公大愛的鹵水豬仔腳 ($138), 今次當然要預早 Book 定啦.  食過就知自己無訂錯了. 

前菜小食除了呢款人人讚好的豬仔腳外, 當然唔少得呢款必食的    上次食完真係都幾令人懷念的松露千層豆腐 ($58 一位), 今次同樣水準不變! 

吃罷餐前小食後就到其他主菜登場, 首先有乳豬拚叉燒 ($298), 乳豬皮脆肉嫩, 叉燒蜜汁味夠! 

呢碟朗豪炸子雞  ($198 半隻); 亦係必食之作, 因為除了雞炸得夠脆之外, 就連伴碟的炸蓮藕片都非常出色. 

當然明閣得獎菜色之一的龍皇披金甲 ($368) 亦為非食不可之作. 

今次亦都試左一些新菜色, 好像以下這碟鳳梨咕嚕肉 ($168) 就是其中之一.  估唔到又真係非常高水準喎! 

食左咁多肉食, 就一於叫番一道蟹肉扒豆苗 ($248).  嘩, 唔係講笑真係好足料! 

之後再試埋呢款松露和牛崧窩燒飯 ($238) 就真係大滿足了. 

食埋甜品就係指定動作, 今次無再 order 明閣的招牌甜品 -翅晶凝; 因為想試下其他款式的甜品.  例如今次媽咪就試左蟠桃大壽包 ($45)  真係好掂, 蛋黃靚到漏油之外, 連d 蓮容都好香好滑的. 

另外呢款係老公好欣賞o既杞子桂花糕 ($42)  非常清新!

最後一款甜品就係我同細妹都好鐘意的擂沙湯丸 ($42), 蔴容好香呀. 

是晚由於係平安夜所以我地張 Langham Supper Club card 就不適用了, 不過埋單都只係$2,310 都真係幾抵食的了. 

做冬大餐 @ 和民

又到左一年一次的大時大節 "做冬" , 除左前一晚o係屋企等媽咪整左個超正的鮑魚嚮螺海參湯之外, 正日當天 (12月22日) 一早就o係和民 book 好位大家齊齊食餐勁了. 

今次咁o岩和民有10週年的套餐優惠, 我地一於就照叫啦.  睇完下面o既相你就會知道呢個4人餐唔使$500元真係抵食到爆!!!   

先有飲品一人一杯 ~

沙律一大碗

刺身一碟 ~

枝豆今次整得好食過之前果次, 起碼唔會黃晒先.

脆卜卜又熱辣辣的薯條

炸物仲有呢個天婦羅

鹽燒雞軟骨一人一串

棒棒餃子一人有一條

大大條燒鯖魚 

日式口味的Pizza 一個

火鍋3款任揀一款, 我地要左相撲火鍋, 仲跟埋追加的烏冬

以為就咁就夠?  錯了, 仲有兩款飯跟住登場, 我地分別揀左呢個石鍋海鮮飯

仲有呢個東京牛肉飯 - 結果呢個飯要原封不動咁 take away 先得.  因為實在無法子食得落了.

就係咁簡簡單單的一家人聚埋一齊食餐勁的就做左冬喇.  黎緊又到聖誕節, 同樣都安排左食 & 食o既節目, 希望大家今個聖誕都過得豐富又滿足!  

試菜 @ Le 188° Restaurant & Lounge

大家過左去位於北角的港島海逸君綽酒店41樓 的 Le 188° Restaurant & Lounge 食lunch.  今次揀呢間餐廳去試O既負責人係姑姐, 佢話見到報紙話佢有BBQ燒烤任食, 就諗住去試下囉. 

  

上到去環境真不錯.  海景任睇唔嬲, 加上食客唔多, 都幾舒服O既.  點知一埋位坐低時就發現佢張sofa椅...... 好矮呀.  真係坐得好辛苦, 而且張椅超級重身, 行出行入去要好吃力先推得郁張椅, 呢個真係唔太方便.   

