心結難解

自從爸爸患病後家中好多狀況都起了變化, 而隨著爸爸病情o既反覆, 家中o既氣氛亦經常變壞. 往日我好鐘意有事沒事都躲在家中o既安樂窩. 屋企對我黎講簡直就係一個避世o既好地方. 但而家唔知點解總係覺得番屋企變得好大壓力, 這些壓力比工作中所受o既還要大, 亦更難處理. 有時我真係會覺得有心無力. 特別係當兩老因情緒問題而發生衝突時, 我真係好想一走了之, 唔想整日都係活在他們吵吵鬧鬧當中, 但要我真的棄之不顧的話, 坦白說我也做不到. 我係唔忍心見到他倆明明仲係互相關心的, 但就因為一時情緒失控而互相指罵, 咁樣做除了會影響到病情外, 仲會影響到一家人o既感情!!!

有時當我分別單獨跟他們傾計時, 會發現致命處係大家o係病後o既思想上有分歧所致. 媽媽於爸爸得病後, 一直都好希望o係佢努力照顧下會慢慢好番, 所以佢真係全力以赴地全心全力咁去照顧爸爸的, 起居飲食, 陪爸爸東奔西走的覆診, 探病等等佢都做到足, 有時真係見到佢都覺得好辛苦, 想幫輕佢, 但佢又覺得有d野唔可以假手於人, 所以佢乜都要親力親為, 咁就對佢自己做成一定o既壓力. 但可惜眼見爸爸病情反覆不定, 好o既時候少, 壞o既時候多, 佢就開始有挫敗感了, 佢會諗點解自己做左咁多野, 依足吩咐但都唔見有乜起色. 佢會有點失措o既感覺!!!

而爸爸自己就比較悲觀的, 當然我都知道有癌症的話係沒可能100%康復過來的, 但人總要向前望, 你無可能成日都跟從前最光輝最健壯o既時候比較的, 人係一定要活在當下的, 成日懷勉過去只會令自己更加痛苦. 而家爸爸o既情況就係咁, 佢經常都會覺得自己無乜希望, 即使我地或醫生跟他講情況並不壞, 希望佢努力加油時, 佢o既心情都只會短暫時間好起黎, 很快佢又會覺得我地係安慰緊佢, 佢跟我說 「有呢個病之後你要我笑嗎? 我真係笑唔出, 自己都知自己乜野情況, 而家係睇下自己捱得幾耐, 你估真係做完呢次手術就會無事? 以後仲有唔知幾多野要跟手尾, 唔知仲有幾多關要過咖, 你地以為真係就咁整完呢次就會好咩?」 聽完呢d咁o既說話, 我真係唔知點樣回應. 之後仲有難關要過呢個我一早知, 亦有心理準備, 我希望o既只係爸爸可以跟我地一條心一齊去面對, 雖然我知唔係容易o既事, 但總希望大家作為一家人係可以一同堅強面對. 不過可能被病魔纏身的始終不是我, 我係唔會理解爸爸身體上所受o既痛苦有幾大, 可能佢都已經盡了最大努力去應付去面對. 但咁o既說話比媽媽聽到了, 就只會令佢覺得更加無助, 佢係好想幫到爸爸, 但咁落力去幫得到o既結果係爸爸病情仍然反覆, 而且仲要知道爸爸o既意志力好像正慢慢消失, 媽媽當然就覺得無意思再繼續下去了.

近日爸爸雖然完成了切除部份小腸的手術, 但還正處於康復期間, 傷口少不免還是有點痛, 有時佢亦都唔係太識表達自己究竟係邊度唔舒服, 或者係點樣唔妥, 佢只係一唔對勁就會緊皺雙眉, 媽媽睇到佢咁o既樣不期然又大為緊張, 不停追問佢o既情況, 咁做又令爸爸覺得好煩厭話媽媽太過精神緊張... 結果呢個係一個dead loop, 每日就係咁吵鬧中渡過. 其實大家都係互相關心的, 只係表達方式出了問題, 爸爸而家就好似一個小朋友一樣, 佢唔鐘意比人迫o既感覺, 媽媽係超緊張, 所以凡事就日哦夜哦咁, 爸爸就會覺得好似被迫到抖不過氣咁. 但同時間爸爸o既悲觀反應又令到媽媽覺得好沮喪, 覺得做乜都係白費o既. 所以而家我每晚放工返到屋企就好似係一個和事佬咁, 希望可以緩和一下佢地o既情緒. 不過長期再係咁落去的話, 我真係唔知自己可以頂到幾時呀.

感激遇見

爸爸手術後一直都係乖乖的留在醫院休息, 這幾天的進度也相當不錯. 今天醫生說可以試飲粥水了, 如果情況okay的話, 明天便可試試食粥類食品. 而爸爸亦依足林醫生的吩咐, 精神好一點就會落床坐一會, 甚至還可以慢慢的到病房外的走廊活動一下筋骨.

而昨晚當大家齊集o係床位跟爸爸聊天之際, 陳醫生忽然到訪給了我們一個surprise!!! 真的超感謝陳醫生的到來, 他真的很有心啊. 另外, 陳醫生說林醫生跟他聯絡過了, 說手術很成功, 並順道替爸爸腹腔內的部份大型o既腫瘤切除了, 剩餘的一些都係無乜併發性的, 亦即是說危險性較低的. 同時陳醫生亦說明了化驗過切除出黎o既腫瘤, 知道情況並不算壞, 所以佢希望爸爸係今次手術過後回家好好休息兼要食多d野, 盡量養好身體. 陳醫生還說爸爸出院後可以食乜都得呀. 連之前所講o既菜, 呢類比較難消化o既都應該食得到. 因為而家爸爸o既腸應該唔會再有阻塞咖喇. 聽到呢個消息真係相當令人鼓舞!!! 另外爸爸都話林醫生跟佢講佢o既腫瘤其實唔係好惡, 理論上小心飲食的話係唔會有太大問題出現o既. 就係聽完兩位醫生o既意見後, 爸爸看來好像輕鬆了不少. 所以話醫生所講o既一句鼓勵說話總比我們所講o既十句更有威力. 陳醫生在臨走時仲不忘叫我地記得出院後要打比佢, 等佢知道爸爸o既情況如何. 正如兩老所講, 能夠有幸遇到兩位咁好o既醫生, 真係太好運了.

為爸爸打氣

在講述爸爸今次腸手術前, 先要衷心感謝陳子棠醫生及林志明醫生的悉心安排與照顧. 否則爸爸今次的腸手術也未必能如此順利.

在陳醫生的積極協助及安排下, 爸爸於12月5號那天傍晚到了林醫生的診所, 就腸痛的問題咨詢林醫生的意見. 其實陳醫生於12月4號睇完爸爸於3號在St. T 的CT後, 已立即表明scanning的報告顯示爸爸的腸臟的確有些部份可能被腹腔的腫瘤壓著了. 但好消息係陳醫生認為呢個問題係可以做手術解決到的. 由於我地跟陳醫生講過想在私家醫院幫爸爸做呢個外科手術, 所以陳醫生亦立即代為轉介給一個他有信心的, 認為是有良心又靠得住o既相熟外科醫生接爸爸這個case. 就係咁陳醫生就幫我聯絡上林醫生了, 並立即約定5號傍晚跟看一看爸爸的報告.

而5號晚當兩老見完林醫生後就等埋我收工一齊食晚飯, 期間他們說林醫生好好人, 知道佢地想快d做呢個手術, 就立即代為安排, 先打去浸會, 不過到聖誕前浸會o既期都已經fully booked了, 退而求其次的我們就選擇了在St. T 做, 不過第一次約果陣都係回覆要等到12號先有期, 林醫生於是即刻親自打給手術室部門的主管再商量, 之後想不到咁快就book到星期六 (12月6號)就可以做了. 我地當然好開心啦, 因為始終早d做就可以等爸爸早d康復嘛. 於是爸爸o既腸手術就定於星期六12:30 noon進行了, 林醫生亦解釋了手術會遇到的問題, 風險等等.

到左星期六早上我地就8:00去到St. T 幫爸爸辦理入院手續. 由於時間尚早, 所以退房情況仲未知, 工作人員就叫我地先在大堂等一等, 有房會再通知我地. 而我地亦講明我地想要入住o既房間類別及床位的安排. 而在等待期間, 我地仲去左Starbucks買左個早餐食添, 當然唔少我o既至愛Milk Latte啦, 飲完後真係好似叉滿電咁呀. 呢份三文治其實有另外兩件係吞拿魚黎咖, 不過掛住食都無映到相, 淨係映左呢份碎蛋咋. 我覺得Starbucks今年Xmas個packing好正呀 ~~

而當媽媽同妹妹等緊野食ready時, 咁o岩又撞見陳醫生出現於St. T. 大家打過招呼後, 連陳醫生都估唔到林醫生會咁快手就幫我安排到手術時間, 陳醫生仲叫我地手術完成後打電話話聲佢知, 真係有心呀.

一等就等到差唔多9:30先有床位, 不過就唔係我地request果種, 但由於怕時間太趕, 我地都係決定先行上房, 工作人員話有床位可換的話, 會再幫我地安排. 上到房, 做完一般程序後, 就去到爸爸o既床位, 換衫啦, 準備抽血, 放便啦, 期間麻醉師到訪, 講解左麻醉o既情況, 而林醫生亦已黎到先見一見爸爸, 比一d安慰及鼓勵. 而就o係我地行行企企睇完醫護人員幫爸爸整呢樣果樣之時, 醒目的妹妹見到有位病人應該準備check out 了, 呢個時候, 我都唔理得咁多喇, 面皮即刻變得成尺厚的走去問護士有關轉床位一事. 好彩護士們都好樂意幫忙, 亦唔怕我地麻煩的幫我地轉左去我地想要o既床位. 呢個就係由爸爸個床位望出去o既情況喇, 雖然呢個床位較其他位會貴少少, 但想到爸爸要o係度休息一段日子時, 再貴o既都係值得o既! 而安排好爸爸轉床之後, 我地就決定唔再排另一邊o既3至4人房喇, 反正呢個正合心意. 唔想再轉來轉去了.

爸爸今次o既手術除了會切除塞左o既腸之外, 仲會順帶做一個Port, 呢個盒仔係比爸爸黎緊打針抽血用的, 因為林醫生見到爸爸手部o既血管o係經過咁多次吊針後都開始有變硬o既情況, 趁今次手術加一個port, 爸爸之後再進行吊針, 抽血時就唔需要驚搵唔到血管又或護士手勢唔好而要無啦啦比人拮多幾針咁痛喇. 之後爸爸約於12:20分就被安排到2樓的手術室外準備喇. 醫生話今次個手術會大約進行3小時多. 就當爸爸準備手術之時, 我地就先去食lunch, 跟住再趕番去等爸爸. 結果等到差唔多3:45先見醫生番出黎, 佢一見到我地就同我地講手術好成功, 佢地已將部份腸臟連一點擴散到腹腔的腫瘤都清除了, 同時打針抽血用o既盒仔亦已安裝完成, 過程順利. 爸爸已經醒番, 不過要再留o係入面手術區多一會, 等精神再恢復一點先推番房休息. 聽完呢個消息真係成個人都放鬆晒.

到左4:30左右, 爸爸終於被推回病房休息了, 林醫生不久後亦上到病房再跟進. 醫護人員就忙於為爸爸進行各種插喉o既程序, 期間林醫生仲問我地如果唔怕血的話, 佢可以show 一 show爸爸今次手術所切除的腸贓部份. 我地當然都想了解一下啦, 點知一睇就真係幾乎暈低, 嘩...真係切左好多呀. 媽媽亦頻說 「哎呀, 真係切左咁多呀?」 但林醫生話 「其實你係應該講留番o既都仲有好多先o岩!」, 而林醫生亦叫我地用手隔著幾重膠袋摸一摸那些切除出黎o既腸臟, 並一邊解釋比我地聽正常o既係會腍腍地咁o既, 但比腫瘤黏著的部份會較硬. 我地用手摸過後都覺得真係硬到難以置信的. 醫生並說開刀後發現其實有3個部份可以做到手術, 所以一併過替爸爸處理好了, 同時亦發現由於有部份腸塞o既位置係好貼近胃部, 所以會導致爸爸之前一食野落肚就出現腸痛o既情況, 而家應該無問題咖喇. 而林醫生亦話個傷口唔係太大, 約3吋左右. 不過做手術期間亦都應爸爸情況加左幾次藥幫佢止痛. 而家番上黎病房就要好好休息, 暫時都不能飲食, 會插住胃喉, 吊住葡萄糖水, 入面加入左止痛劑, 止嘔藥. 所以爸爸係唔可以落床o既, 否則就會出現頭暈o既情況. 並叫爸爸好好休息. 之後我地再三向林醫生道謝就陪住爸爸休息喇. 好開心見到爸爸手術後精神都尚算唔錯, 係比較攰少少. 期間我亦打左比陳醫生話佢知手術順利完成, 唔該晒.

到左第二日又係一大早就去醫院睇爸爸喇, 所以又可以食多次Starbucks早餐, 今次我試左芝士蘑菇飽, 相當好食, 唔少得o既就係整番杯Milk Latte. 跟細妹落去Starbucks買野食時見到好靚o既Xmas cakes!

番上去等到大約10:00幾, 醫生黎到睇爸爸, 原先我地仲以為假日醫生多數都唔會黎添. 醫生睇過爸爸o既情況後覺得進度唔錯, 打算慢慢將止痛劑o既份量減少, 所以提醒左爸爸可能會開始有點痛o既感覺. 之後在差唔多5點多時醫生又再黎多次, 同樣細心地為爸爸檢查一次, 進度仍然理想, 無乜特別野. 而我地就陪住爸爸到5:30左右就出發準備食dinner. 今晚我地又再去左美心MX食火鍋呀, 細妹又係食佢o既石頭撈飯. 食飽飽後又行番去睇爸爸!

星期一晚收工後趕去探爸爸, 醫生話可以比爸爸試下坐起身, 但就暫時未可以周圍行. 而爸爸就話坐起身之後整日都有d痰咁, 醫生話都係正常o既, 不過就記緊一定要盡量將痰咳出黎. 基本上爸爸而家o既進度都算滿意的, 只要唔好操之過急, 乖乖地o係醫院好好地休息下, 等傷口慢慢埋好. 咁樣爸爸o既身體就可以一步步康復過黎咖喇.

o係度真係要好多謝醫生們的努力及照顧, 另外亦要感謝WT過黎陪住我地留守o係醫院過左呢個週末!

爸爸新進展 - 腸痛難當

爸爸自上星期二由QMH出院後情況可以話係未好過, 坦白講我真係唔知可以做到d乜, 唔通眼見爸爸出左黎兩日都唔夠又即刻送番佢入院 which is 我唔覺得有作用. 加上爸爸比困o係醫院咁耐後真係好呆呀. 佢亦都跟媽媽講明怕再要一個人留o係醫院. 我當然都唔想見到爸爸一個人又要再留o係入面咁耐呀, 所以最終我地大家都同意左比佢休息番幾日睇定d先再決定下一步點做.

點知o係屋企休息呢幾日情況一直都係咁差, 爸爸連日黎一食野落肚就會出現絞痛問題, 令佢食唔到野, 什至連飲啖水都唔得. 不過爸爸已經好強, 即使痛佢都會嘗試續少續少咁食d粥, 不過我知佢真係好辛苦, 每次食一碗細粥都要博鬥好耐, 每次見到爸爸咁辛苦我真係覺得好難受呀. 而結果我地經商議後就決定打比陳醫生, 安排左今日 (星期一)下午4點到浸會醫院見陳醫生. 而在剛過去o既星期日, 爸爸再次因為劇痛而留在家中休息, 無同我地去飲茶呀.

頭先o岩o岩媽媽打比我, 話已經見完陳醫生喇, 而家安排左星期三會去St. Teresa 做一次CT, 跟住星期四下晝會拎埋報告去診所搵陳醫生. 再根據報告睇下條腸係咪黏埋一齊, 如果黏得太多的話, 會搵外科醫生研究下可唔可做手術解決呢個問題, 而導致腸會黏住o既原因之一, 可能係之前受到控制o既腫瘤再次發惡變大左, 咁就有可能會令到爸爸腸壁被腫瘤黏住了.

o係度真係要多謝陳醫生再次幫我地解答疑問, o係爸爸留在QMH咁多日內腫瘤科o既醫生只係o係入院初日黎睇過爸爸, 之後一直都無再點樣跟進, 而各外科醫生睇完爸爸個case又一直都無辦法 solve 到, 就咁禁食幾日, 吊完鹽水就將爸爸送番出黎. 咁呢d係乜野醫療服務呢?

而家希望爸爸星期三做完CT scan後可以知道問題癥結而對症下藥. 我唔想因為一拖再拖而延誤了治療. 更加唔希望係有乜野其他壞消息發生.

QMH 的5日4夜

爸爸自上星期開始個肚就不時唔舒服, 終於等到星期四見了陳醫生後就提議我地番QMH覆診. 所以星期五佢地就先行到QMH的腫瘤科應診, 但當日因為並非預約日, 所以要等就要等到下午4點先有得睇. 但據媽媽所講, 星期四晚爸爸已經痛到無乜點訓覺, 星期五早上都仲係好痛, 無可能等到下晝先見醫生. 咁當值o既醫護人員就提出不如佢地去急症果邊睇左先. 就係咁爸爸就痛到坐住輪椅咁去左急症果邊. 結果好快就安排左佢入院檢查. 起初一晚就住o係一個用於分流o既病房內, 期間唔准佢飲水食野. 只係幫佢吊住鹽水. 因為醫生檢查過後話爸爸好乾, 要吊住鹽水先得. 另外仲安排左佢照X-Ray的. 而放工後我去探佢時, 佢就話今日有好多唔同科o既醫生黎睇過佢, 但個個都比唔到佢肚痛o既原因. 而當我在場時亦有一個醫生帶著一群醫生學生幫爸爸做一個詳細檢查. 坦白說如果唔係因為有學生帶住的話, 醫生係唔會幫我爸爸做咁耐檢查, 亦唔會交代得咁詳細o既. 佢地睇完片後話理論上唔應該係腫瘤o既問題, 因為剛於11月初做o既scanning都睇到腫瘤係受到控制o既. 但就認為我爸爸條腸有點塞. 所以就安排我爸爸放瀉.

就係咁第一晚就過左喇. 第二日(星期六)早上爸爸打黎就話轉左佢去A座病房. 但一樣係未有醫生講到點樣解決佢o既問題, 而爸爸自己提出o既疑問亦同樣無醫生答到佢. 之後嘗試比粥水爸爸飲, 睇下反應. 結果係無特別野, 只係爸爸仲未可以自行排便, 即係腸依然係塞住o既. 如是者爸爸留院至星期日時情況都無乜大改善, 問題依然無解決到. 只係星期日就話比爸爸試埋食粥, 唔再係只飲粥水喇. 不過仍然唔比佢出院. 爸爸其實都已經比困到呆呆地咁喇. 佢一心以為而家個肚都無乜野, 又瀉左幾次喇, 應該星期一比佢出院啦.

點知星期一醫生仍然係話要再多觀察一日, 但最攪笑o既就係 so far 真係無人可以話到比我地知究竟爸爸條腸出現左乜野問題呢? 唔通就咁以後都係食白粥就算咩. 無可能咖嘛. 咁既然爸爸已經留左o係度咁耐喇, 我地決定比多少少野爸爸食, 睇下佢又有乜反應. 測試結果就係一食稍為固體狀o既野, 個肚就會谷住唔舒服咁咖喇.

到左今日星期二喇, 爸爸足足留左o係QMH成五日四夜咖喇. 今早佢就打比我話醫生黎睇過佢後, 安排左佢出院12月17號再番去腸外科覆診. 其實當爸爸通知我話可以出院時我都知佢一定無話比醫生知佢個肚又有少少唔舒服咁啦, 因為佢真係但求出院唔好再困o係入面. 呢層我都明白o既, 一個人行得走得, 但比強迫性限制活動又真係好痛苦o既, 所以我都無再多問, 只係叫佢番屋企後休息多d, 同埋暫時食番粥先啦.

到12:00幾 lunch 時我打比佢就知道佢地已經番左屋企喇. 原本媽媽想叫爸爸去見下陳醫生咖, 但爸爸睇黎真係有d攰同埋又怕唔知今次睇完會唔會又安排佢去留院. 所以極力反對, 咁我就即管比佢抖多幾日精神好番d之後, 如果真係再唔舒服的話, 就算佢唔鐘意我都要送佢去見一見陳醫生咖喇.