不久服務員就比左個menu我地, 上面有好幾款可供BBQ 的菜色, 我地只要落好order 就會幫我地燒好.  咁於是大家就各自make order.  然後再出去 buffet counter 食下前菜.  前菜選擇唔多, 味道就不過不失咁吧.   大家都諗住或者個BBQ會好正啦. 

等了又等, 終於有BBQ食物登場了. 不過一放低第一碟我地就發現....咦! 點解唔係我地order 果D O既?   我地無叫O既佢又比埋, 我地叫左O既佢又反而比唔夠數, 仲要一次幫各人O既 order 混埋一碟咁上, 我地成10個人都唔知邊個叫左D乜.  總之情況就係一個亂字.  不過由於等左咁耐都有D 肚餓了, 所以都難得理佢個order 對與錯, 見到O岩食O既就食住先啦.   但係食落後就知.... D野食唔掂囉, 首先有雞槌係燒得唔夠熟透的.  跟住西冷扒好硬, 燒春雞變左普通雞扒, 仲要雞肉係"鞋"的.   其他燒烤如三文魚, Pineapple 等等就普通過普通.  

最攪笑O既係我地前後order左兩三次, 但每次送上O既食物無一次係全部O岩的, 要注意係當日食客並唔多, 但係 order 都可以咁混亂, 如果再多D客人的話, 情況真係唔敢想像了.  

大家食完個咁無癮O既主菜後都無心戀戰, 所以甜品都唔係試左好多, 比較有印象O既要算係呢個 Movenpick 的雪糕, 當日提供O既有兩種口味分別係 Vanilla & Passion Fruit.  味道還可以吧. 

 

埋單計起黎都要HK$388 一位就真係相當唔抵了.  就算個景幾好都無用啦, 食景又食唔飽O既.    所以呢間餐廳都係要列入只此一次的名單了.

Sunday Brunch @ AVA Slash Bar

繼續追落後Blog!!!  話說12月4號的星期日跟屋企人又去左另一間比較新O既餐廳 - AVA Slash Bar 試左佢地O既 Sunday Family Brunch.  雖然之前做booking 時有好混亂O既情況發生, 不過好彩最後都好順利咁食到呢餐咁豐富又抵食O既 Brunch. 

大家分別準時於11:30就去到目的地, 不過由於酒店內唔係部部 Lift 都上到38/F,  呢方面酒店O既指示真係做得唔夠.  再加上大堂O既服務員比我地更加唔清楚, 最終經過一番擾攘後, 發現原來走到 Car Park 側邊的 Bullet Lift 係可以直接上到餐廳的 ~ 

上到去見到細妹 & 媽咪已經到左, 仲坐左個無敵海景的半 Sofa 位添.  望到個view 就覺得抵左一半了.  

Settle down 後服務員就先送上Brunch 包埋的無限添飲解果汁, 我地仲一次過試晒佢提供O既3款 juices, 其中呢兩杯係 Orange Juice & Cranberry Juice 喇.  Cranberry Juice 真係好正, 少少酸味咁夠開胃. 

呢個Brunch 的前菜除左任食的 Green Plate 外, 仲有每人半打新鮮即開生蠔或一份雪蟹, 由於我跟老公唔食生蠔, 咁所以4個人剛剛好就每個item 要左2份.  食後評係生蠔勁鮮甜, 而雪蟹就普通D囉, 因為仲要落手去拆肉, 其實食起上黎就有D唔方便O既.  所以如果你係食蠔之人都係suggest 你叫番夾 Oysters 會抵D. 

 

食完個蟹 & 蠔後, 我同細妹先四出映下相先, 其實餐廳都唔太細的, 除左有我地坐緊望到洲際呢邊之外, 仲有另一邊O既位置就望到好多樓景, 所以個view 就無我地果邊大海景咁正, 不過有陽光入到黎再加上個Sofa位夠晒闊落, 真係好舒服O既感覺. 

Receiption 位有可愛又靚o既小花束,一於照映.  仲有呢張超可愛O既薑餅人宣傳 flyer, 好得意呀.  