惡魔回歸

經過幾個星期o既休息後, 前陣子爸爸開始又出現痛症. 開初我地以為係跟往日周期痛症一樣, 只要食藥就會舒緩到, 可惜痛症連續數天都未見緩和, 反而有愈趨厲害o既情況, 終於o係無計可施o既情況之下, 我地都係決定先去見一見陳醫生. 根據陳醫生會診後o既結果就係佢摸到爸爸o既腸的確係有點腫起來, 咁o既情形有可能係癌細胞再次作惡. 所以佢提議我地應先番QMH覆診 (儘管我地原先約左12月22號先去QMH, 陳醫生都主張我地唔好再等, 應該快d去睇下乜野事先)

聽到呢個消息當下就有點唔開心, 因為估唔到惡魔咁快就回歸. 我有點擔心爸爸不知可夠體力應付新一輪的療程與否, 亦同時擔心今次萬一真係再出岔子時情況究竟有多壞.

剛剛就收到媽媽o既電話, 已在QMH急症部安排左爸爸入院喇, 醫生話爸爸好乾, 所以要吊住鹽水先, 但就不能飲食. 媽媽仲話爸爸今早o係腫瘤科等睇醫生時真係痛得幾厲害, 結果要坐住輪椅咁過去急症部. 我真係好擔心爸爸o既情況呀. 但我又可以做到d乜呢?

跟住會點做就暫時都未知. 希望無乜大礙吧.

休戰期

爸爸而家暫時跟癌魔處於休戰期. 11月3號爸爸去到QE進行第二次o既PET & CT Scanning, 11月6號報告出左. 我地當然唔識睇份報告講乜啦, 但粗略估計應該無乜大問題. 之後等到10號拎住份報告去QMH見廖醫生, 醫生話睇落無話乜野特別問題, 而家提議先暫定所有療程, 休息6個星期, 約好12月22號再番去覆診. 爸爸問過醫生而家具體情況係點, 醫生話而家報告顯示病情係受控制o既, 加上由於累積打左咁多針後, 爸爸體內已出現一定程度o既藥物敏感反應, 呢個時間再追打落去只會一拍兩散, 所以提議我地先休息一陣, 正所謂 『敵不動, 我不動』, 希望大家相安無事咁相處. 廖醫生仲話我地要學識點樣 "帶瘤共存" 希望爸爸做得到. 聽完報告後都叫安心少少, 起碼都算受到控制. 呢6個星期爸爸就要好好休息一下, 養番好個身子, 因為黎緊又唔知會點, 趁呢段休戰時間作好準備都係一個唔錯o既選擇.

之後我地亦都約左陳醫生見面, 希望問多一個專業意見, 陳醫生o既睇法都大致相同. 現階段實在不宜再出手追殺, 係時間比爸爸休息一下喇. 而呢段期間爸爸仍會keep住見黃醫師, 希望有中藥o既幫助之下, 爸爸身體可以強番少少啦.

QMH第二針順利完成

去完廸士尼玩之後第二日, 爸爸就開始第二次o係QMH的療程喇, 而今次同樣地無事終了! 今次打針其實都有點少阻滯. 話說21號爸爸覆診之日, 果朝佢地3個 (細妹on leave)晨早就去到QMH喇, 因為預約紙話見09:00 a.m. 的. 去到未開門就o係外面排隊先啦, 到夠鐘時就有個阿姐黎開門, 點知一開門就大聲喝 d 排緊隊o既病人, 係真係大聲兼無禮貌果種態度喎. 當然d病人同埋家屬都係敢怒不敢言啦. 不過老實講如果我在場的話, 我諗我會忍唔住出聲囉, 而家果d係病人黎咖, 佢地唔係黎乞食呀, 只係黎排隊睇醫生之嘛, 使唔使比人咁樣呼呼喝喝呀? 離晒譜呀簡直. 登記完後就坐o係度等叫名, 今次佢地又係見唔到廖醫生就改左由一位女醫生 (好似係Dr. Lee)接見佢地. 起初話今日無床位, 咁要改期打針, 就連之前約左o既24號 o係 HKU照scanning都要改. 點知見完出黎無耐又再call佢地入診症室, 又話幫爸爸安排到床位喇, 可以如期21號打針, 但係scanning要改番去QE做, 原因係QE o既scanning 會 詳細 d. 就係咁呢位好好人o既李醫生就幫我地安排左11月3號去QE 做 scanning, 之後10號就會番QMH覆診. 希望到時報告一切正面啦. 而今次咁好彩地當爸爸問有關一種藥物o既購買時, 李醫生先知原來爸爸係乙肝帶菌的. 如果唔係爸爸開聲問買藥問題, 我地真係以為佢地有晒 full record about 爸爸過往o既病歷. 所以以後真係唔理咁多, 就算煩都要多口講多句, 唔好以為真係乜都mark低晒呀.

佢地之後出番登記處時, 細妹話果度o既工作人員真係幾懶散, 情願企o係度吹水都唔想做咁, 叫d病人自己打電話去cancel scanning booking, 其實book又係佢地book o既, 醫生都講到明我地病人係唔需要自己打去cancel, 因為佢地會幫我做咖喇. 好彩又係問聲佢地, 佢地真係話 "我地唔會幫你做咖喎, 你自己打去cancel啦" 細妹頂佢唔順就話 "頭先醫生話你地做咖喎, 你唔係諗住叫我地自己打去吓嘛" 跟住佢先死死地氣話 "咁你比番張預約紙我先啦." 你話係咪你唔出聲就乜都要自己做番晒, 咁請你地番黎除左吹水仲有乜野做?

順利將爸爸settled down後就開始吊針喇. 今次一樣係3日2夜的. 所以療程已於10月23號完成, 爸爸亦番左屋企休息緊喇. 可能已經吊左幾次大針, 副作用亦相對地較之前o既多, 例如今次爸爸就o係吊針期間有d敏感, 需要打敏感藥. 而且出院後亦有幾日無乜胃口有點作悶反胃o既感覺, 好彩稍事休息後, 而家已經慢慢recover緊喇.

Phone for Bed??

好耐都無上黎報告一下爸爸o既最新近況.

話說10月2號兩老到了QMH覆診, 原定11:15 o既會診一等就要等到1:00有多先見到醫生. 其實都無乜太多新o既update, 只係話約好10月3號打針, 不過我地而家先知公立醫院原來係興 Phone for Bed的. 即係話爸爸要10月3號早上7:30打電話到QMH睇下有無床位, 有就可以準備入院, 無的話就要另外再約. 我聽到呢個news之後真係感到有點不可思議. 於是我就自行打去問QMH. 後經證實原來呢個係必然o既procedure. o係度真係要多謝接我電話的那位張小姐, 相信她一天內一定會被唔少好似我呢種新丁o既來電煩過不停. 但難得o既係呢位張小姐真的好細心, 除幫我check床外, 仲慢慢解釋比我聽佢地o既procedure係點樣運作. 而幾經要求後, 張小姐亦明言其實10月3號係無床位供應的, 換言之爸爸最快都要等到10月6號 (星期一)先有得吊針. 明白過後, 我們還是別無選擇地要接受 Phone for Bed! 就係咁我又麻煩左陳醫生一次, 想問下佢o既意見關於爸爸 delay左呢一針, 佢話當然唔係咁理想, 但公立醫院就係咁, 我地就算十萬個唔願意都無用, 因為我地根本就無得揀.

Anyway, 爸爸第一次o係QMH的用藥就確定要delay到10月6號(星期一)喇. 當日早上爸爸7:30打去 confirm 左有床後, 職員就叫佢大約9:00到QMH, 好彩o既係都好快就安排到佢開始用藥吊針喇, 不過咁o岩頭兩日Dr. Liu都係放緊假, 要星期三先會見到佢喇. 放工後急忙趕到QMH見一見爸爸, 不過我真係覺得公立醫院o既探病時間好短, 只係得12:00 - 1:00 同埋 6:00 - 8:00呢兩個時段, 即一日都係探得3個鐘. 上到去見到好彩爸爸個位置都算唔錯, 3人房間, 有一部LCD TV o係中間位, 當然其他設備係唔可以跟私家醫院比拚啦, 但整體上都已算不俗, 而且醫護人員都好 nice, 服務態度真係唔錯咖喇. 呢樣先令到我可以安心一d. 探病時間好快就完左喇. 跟爸爸 say good night 後我就同媽媽搭車番屋企喇.

星期二係公眾假期, 我地如常飲完茶後就準備晚餐比爸爸, WT仲同我偷雞早左少少去探爸爸, 好彩都無比姑娘咋型. 期間傾下講下咁好快就到媽媽同埋細妹陸續上到黎喇. 時間一到我地就走喇, 因為車程較耐, 爸爸都唔想我地留得太夜, 否則番到屋企一定好遲先休息, 而且我地4個仲未食dinner, 所以爸爸一到夠鐘就趕左我地離開喇. 之後我地一行4人打的去左上環食元氣壽司. 打的都幾抵40元左右, 好過要排長龍搭專線小巴啦. 不過今次o既元氣就真係食到無乜癮. 因為水準真係下降到令人頂唔順o既程度, 而且價錢又貴左, 以往食開o既三文魚壽司都係黃碟 $9.00 今次轉左綠碟加到$13呀, 但質素就無改善. 除左手卷仲叫吸引外, 其他真係無乜好食.

* * * * * * * * * *

最新進展係爸爸呢兩日個肚又有少少唔舒服咁, 希望唔會有乜野大礙啦. 而家下一次o既療程係約左o係10月21號 (星期二), 之後會於10月24號照一次scanning, 今次Dr. Liu 幫爸爸安排左o係港大度照, 但願一切順利.

瑪麗初診

昨天放了一日假陪兩老走到瑪麗醫院作第一次的應診. 準時去到QMH Block S, 原來公務員係唔需要先排隊購票的, 所以我地就直到教授樓(Professor Building)登記. 工作人員的服務態度還算不錯的. 在我替爸爸填form時, 有工作人員還為所有今天新症的病人及家屬作了一個簡單的Briefing, 介紹一下QMH的主要Blocks係點樣去o既, 邊一個Blocks會跟病人有關等等, 資料很有用, 起碼為初來報到的我們提供了基本的concept. 之後就等左一陣就由廖醫生(Dr. Rico Liu) 接見我地喇. 坦白講當我第一眼見到Dr. Liu時我真係個心沉左一沉, 點解呢? 因為我見到o既並唔係我慣常見到的那位開朗熱情充滿positive idea o既陳醫生, 反而係一個跟之前在QE初診時遇上一樣冷冰冰的面孔. 心裡真的感到一絲涼意. 原因係患呢種病o既病人本身其實都好靠個人信心同意志的. 醫生往往就係佢地o既精神支柱, 以往兩老一見陳醫生時就算有乜野唔妥都會覺得有信心攪番掂, 呢樣就係陳醫生比到佢地o既信心, 陳醫生o既開朗性格真係可以影響到兩老. 但今次見到o既呢位Dr. Liu, 就好似其他公家醫院的醫生一樣, 專業係夠專業了, 但始終不明點解唔可以比多少少"用心"o既服務態度呢? 醫生輕輕的一句問候關懷已經叫病人情緒有很大舒緩的了. 何用他們總喜歡以咁Cool o既姿態出現o係病人面前呢? 而且在問診期間都係好官方o既口吻, 病人以至家屬係完全感受唔到醫生o既關心, 而我最唔鐘意o既就係佢地比唔到positive o既訊息比病人及家屬, 佢地好似講到你入得黎呢度睇病就預左自己唔會留得好耐咖啦, 你地有晒心理準備咖啦, 個個病人都係行呢條路咖喇. 聽完後個心真係好唔舒服, 之前兩老仲有點希望陳醫生的療法有作用, 病情係會受到控制o既, 我地當然未致於會幼稚到以為可以根治到啦, 但買個希望都未嘗不可吧? 點解硬要活生生咁一盆冷水照頭淋呢? 老人家活到這把年紀, 得了這個重病還可以承受得起現實o既殘酷刺激嗎? 婉轉點表達意見 / 事實真係咁難咩?

今次o既會診, 就在一問一答之下完成, Dr. Liu當然亦都明白我地對繼續用藥o既迫切性, 亦都知道我地對於要求跟足陳醫生用藥份量及種類的執著. o係呢度我都真係要感激Dr. Liu同埋陳醫生的相助. 起碼Dr. Liu在接到陳醫生的電話後亦很爽快的答應接我地呢個case亦都同時好快咁幫我地安排左進行跟進療程. 而家安排左10月2號 (星期四)會再覆診面談一次, 之後就直接安排左10月3號 (星期五) 入院接受轉院後的第一次吊針. 不過Dr. Liu亦已表明, 今次會先幫我地完成2針, 之後o既療程用乜野藥, 點樣打法就要等佢地QMH開會商討後才能作出決定. 換句話說, 而家即使證明陳醫生的處方對爸爸病情有明顯幫助佢地都未必會照跟, 因為而家佢地先係爸爸o既主診, 佢地先有權去決定點樣醫我爸爸. 所以一切又再次不在我們的選擇範圍了, 我地又再次變回任人宰割的一群, 正所謂肉在砧板上, 我地反抗都係無作用的了. 可以的話我當然想爸爸可以繼續o係陳醫生的幫助下完成療程吧. 但事實係我地已經盡晒力了. 否則我地點都唔會肯將爸爸轉到公家醫院去的. 現只望QMH的Dr. Liu可以幫到我地, 繼續比爸爸進行有效o既治療.

我想講o既係點解我地o既政府o係醫療上o既政策係咁失敗呢? 老實講我爸爸辛勤工作左咁多十年, 而家退休後得病想話有個好o既治療都得唔到, 咁佢咁耐以黎所交o既稅究竟用左去邊呢? 我地自己可以負擔到o既都已經傾巢而出, 為o既就只係爸爸可以得到合適o既治療. 到我地再無能力負擔時先考慮轉出去動用公家資源, 坦白講如果應付得黎, 你估我會忍心比爸爸轉出去公家醫院嗎? 先別說公家醫院的醫療設備o既不足, 又或醫護人員o既工作態度, 而家我想講o既係點解爸爸唔可以跟我地之前o既療程用番同一套藥物呢? 政府係咪可以因為資源短缺而隨意捨棄左一個可以救活我爸爸o既機會呢? 明知政府所用o既藥物係次一等o既, 所達到o既進展亦唔會理想, 點解唔好好地將資源用黎改善一下呢? 點解永遠都係資源錯配呢? 究竟我地個政府係咪真係知道大家有乜真正需要, 又或者政府知唔知究竟我地呢d 小市民所遇到o既實際係乜野生活問題呢? 隨著跟爸爸東跑西跑去到唔同o既醫院求醫後, 我真係完全唔明我地o既政府究竟在幹什麼?

不吐不快

之前提過爸爸早一輪入左St. Teresa 打算做scanning 兼要吊營養奶 + 標靶藥. 之前一直爸爸都係去開浸會吊針o既, 今次之所以轉左去法國係因為醫生覺得爸爸上次太瘦喇, 所以提議佢先入院吊番營養奶後再吊針, 加上原先約好o係法國會做scanning的, 所以為免爸爸要走來走去, 醫生就建議我地一次過o係法國做埋個療程.

原先呢個suggestion係好perfect 的. 因為一來唔使兩老趕來趕去唔到o既醫院, 二來法國醫院都幾近屋企可以陪爸爸夜d都無所謂. 點知就係咁就出事喇. 話說佢地去到法國辦手續時就見到無乜太多床位選擇, 價錢都係跟浸會o既差唔多, 私家醫院收費都唔會話平得去邊. 點知上到房後個環境同設施可以用 "差" 黎形容!

1. 首先爸爸佢地揀左3人房, 床與床之間o既間格比在浸會o既迫, 而布簾o既設計亦好有問題. 變相令病人無乜私隱; 而浸會o既床位就真係算唔錯喇, 起碼床與床之間都有番一定o既空間, 而且布簾拉上後床位o既私隠度亦不俗, 令病者同埋探病o既家人朋友覺得有自己o既空間, 舒舒服服咁傾下計都仲得.

2. 有乜理由一間新裝修不久o既醫院 (新樓座) 一間3人房竟然仲係要3個人share 一個電視!!!! 要知每個病人o既作息時間都唔同, 個個都有想睇o既電視節目. 試問得一個電視放正o係對住中間o既床位, 其他兩邊o既病人要睇時就辛苦d喇, 而且仲要將聲量較大先聽到. 今次我爸爸張床就係對正電視果張喇. 幸好兩邊o既病人都唔算太自私. 但總覺收得人咁o既價錢, 竟然provide 一d好似公立醫院大房o既設備, 真係不知所謂. 浸會相對黎講就真係做得好perfect, 每張床位都有自己o既獨立TV, 有耳筒提供, 大家病友都唔怕會騷擾到對方.

3. 洗手間o既設施真係完全唔得, 有乜理由為左怕使用者將抹手紙丟進廁所內就情願唔放抹手紙o係洗手間內, 每次去完廁所洗完手後都要滴住水咁開門出番去拎抹手紙? 麻煩就不在話下, 最緊要o既係好容易令到地下濕滑, 萬一病人滑倒咁點算?

4. 醫護人員的服務就真係令人火起. 有好幾位姑娘都好似發緊夢咁做野. 爸爸的左手正在插滿針, 要吊營養奶, 仲有鹽水. 要知果d豆豆都係要好小心處理o既, 因為一唔小心好容易會整親咖嘛. 之後有一位姑娘黎到話要量血壓, 咁就將血壓計綁在爸爸的右手邊, 但當中測心跳的夾就夾在爸爸左手的姆指. 隔左一陣姑娘就黎登記血壓讀數同埋收番部機走. 佢除左爸爸右手o既血壓計後就咁扯住部機走, 佢係完完全全忘記左爸爸左手姆指仲有個夾夾住, 好彩佢一郁已經比我叫停左. 我真係好怕佢會整到爸爸左手o既豆豆位.

5. 另外一件醫護人員o既大意事件, 事緣到了入院後的第二天, 爸爸早上一早就要起程到樓下o既掃瞄室準備Scanning, 咁工作人員就推左張輪椅上黎啦, 爸爸就自行轉到輪椅上, 點知當佢地一推時就無留意到原來爸爸左手吊住o既果一堆奶呀, 鹽水呀係有相當重量o既, 個支架跟本就唔係活動得好順, 仲要比佢地大力一推, 於是成個支架就咁跌晒o係地. 好彩當時爸爸唔係企起身, 否則一定比跌落地果個支架扯脫左手o既豆豆, 到時就真係大件事.

6. 雖然我地都無expect醫院canteen食物會好好味, 但at least浸會o既都算過得去, 起碼價錢跟所提供o既食物質素相對, 但St. Teresa o既 canteen真係唔掂, 每種食物個價錢都幾貴, 基本上真係無乜得你揀. 所以我地第一日就自行出左九龍城食野好過.

7. 最嚴重事故當然就係唔理爸爸意見, 依然照舊唔停奶就幫爸爸用右手落顯影劑, 而家整到爸爸隻右手灼傷左.

以上係我爸爸上兩個星期o係法國醫院所遇到o既事, 坦白講真係幾失望, 一間私家醫院收費有番咁上下, 但服務質素竟然係咁.

療程進度

上星期四我在接近Lunch Time 時走左出去陪兩老睇醫生, 點解今次要陪佢地覆診呢? 因為今次陳醫生會向兩老講解下一步o既療程係點做, 再加上我見爸爸自上次o係St. Teresa做完scanning後, 右手有一部分出現了好似比火燒傷咁, 而近手肘位o既傷口都幾大, 之前我地用藍藥水後情況係好轉過, 但唔知點解今次做完scanning後傷口開始好似唔識埋口咁, 我地擔心個傷口會爛及出現發炎, 所以諗住覆診時會順便問問醫生o既意見.