  

欣賞完四周的環境後就開始出發去到自選沙律 & 前菜的 counter 望下有乜食, 唔少得的當然有大家至愛O既 Parma Ham 啦, 另外沙律都有唔少款式幾好味咖.  大家一邊傾一邊食.  

話咁快前菜我地都食得七七八八了.  跟住就到大家都好期待的 All you can eat 'A La Carte' 主菜了. 大大話話見到個餐牌都有差唔多成10款美食的, 最特別的係連呢個主菜都係任你order的, 即係話想食幾多樣都無問題啦. 

今次我地就真係豪不客氣地差唔多將餐單上的主菜都試左9成了. 而家就等我慢慢介紹下 order 左D 乜野啦. 

首先一行4人, 3個都率先試O既係呢個Salmon 三文魚 (tasmanian salmon, stewed lentils, avocado, lime-yoghurt sauce 塔斯曼尼亞三文魚、燴扁豆、牛油果、伴青檸乳酪汁) - 厚厚的一件三文魚, 外皮煎得很脆, 超讚.  

接著登場的有呢個又係3個都有 order 的Steak 牛扒 (prime grade beef tenderloin, braised romaine, roasted potatoes, quail egg 頂級牛柳燴羅文菜、烤馬鈐薯及奄春蛋) - 單睇外型已經相當吸引了, 難得牛柳真係整得剛剛好, 如果唔係要試其他菜色, 真係想 encore 食多一件呀. 

跟住仲有Chicken 雞肉 (grilled chicken breast, roasted new potato, brussels sprouts 烤雞胸配馬鈐薯及包心菜)

呢款係Pork 豬肉 (pesto pin wheel gnocchi, sun-dried tomato & almonds, roasted capsicum sauce 配香草醬薯糰、蕃茄乾、杏仁、伴燒椒汁)

再黎仲有Tuna 吞拿魚 (grilled tuna loin, braised bell pepper & tomato, caramelized pineapple, garlic & chili vinaigrette 吞拿魚柳燴紅椒蕃茄、焦糖菠蘿、伴香蒜辣椒肉醋汁) - 呢款媽咪話普通D.

夠了嗎?  還沒有, 我地一於繼續試, 今次就叫左幾款唔同O既蛋料理, 先有看似普通的煎蛋, 簡簡單單咁O岩晒鐘意食蛋O既媽咪.

愛蛋O既媽咪仲叫左呢個 Frittata du jour 西班牙奄列 (with sautéed potatoes 配炒薯仔)

細妹就選擇要呢款Salmon Dome 三文魚蛋球 (scrambled egg wrapped in smoked salmon, crème fraiche, capers & chive 炒蛋裹煙三文魚、鮮奶油及香草)

呢個就係我跟老公order 的Benedict 賓尼迪蛋 (chorizo sausage, slow poached egg, smoked paprika hollandaise sauce 配西班牙辣肉腸、水煮蛋、伴煙紅椒粉荷蘭汁) - 不過可能係漏單的關係, 我地要催單先送到, 但係個外皮邊邊位焗到焦左, 好硬呀.  好彩中間個心都仲幾好味.

細妹最後仲叫埋呢個 Croque Madame 扒芝士火腿三文治 (sunny side up egg, french fries, mornay sauce 配太陽蛋、炸薯條、芝士汁) -
估唔到又幾好味喎.

最欣賞佢O既主菜全部份量適中, 人客真係可以一次試幾款菜色都唔會覺得太飽, 而且大部份O既主菜俱有水準, 真係好難得. 

試左咁多款主菜後, 稍為休息一會欣賞下咁靚O既 view 後又係時候出動去甜品 corner 喇.

 

雖然唔可以話好多選擇但都好足夠的了, 其中最愛係呢個 Mango Pudding 真係好好味. 而且細細杯咁份量O岩O岩好.

屋企人就揀左以下呢幾款各自炮製了屬於自己O既 Dessert Sampler!

 

食到飽一飽後仲有餐茶送上.  真係勁豐富又滿足呀. 

咁多選擇, 食物水準又夠高, 環境又舒適的一個Sunday Family Brunch 都係只係$368一位. 下次一於要再去呀.