我12:30上到陳醫生診所, 一等就等到2:00先見到醫生, 因為真係好fully booked呀. 醫生o係睇完爸爸個傷口之後就話應該係今次對scanning所用o既顯影劑出現了敏感, 爸爸話其實scanning當日提過工作人員先停營養奶, 咁顯影劑就可以打番o係左手, 唔使兩邊手都有針頭, 點知d工作人員又話唔使停, 打一針呢d好快之嘛, 而一打落去果下爸爸已經話好痛, 好似比火燒咁沿血管痛上手肘位, 工作人員照舊係果句, 係咁咖喇, 好快打完就無事. 就係咁我爸爸隻手就比顯影劑灼傷左喇. 陳醫生話會開一d抗生素比爸爸, 同埋會安排爸爸吊針期間搵護士幫佢洗傷口, 但同時呢個傷口帶比陳醫生o既問題就係 "點樣吊針呢? 今次又係要打番左手, 萬一左手真係受唔住咁點轉手呢?" 但陳醫生話都要先試用左手先, 爸爸都覺得okay就決定如期下午入院了. (o係呢度我真係好想講下St. Teresa o既服務同設施都係出奇地差! 有機會我會再開post講下 )

至於另一個問題就係之後o既療程喇, 陳醫生決定幫爸爸打埋呢次大針後就會將我地轉去瑪麗醫院, 而佢亦好快手地即場就打電話比佢o既醫生朋友安排左我地9月29號就會跟主診醫生會面, 之後就會再跟進幾時開始繼續療程, 而為令交接順利, 陳醫生亦順便安排左10月3號再覆診, 萬一瑪麗醫院o既療程趕唔切開始我地就會跟陳醫生於10月3日多打一次針先. 就係咁一切都安排妥當了.

而今次呢針亦順利於星期六晚完成了. 再次感謝陳醫生的妥善安排及護士們的悉心照顧.

稍事休息

經過在醫院休息了幾天及在星期六晚上打了一次細針後, 爸爸已於星期日早上出院了. 陳醫生在星期日早上看過爸爸後最終還是確定由佢自己親自跟進番爸爸個case, 而且佢亦都認為爸爸還是偏瘦了一點, 所以希望佢可以o係今次打完細針後可以回家好好我休息多一點, 因為之前標靶都打得幾密咖, 差唔多每星期就會打一針咁. 而家個報告出左證明d藥有效用, 個療程就可以唔使太過急進喇.

因此而家我地o既首要任務就係先將爸爸養番肥一點, 營養要再均衡點才行. 肉類方面陳醫生說也可以不用攪碎, 但已吩咐爸爸一定要慢慢細細咀嚼才可. 而菜就一定要打碎才食得. 我地一定會好好遵照醫生o既吩咐的. 希望18號爸爸可以順利繼續打一次大針吧.

P.S.: 在此感謝各方好友的鼓勵與支持.

吉報

今天早上9:30分就係爸爸進行完第一個cycle標靶療程後第一次做的scanning. 心裡整天都感到有點坐立不安, 擔心的除了是scanning的過程外, 更重要的是擔心scanning 的 report. 多謝妹妹這兩天都在陪著兩老, 還不時sms我提供最新情況!

放工後當然就馬上搭車去探爸爸啦, 在車上收到細妹的sms, 一看到 "good news" 心中當下暗暗的小高興了一下. 再看內容, 原來係醫生剛巡完房了, 說report良好, will continue the treatment. 詳細情況就要等我到左醫院後再面談了.

下車直奔醫院, 見到爸爸, 精神很不錯啊. 之後當然就要慢慢問問醫生說了什麼. 原來陳醫生都好心急的即日就睇左scanning的報告了. 來看爸爸時, 還跟爸爸開了一個玩笑.

陳醫生 「現在有兩個消息, 一個好一個壞, 你想聽邊個先.」
爸爸 「當然聽左個壞o既先啦.」
陳醫生: 「個壞消息係....你要繼續呢個標靶療程」
爸爸: 「啊....」
陳醫生: 「咁好消息當然就係你o既報告係positive啦, 隻藥似乎對你幾有效, 由今早所做o既scanning黎睇, 主瘤無長大到, 而其他一堆附在腹膜的癌細胞亦都有變細左o既情形. 即係話藥力係發揮得相當唔錯.」

呢個真係天大o既喜訊啊. 多謝上天保祐同埋提前送左呢份咁好o既生日禮物比爸爸.

而之後要做o既當然就係睇下點樣繼續個療程啦, 不過呢d都要等陳醫生出trip後番黎先會再詳談. 陳醫生說會在明天替爸爸打一次細針, 之後星期四由於佢出左trip所以會交低比另一位醫生負責一次大針, 之後陳醫生番黎會立即跟番爸爸個case, 到時可能就會再通知我地下一步o既做法, 有可能會轉番出去公家醫院, 因為怕我地無力負擔咁大筆o既醫藥費. 但係所有野都係到時再決定.

無論之後點行點做, 呢一刻我地成家人都感到前所未有咁高興呀.

進度報告

午飯時接到細妹來電說經過陳醫生的診斷後, 說爸爸驗血報告理想, 不過由於爸爸腸痛再加上陳醫生覺得爸爸太瘦喇, 所以決定將今日o既細針押後, 而會先安排爸爸吊下營養素先, 而為了唔使爸爸由浸會轉回法國醫院照scanning. 陳醫生亦代為安排直接在法國醫院留醫, 吊營養素同埋照scanning. 在此感謝陳醫生及診所姑娘的貼心安排. 而在診症時媽媽亦乘機訴苦說被爸爸的情況弄到好無癮. 陳醫生當然就解釋番比佢地知, 病情在反覆係在所難免o既, 起碼而家so far 佢地知道個方向係正確o既, 當然之後病情如何發展無人可以預知, 但都叫左佢地唔需要太擔心. 我自己聽完後就覺得媽媽唔係咁應該o係陳醫生面前咁樣講野, 我覺得佢好似話到醫生幫唔到佢咁, 你要知醫生係專業人士佢o既建議係最有用o既, 咁點解你唔放心交比醫生處理呢? 正如醫生所講, 病情反覆係一定o既, 而且我地都唔係第一次遇到咁o既情況, 點解唔可以鎮定d去處理呢? 點解每次我地都要輸比病魔呢? 我唔信我地係會咁易就輸.

而剛剛細妹說他們已在法國醫院安頓好了. 希望爸爸的腸痛可以快點舒緩過來吧. 亦希望scanning的報告理想.

煩

近呢一兩日, 爸爸o既肚 / 腸痛情況又見加劇. 因此, 媽媽o既心情亦直跌谷底. 而我亦由最初好言相勸變成責備佢o既態度. 老實說, 爸爸上一次療程效果不佳而要轉用標靶治療再加二線藥物的療程, 一開首陳醫生亦說明了呢次2nd Treatment 係要博o既, 當初佢兩個都實牙實齒的說 「博, 有機會的話, 點都要博」 好喇, 言猶在耳之際, 而家間中見爸爸病情稍有反覆時就講埋晒d 「早知一早就唔醫啦」 「愈醫愈衰」 「攪咁多野都無補於事」 「咁醫法好無癮」 呢d係乜野說話? 係唔係輸打贏要? 話明係博一鋪, 咁當然會有輸有贏咖啦. 你點可以而家講埋d咁o既野, 老實講我係極唔鐘意咁o既態度, 所以忍唔住都要出聲鬧佢. 我可以忍受你照顧爸爸照顧得累喇, 想要呻下發洩下的話, 無所謂, 我好歡迎, 畢竟我明白要全力去照顧一個病人o既精神壓力係幾大o既. 如果連呻都唔比的話就太過份. 但呻還呻, 唔應該開口去埋怨. 成日開口埋口怨個天點解要揀你受苦, 咁o既諗法只會令自己更加辛苦, 好境的時間你有無開口多謝過個天比咁多好日子你過呢? 做人係公平o既, 順境逆境都會有機會發生. 順境的時候當然大家都可以成日嘻嘻哈哈啦, 咁逆境o既時候點解唔可以大家齊心d去面對呢? 由始至終, 我地兩姐妹 + WT都無怨過, 亦無覺得照顧爸爸係麻煩事, 亦好樂意去幫手, 只要我地做得黎o既, 我地一定會做. 點解你仲要成日覺得自己一個人作戰呢? 點解仲要成日覺得做咁多野都係白費? 難道你見唔到爸爸每次驗血報告都正在進步中嗎? 呢d好明顯就係你o既功勞啦, 唔通你睇唔出? 我相信如果唔係有你一直好好照顧爸爸的話, 佢未必可以捱過咁多關, 咁點解你唔可以再繼續加油呢? 點解你而家想放棄呢? 我明白無人想見到親人受苦, 坦白說, 昨晚聽到爸爸嘔氣時發出的聲音時我都好心痛. 但當想到爸爸嘔氣過後會舒服些時就會覺得好過點.

而今早當我起身番工前見到媽媽, 佢話爸爸昨晚3點幾都仲有痛, 食左藥好似都無乜反應咁, 跟住又講埋晒d我唔o岩聽o既說話, 換黎o既當然又係比我教訓一場啦. 你話我衰又好, 唔孝順又好, 我都要鬧咖喇, 「既然咁辛苦, 咁一陣覆診見到陳醫生果陣順便同佢講, 太辛苦喇, 我地決家唔醫喇, 尤得佢啦. 費時做咁多野都係白費o既, 無改善的話不如早d放棄佢, 慳番好過啦. 」 佢聽完後無再出聲. 無錯, 可能我會講得過份左, 語氣亦唔會好好, 但真係勸都勸到我口乾啦, 你硬係要唔聽要咁消極悲觀的話, sorry我真係唔知再點樣幫你. 如果真係照顧到咁累, 唔想再繼續的話, 唔該出聲, 我唔會介意接棒的, 雖然我唔會好似你咁做到樣樣一百分, 但我一定會比心機學好佢, 爸爸我係一定會好好照顧的.

而家細妹就陪左佢地去飲早茶, 之後爸爸就要去見陳醫生覆診了, 如果驗血報告 Okay的話又會再打一次細針. 跟住就等6號再scan了. 結果未知如何, 但大家已經盡左力的話, 真係無憾.

第三大針無事完成

星期四爸爸的驗血報告pass, 可以如期到浸會打第三次o既大針喇. 之前仲一直擔心前兩天爸爸再度腸痛會影響到佢o既報告, 打針就有可能要延期了, 好彩而家總算順利! 而在見陳醫生時爸爸亦講出左這兩天腸痛的情況, 陳醫生說這可能是因為便便順利, 令條腸o既郁動大左, 咁就會有d痛o既現象, 因為打針時會順道打埋止嘔針, 咁呢枝止嘔針o既作用就係要令腸靜止落黎, 防止病人出現嘔吐o既情況, 所以藥力一過而靜止左一段時間o既腸再活動起黎就會出現唔適應, 亦係導致爸爸腸痛o既主因喇. 經醫生解釋後, 相信兩老都會安心少少.

而在爸爸開始吊針當晚我就見到陳醫生黎巡房, 說爸爸情況都幾okay, 仲好有興致地跟我地講左一陣間笑. 之後我在醫生見完爸爸後趁機捉著醫生單獨問了一下爸爸的情況, 陳醫生說爸爸的情況佢幾滿意, 起碼係跟佢expected planning, 之後就會等4號再打一次細針, 6號會安排爸爸做一次掃瞄, 陳醫生就會根據今次掃瞄的結果再行研究下一步會點做, 如果成效理想的話, 就會安排爸爸到公立醫院約繼續療程. 一聽到爸爸要再做掃瞄, 我就立即擔心起黎, 因為6號係星期六, 做完後相信最快都要星期一或二先有報告出, 如果係星期二 (9號) 出報告的話, 那天正好就是爸爸的生日啊. 我當然希望報告係理想o既, 咁呢份將會係爸爸最好o既生日禮物!!!!

講起爸爸生日, 我就問下陳醫生爸爸可唔可以食雪糕, 陳醫生第一個答案就是”唔可以” 跟著問我點解想比爸爸食雪糕呢? 我話因為爸爸就快生日, 我諗住等佢生日那天食一點雪糕當慶祝嘛. 之後陳醫生再諗一諗就話見係佢生日就比佢食少少啦, 不過一定唔可以太多, 同埋唔可以o係打大針果幾日食, 因為一食就會 “拿” 喉的. 最後陳醫生仲吩咐我地要買就要好o既牌子, 好似Haagen Dazes呢類先得. 放心吧, 陳醫生, 我家兩老早就只係習慣食Haagen Dazes的雪糕了.

總結:　爸爸今次第三針後就係出現手麻痺, 精神不足, 食慾欠佳o既副作用, 所以爸爸一出院後的第二天 (即星期日), 整天都係留o係屋企好好休息. 希望休息過後, 爸爸o既體力可以快d恢復過來吧. 亦要在此感謝WT又用上了整個週末陪住我屋企人了.

病情 / 心情反覆不定

本來一心想著爸爸最近的病情好像穩定了不少, 跟我們一起說笑的時候也多了 新裝好的Now TV 對他就如一件新玩具般, 看到他開心的在房內休息睇波, 我們一家也認為爸爸應該無什大礙, 只要好好的遵從醫生的指示, 小心飲食, 多點休息, 爸爸應該會慢慢康復起來的. 點知就係當我地一家人充滿希望之時, 爸爸昨天又開始受到腸痛打擊. 看見他有點無心機的樣子真不好受. 媽媽亦因為眼見爸爸受腸痛之苦而傷心落淚. 一時間就好像把我們之前的努力通通抹掉了. 癌魔就好像要測試我們意志有多堅定, 當我們滿懷希冀時, 它就會忽然出現嘗試將你擊倒. 當然我唔相信我們一家就這麼容易認輸. 但有時也真的被它弄到自身心情反覆不定. 現只能希望爸爸的腸痛快點退下, 好讓他能好好在家休息多兩三天, 因為今個星期四如驗血報告正常的話, 爸爸又要再度展開為期三日兩夜的標靶治療了!

爸爸勤練功

自從爸爸得病後得到茶客張先生的介紹下就開始跟陳師傅練習氣功了. 而爸爸亦一直很努力學習, 雖然唔知氣功對於爸爸o既病情有多大幫助. 但覺得將之當作日常強身健體的一種運動也是一件好事. 所以爸爸也很積極的, 除了打針服藥後身體太累未能應付外, 每天大清早他都會出發自己一個去練功的. 而週末只要我跟妹妹有時間也總會陪他一起的. 就好似之前咁就跟他一起到港大跟陳師傅上了查功班, 在等爸爸學習時我就貪得意周圍映下相, 覺得呢幾棵草都長得很不錯.

有時仲會跟妹妹邊等邊嘆Tea! 你睇, 都幾豐富咖.

希望爸爸可以keep住比心機練功, 好好的調理身子. 我地一定會為他打氣加油的.

繼續標靶

上星期四爸爸又再進院接受第二次o既標靶治療. 今次呢個係大針, 即係要吊3日2夜的. 所以我地收工後就各自趕到醫院陪下佢. 呢d標靶藥都幾勁咖, 爸爸一開始吊無幾耐就已經覺得個人好累, 就連把聲都沙沙地咁, 同埋面上出左好多暗倉, 走米o既東西, 仲有d紅疹咁. 不過醫生話呢d都係正常反應黎o既.

星期五那天咁o岩係初十五, o係爸爸張床望出去見到個月光好大好圓呀. 由於係初十五o既關係, 我地要食齋, 所以晚餐我地就走左去浸記canteen叫左d齋菜喇, 因為對上有一次試過, 味道都唔差咖. 菜色就有: 蕃茄天使麵.

乳香上素西蘭花

什菌翠肉瓜

菠蘿咕嚕素雞

另附上前一晚食o既香煎龍脷柳跟粟米汁, 唔錯幾好食.

食完齋菜後番上去再陪多爸爸睇左一陣奧運後先番屋企, 番到去原來媽媽仲買左桃比我地食呀. 超甜呀.

總結: 爸爸而家o既療程暫時都算穩定, 但藥o既成效有幾大就真係未知之數, 希望效果理想啦, 咁樣爸爸就可以keep住, 而我地又唔使太擔心呀嘛. 而家爸爸係每個星期都要進行治療咖, 不過大針就隔個星期先吊, 期間我地會煲花生衣比佢補充下血小板的讀數, 仲有就係煮一d低纖但有營養o既食物比佢. 因為陳醫生話爸爸暫時都係適宜食用低纖食物, 因為怕佢腸胃消化唔到. 所以真係有勞媽媽去小心處理爸爸o既日常飲食喇.

另外就要多謝WT每日收工都趕過黎陪我地, 連星期六都整日陪我地留守o係爸爸左右! 不過我知黎緊WT o既工作會比較忙, 所以未必可以成日陪到我地, 但係放心啦, 我地會好好照顧佢咖喇, 你比心機做野, 唔使擔心我地咖.

無言感激

自爸爸有病之後, 我地一家人個個都好盡力地去幫忙. 而最近爸爸決定會試標靶治療喇. 本來陳醫生o既主意係想幫爸爸先打幾針後, 睇睇情況點, 如果效果良好的話, 佢打算寫紙比我地轉番出去QE先繼續, 因為擔心我地負擔唔黎. 不過我地o既concern係怕政府醫生唔會follow up 得好好, 而且萬一佢地轉藥的話我地係唔可以抗議o既, 因為你轉左出去就係由佢地o既醫生做爸爸o既主診, 佢地有權認為其他藥都有相同效果而幫你轉用其他藥物. 我地好怕如果呢個情況出現的話, 萬一轉藥後有事, 咁之前所做o既一切就有點前功盡廢了.

所以o係星期六爸爸出院果日, 陳醫生就好有耐性地將爸爸之後o既療程講左一次, 而且仲幫我地做左一個預算, 比左一個rough idea我地成個療程到底會用幾多錢. 聽完之後我地都有一點擔心, 因為費用真的唔平, 動輒都係講緊幾十萬. 正當我地諗緊下一步之時, 陳醫生就提議我地暫時其實唔應該諗太多, 先等佢打左頭幾針睇下報告反應係點先再商量下一步應步點做. 不過話雖如此, 我地都係想及早有個打算. 所以經商議後, 由WT提出左一個相當可行o既方法就係由我地3個先行注資比兩老. 當然要我地其中一個獨力承擔今次費用就實在無乜可能, 但我地可以夾左$$先. 就係咁呢個方案好快就比我同細妹通過左.

當我地話比媽媽知後, 佢話其實唔使我地咁操心, 佢同爸爸會有辦法, 但我覺得呢個時候佢地兩個都實在唔應該再浪費精神心機o係錢銀方面. 而媽媽仲話爸爸會唔好意思要我地夾錢比佢醫病, 因為講到底究竟呢次o既療程有幾大幫助真係未知之數. 佢唔想因為自己有病就令到一家人都煩惱. 但係唔通我地會覺得有錢傍身好緊要咩? 現階段我地最關心 / 擔心o既就只有爸爸o既健康情況. 其他野真係唔太重要. 錢用左可以搵番, 大家有手有腳, 一定唔會有問題. 所以結論係我地唔會理佢地反對又好, 唔好意思又好, 我地3個都會堅持夾$$做左第一輪o既療程先再算. 至於成效問題我地都控制唔到, 無人話比左$$就一定有效, 但有機會都唔去試就絕對唔得.

o係呢度我真係要好好感謝WT o既支持, 無論係精神上定係金錢上佢都幫我地一家作出唔少貢獻. WT, 希望我地下一次o既 outing o既目的地能如你所願.

重新起步 - 標靶治療

爸爸由星期二起入院到昨晚開始就正式轉用標靶治療喇. 入院後第一日陳醫生早上9時多見過佢後話觀察多一晚就會決定是否用新方法. 結果昨天再睇後決定應該無問題, 醫生亦同時解釋了存在的風險, 一切都要視乎佢條腸o既狀態. 其實標靶都有兩種大方向可做, 但其中一種醫生已表明一打落去, 佢條腸係一定受唔到會穿的, 所以會用另一種. 而佢會開好藥方叫護士晏少少可以開始. 而細妹亦問過醫生如果我地選擇乜野治療都唔做的話情況又會點, 醫生就話以爸爸條腸成日都會塞下塞下咁就唔太樂觀, 假如真係乜都唔理就最多捱幾個星期 如果試用新方法而效果理想的話, 都可以延長一年左右, 當然一年後o既情況醫生都答唔到, 因為都要睇下個癌細胞有幾頑強. 聽完陳醫生o既意見後我地當然認為一定要博一博啦. 而且既然陳醫生都認為爸爸有機會的話咁點解唔試下呢? 雖然我地都知呢個唔係一個便宜o既治療, 但無可能因為咁就放棄呢個機會咖嘛. 另外陳醫生都覺得我地好努力咖喇, 難得爸爸兩日無食正餐都可以幫佢keep到個驗血報告咁理想, 呢d都係多得媽媽o既功勞. 最終昨晚當我地探完佢差唔多番屋企時就開始準備新藥喇. 到晚上大能11:00就正式開始用藥. 據講仲要吊足3日2夜的.

而最新消息就係爸爸今早打比我話醫生今天巡房時睇過佢o既情況, 按過佢個肚話無問題可以繼續. 而爸爸亦自己寫低左用過乜野藥, 佢話好似有3種唔同種類的, 係隔住隔住咁用o既. 大約每兩個鐘就會幫佢換一次喇. 而第一個反應就係爸爸話覺得左手好痺, 仲痺到有少少痛咁, 所以佢已經麻煩了護士幫佢換個手位. 我上網都略略有睇過手腳麻痺都應該係一個正常反應黎o既. 希望爸爸頂得順啦.

便便堆積

昨日早上跟醫生聯絡過後決定今天一早就送爸爸進院, 等醫生直接在醫院替他檢查. 原先細妹已經拎左假陪佢地, 但後來有點擔心應付唔到, 所以最後我都係決定向老闆申請今早遲一點番工. 猶幸我的老闆都很通情達理, 未有多問只係叫我攪掂好晒爸爸o既事先番工. 所以今早7:30我地已到了浸會醫院辦理入院手續, 過程順利, 不過就未能為爸爸book到佢之前prefer的床位.

幫爸爸辦完手續後, 護士跟我們說陳醫生打左電話黎話要爸爸先去照一照片, 佢晏少少會黎睇爸爸. 由於唔知會等幾耐所以最後我就決定先番工, 反正有細妹幫我睇住佢地, 幫手執頭執尾應該無乜大問題了.

就o係我差唔多番到公司時, 我收到細妹來電說醫生已經到訪, 睇左爸爸最新果張照, 話無乜大問題, 只係唔明點解會咁多便便塞住左, 雖然爸爸都已經有得去廁所, 但就仲有好多塞o係腸, 所以醫生話而家會先幫佢通便先, 吊鹽水. 下午4:00左右會再黎睇下爸爸o既情況.

希望真係唔會有太大問題吧. 回想昨晚放工見到爸爸又再可以倚著Sofa看電視, 同我地傾下計咁真係好開心呀. 再諗番前日佢肚痛到不得了, 成個人無晒氣力的樣子真係太可怕, 希望痛症唔好再纏著我爸爸喇.

脆弱

人真的是如此脆弱的嗎? 任憑你往日是何等的強壯, 英勇, 一旦病魔來襲時不消一會你便會被徹底的完全擊倒. 在病魔面前的人是何等的脆弱!!

最近爸爸的病情可說是反覆無常. 當病魔的魔爪稍為放開爸爸的時候, 他總是精神奕奕的,努力練功, 跟大家一起吃飯, 談天說笑, 娛樂一番; 可惜當魔爪再次伸開爸爸的時候, 他就變得如小孩一樣軟弱無助. 由星期日起爸爸的情況就沒有好轉的跡象, 看著他躺在床上瘦弱的身驅, 真的是愛莫能助. 大家都不知該做些什麼幫他減輕痛楚. 安慰的說話也說盡了, 除了叫他加油, 振作外, 還能說些什麼? 看著媽媽著緊的眼神, 心痛的表情, 我又可以做些什麼? 我們當然明白人終歸有離開的一天, 我想期盼的不是要長生不老, 我只是希望爸爸不要受痛症折磨, 我實在不忍心看到現在的他啊, 吃不下, 睡不到, 一點一點的被痛楚折磨著. 我想, 到底爸爸的痛苦可以由我幫他承擔嗎?

今早差不多出門上班時, 媽媽急著說爸爸情況不太理想, 正考慮是否該送他到醫院去, 但爸爸就總說讓他留在家多休息就可以了. 媽媽急得哭了, 但爸爸不想進醫院我們也沒辦法, 而且我跟妹妹也是時候要趕上班, 所以最後我們決定先讓他休息一會, 如晚一點情況依然沒改善的, 我們就會不理他的反對把他強送進院的了. 反正陳醫生明天都會見爸爸的, 早一天入院應該無太大問題的.

唔溝通?

以往屋企比我的感覺是一個放工後relax的地方, 無論在外工作遇到了什麼, 放工回到家都有一種輕鬆的感覺, 但自從爸爸得病後, 屋企比我的感覺好像變了質. 有時什至會覺得氣氛比在公司還要沉重, 壓力也比工作還要大. 我明白咁樣係因為大家都好著緊爸爸的健康, 久而久之, 大家就變得唔識得點樣放鬆自己, 令大家輕鬆面對難題, 有時更會因此令大家o既關係變得緊張, 心情亦隨之變得煩躁.

而家爸爸同媽媽的溝通不知怎的好像一個活火山一樣, 稍有問題立即爆發, 以往雖然都會有咁o既情況, 畢竟兩人一起生活了這麼多個年頭, 拗撬是一定少不免的了. 但最近o既情況好似有點失控了. 兩個也各自有自己o既苦處, 另一半又係唔係可以一定理解到呢?

好似爸爸咁, 佢而家有病, 當然要人照顧, 所有關於佢o既一切我地都好緊張, 但問題就係佢自己有時就好似一d都唔著緊自己咁, 有時食飯叫佢食慢d, 如果有覺得硬o既地方就唔好食, 吐左佢. 佢永遠都唔會話 “OK, 我會睇住” 佢個答案永遠都係 “得咖啦, 我無所謂” 真係皇帝唔急, 太監急. 我地都係唔想佢食到硬野會消化唔到, 影響到自己狀態之嘛, 點解爸爸唔可以好好地配合下, 自己都著緊下自己啦, 唔好成日都好似唔緊唔理咁, 要知道咁o既態度對媽媽黎講係好hurt咖. 你自己唔舒服可以訓下休息下, 我都知你病係好辛苦好唔開心, 但媽媽就要不停咁照顧你, 又要為你準備飯餐, 又要幫你準備所要o既藥物, 又要陪你去覆診, 又要陪你去學氣功, 又要自己一個去街市買餸, 但係佢從來都無怨一句, 累喇都照做, 為o既就係希望爸爸可以keep住healthy o既狀態去打仗, 佢唔係想你有事呀嘛, 佢都係為你好, 點解你唔學下體諒佢呢? 你自己好好保護自己, 勤力少少去練功, 唔好成日駁咀其實已經可以減輕媽媽的擔子了.

當然我唔係因為自己係女所以就只係幫媽媽講好說話, 我都承認有時媽媽o既態度亦係需要改善, 佢的而且確係一個無乜耐性o既人, 而且做事一向都好有原則, 基本上係所有人都要跟佢果套做o既, 但我亦知道佢果套係好少出錯, 只係佢太認真, 對所有野都追求完美的, 對我地一向都係求求其其o既三父女黎講, 佢真係太嚴謹. 咁樣亦令到佢成日都唔放心將d野交低比我地做. 有時我地都希望可以幫輕下佢咖嘛, 所以媽媽你也要學懂放鬆自己啊, 可以的話將更多工作下放比我同細妹啦, 我地雖然未能做到你要求o既水平, 但都會盡力去學去做, 你一日唔放手比機會我地試, 我地一日都唔會識咖. 有時d野真係要撞個板先會學精. 有時間你自己都要好好休息下, 由朝到晚都咁tense對自己都無益處啦.

慶幸自己在面對呢個場面時唔係alone, 我仲有 我o既親密戰友WT & 細妹!!! 多謝兩位o係精神上及分工上都幫左我不少, 否則我真係會受不了!!

做個聽話的父母

昨天爸爸出院了, 放工後馬上趕番屋企, 一見到爸爸就急急問他出院後有無唔妥. 好彩佢都係話只係個人比較累, 可能因為出院後抖左一陣出左去練氣功, 再加上留院多日都係以流質食物為主, 當然氣力就有點唔夠喇. 講講下途中收到陳醫生來電. 其實係當我知道媽媽去到醫院探爸爸時, 醫生已經巡完房走左, 我擔心醫生無將實情講比爸爸聽, 所以情急之下又call醫生. 我都知咁樣都好煩人. 但我真係太緊張又擔心, 希望醫生明白我唔係有意騷擾佢啦. 之後等左一日都無電話我都諗住可能醫生已經開始佢o既長假喇, 多數都無時間覆我. 點知就係當我跟爸爸傾緊計果陣, 陳醫生真係打番比我仲同我講唔好意思, 因為早上實在太忙所以無時間回電. 感謝陳醫生不厭其煩的覆我電話.

我即刻就問醫生今日爸爸出院前照o既X-ray結果係點, 最新情況如何. 陳醫生說爸爸進展唔錯, 出院前所照的片顯示腸道阻塞o既情況正在改善中 所以先批准佢出院休息, 不過醫生亦一再叮囑只能食用低纖食物, 如有出現便秘情況, 記得服用乳果糖, 放鬆心情, 好好休息. 聽完醫生o既吩咐後, 我當然即刻匯報啦. 亦一再強調佢地必須好好的聽從醫生o既指示, 唔好再亂咁黎喇. 因為除左會令爸爸受苦外, 醫生這兩星期正在休假, 有事o既時候雖然已安排了代醫生問診, 但始終最清楚爸爸病情o既唔係代診醫生, 我真係唔想有乜差池. 希望佢地聽聽話話, 好好休息後可以於29號開始新一輪療程啦.

同時亦感謝細妹的努力安排, 爸爸最快星期四開始又可以跟陳師傅練氣功了, 當然亦要多謝陳師傅的問候與鼓勵, 希望o係陳師傅的教導下, 爸爸可以好好學習氣功, 強身健體.

P.S.: WT, 對不起, 昨晚真係掛住匯報而miss左你的sms, 累你在門外悶熱了.

出院順利

今日11:00幾媽媽打比我話爸爸可以出院了. 早上10時30媽媽去到醫院時, 原來醫生剛巡完房走左喇. 不過醫生都有同爸爸講今早照o既最新X-ray報告指還有少量顯形劑留在大腸, 所以臨走時會幫爸爸再瀉多一次先. 之後抖一陣無問題就可以番屋企咖喇. 最終佢地等到11:00幾就有護士同佢地講可以辦出院手續喇.

之後佢地番左屋企休息一會, 我跟細妹就已經打電話回家再三叮囑他倆不要再隨便亂吃東西了, 因為醫生吩咐過爸爸只宜食用低纖的食物, 否則腸道阻塞o既問題就解決不了的. 而我亦都立即上網查看有什麼食物係屬於低纖的, 搵定料幫下媽媽. 另外細妹亦忙於為爸爸報新一輪o既氣功班, 希望佢可以盡快pick up番啦. 在此多謝陳師傅的熱心提點及幫忙. 希望爸爸休息完, 體力恢復後就會勤加練功啦.

好壞參半

昨天依然是朝十晚十的待在醫院陪著爸爸. 早上10時多跟妹妹到了醫院, 和爸爸傾了一陣計就見到醫生巡房, 陳醫生看過當日早上爸爸照的最新X-ray說仍然有點顯形劑留在大腸內, 證明腸道依然有點阻塞, 不過情況未致極差. 但都係覺得爸爸唔可以即時就進行第二個療程, 所以提議爸爸多留院一天, 明日(星期一)早上才讓他回家休息. 而暫定29/07會開始第二個療程, 陳醫生希望多讓爸爸休息兩個星期看看腸道的阻塞會否再有改善. 之後吩咐了爸爸可以改食Soft meal, 即係所有高纖食物都唔食得, 菜, 麥包等等都唔o岩食, 瓜類, 肉類就可以煮到焾 / 爛先食, 三文治都得, 總之就係惡消化的盡量唔好食喇. 之後我等醫生走開後就問醫生其實爸爸現時的真實情況係點, 醫生就話雖然腸道唔係太塞, 但覺得顯形劑的成效不如其預期般理想, 所以都唔可以太心急開始第二輪的療程, 佢希望黎緊呢兩星期爸爸的腸道可以自然調整回正常, 否則佢都唔可以話太樂觀.

醫生離去後, 我地繼續跟爸爸聊天直到媽媽黎到就將醫生所講o既情況轉述一次. 媽媽就立即在想有什麼菜譜可以煮比爸爸食, 我地都叫媽媽現階段只要努力照顧爸爸就得咖喇, 我地o既飯餐我地自己會準備好, 因為我地都唔想佢太操勞. 而媽媽跟爸爸傾傾下又變左好似鬥咀咁, 一個就係緊張大師, 另一個有時又配合唔到, 其實大家都知係互相關心的, 不過大家表現不同, 有時難免就唔o岩key, 我地做女o既就惟有做下和事佬, 希望佢地平心靜氣咁傾, 以免情緒影響到病情嘛. 無幾耐WT都黎到喇, 佢仲比安排左去畔溪搵定位等我地去食lunch添, 真係麻煩晒呀. 我地食完午飯後, 媽媽就先行回家幫爸爸準備飯餐 (原來佢番去整左三文治同埋煲左粥), 我地三個就番上房繼續陪住爸爸傾下計, 期間爸爸除左講佢以往工作時的趣事外, 講得最多o既就係有關我地一齊去旅行o既事. 聽得出爸爸對一家人可以一齊四周圍去玩係幾咁享受, 亦好高興我地有咁值得回味o既家族旅行, 但同時亦好怕呢d機會會變得愈來愈少, 當然睇番轉頭係無乜意思, 我將會更努力去計劃下一次咁樣先會令自己唔會有後悔同遺憾.

約莫4:30左右媽媽再次黎到病房, 而我地都去左canteen買左tea上房同爸爸一齊開餐. 嘆完個Tea後, 媽媽又再次出發跟妹妹一齊番屋企打點一切. 而我就繼續跟WT留守o係醫院陪爸爸, 可憐WT這個週末就要這樣過了. 不過真的很感激WT不怕悶的陪我 / 陪我爸爸. 到左6:30妹妹來電說我地會相約於又一城等候吃過晚飯才到醫院. 而我就在出發前將媽媽之前預備好的粥倒出給爸爸食, 然後再跟WT行去又一城, 跟媽媽及妹妹於Food court食完晚餐後再步行回醫院, 陪爸爸看看電視後又差不多夠鐘要回家了.

今早媽媽跟我們一樣時間起床又忙於為爸爸準備早餐, 現在相信她也差不多到達醫院的了, 唔知今早醫生會跟他們講d乜野呢? 唔知佢兩個自己攪唔攪得掂出院呢? 可惜今早我要番工幫唔到手啦. 希望無大問題出現就好喇. 爸爸快d番屋企好好休息, 希望腸道會自然開通番吧, 我都希望爸爸可以快點接受第二輪的療程, 期間亦希望爸爸可以有體力應付到氣功的練習. 爸爸你一定要振作啊.

稍有進展

昨晚雷雨交加的, 實在未能好好的休息, 不過不知為何今早9時多起床精神還算不錯的. 立即梳洗換衣服就出門去醫院找爸爸了, 到步時9:45分, 爸爸不在病床, 起初還以為他到了洗手間, 點知後來發現原來爸爸已經在8點幾就被安排到了樓下做顯形劑及照X-ray了, 之後約11時左右爸爸回來了. 看見他精神還算不錯的. 只是太早被吵醒後有點累想訓覺. 他跟我們說做顯形劑的醫生跟他說效果不俗. 據爸爸說醫生先由胃喉把顯形劑注入, 之後爸爸都感覺得到顯形劑在體內流走的情況, 他說有點mint的味道的. 落到大腸後醫生就開始在不同時段例如15分鐘, 30分鐘這樣以唔同的角度照了多張X-ray用以顯示腸道有無阻塞的情況. 爸爸說那位負責的醫生說效果看來不錯, 起碼唔覺顯形劑在某個位置塞住通唔到. 當然詳細情況還得待報告ready後由陳醫生看過才可跟我們說.

而最後陳醫生就大約於1:15分來巡房, 問了爸爸的情況後說看來今次用顯形劑的效果都算幾好, 因為顯形劑係比較濃的, 所以醫生係想因此將腸道迫開, 希望唔會再塞. 而暫時看來情況都令佢幾滿意的. 不過還得等晚一點有正式報告出左先可以再講清楚一d. 在聽完醫生的Briefing後, 他倆才有點心機, 媽媽就跟我地先去畔溪醫肚, 而爸爸就會稍事休息一會. 之後我地食完午飯就番上去陪爸爸. 媽媽就先行回家打點打點, 並順便煲定少少粥水, 因為醫生說如情況OK, 會安排爸爸今天轉點吃點流質食物.

我, WT跟細妹就一直在病床陪著爸爸, 跟他傾下計, 講下笑, 有時見到佢攰就比佢休息下先. 不經不覺又到了6時多, 媽媽帶著粥水回來了. 等到7點多我地就決定問問姑娘報告番左未, 姑娘話報告就番左, 不過唔知陳醫生幾時黎睇. 於是我地就call左醫生話佢知報告已經ready喇. 之後就跟媽媽先行到canteen吃dinner. 點知就當我地order完, 差不多可以起筷之時, 爸爸打電話比我話剛剛護士幫他換了床頭的instruction, 說可以食流質食物了. 媽媽當然立即就趕番上房將準備好的粥水交給爸爸啦. 因為我地想爸爸早點試食, 如果有什麼問題待會都可以通知陳醫生. Settle左爸爸後, 我地又番落去canteen繼續我地o既dinner, 之後番上去就一直等陳醫生到訪, 但一等就等到差唔多9:45了, 於是我跟WT都覺得應該再問問姑娘究竟今晚陳醫生還會來巡房嗎?

擾攘一番後得知原來醫生今晚不來了, 那位護士還叫我不用急, 報告可待明天陳醫生來到時再跟我們說, 但我當然唔死心啦, 我等了一晚就係想知道究竟爸爸的情況怎樣嘛, 這時就有一位高級的護士拯救了我. 當佢知道我咁心急後都好諒解的替我看看爸爸的報告, 當然她也一再重申她不是醫生, 所講的都只係暫時照報告的字面解釋大概情況, 詳細的還得等醫生說明方能作準. 不過咁樣做已替這個心急如焚的我舒緩不少了.

WT跟我就靜心地等著她先閱讀一次報告內容, 之後她說個報告都算理想, 否則都唔會決定比爸爸轉食流質食物啦. 所以都算一個good news咖, 如果明天陳醫生黎到再睇多次見到爸爸今晚試過流質食物後無特別問題出現的話就肯定係一個good news啦. 聽完這位護士的說話後, 我個心當下定了不少. 無論要我等多久, 她這幾句話都是完全值得的. 於是我立即將所聽到的轉告他們, 看到他們的面上都好像鬆了一口氣的, 呢個時刻真係好難忘呀.

由於時間都不早了, 為了不妨礙其他院友休息, 我們還是先行回家了. 明早依然會晨早到醫院陪爸爸並等陳醫生跟我們詳述報告內容, 希望真的能平安無事, 一切順利吧.

在此感謝WT就這樣跟我待在醫院一天了.

未如理想

今天一邊工作一邊等媽媽給我來電報告老爸的最新狀況, 不過媽媽卻只打了一通電話給我, 跟我說爸爸還是會痛, 今天有點累, 很多時都在假寐. 心念著爸爸的我, 放工後用九秒九的速度離開公司, 快快的趕到醫院看看老爸.

上到病房看到正在閉目養神的爸爸, 看來有點消瘦了. 再看看媽媽, 就見到一對明顯不知哭了多少遍的眼睛. 不過見我來到就強裝精神的. 跟爸爸談了一會, 知道爸爸的肚還是會痛, 昨晚也一定要打止痛針才能入睡. 老爸, 我真的不想見你受苦啊. 希望捱過呢關後, 你會慢慢好轉過來. 之後WT跟細妹都相繼到步了. 大家傾傾講講的等到約8:30左右陳醫生來巡房了, 他在幫老爸檢查時說老爸的腸好像還有一點脹的, 所以打算用少少瀉劑幫爸爸通一通, 看看效果如何. 並提議明天再試另一個方法將顯形劑打給爸爸, 希望有作用可以將腸打通.

之後我再趁醫生準備離開時又捉著他講幾句, 今次醫生就跟我說實話了, 他說老爸的腸完全沒有通, 看來情況不太理想, 佢希望明天試做顯形劑及今晚用完瀉劑會盡量幫到他的腸道開通, 否則明天就不能落藥的了. 說真的, 雖然我也有預計情況可能係唔理想, 但硬刺刺的聽到由專業的醫生口中說出這個殘忍的事實時, 我真的有點受不了.

另外今天跟妹妹傾計時發現妹妹比我想像中成熟, 佢都已經作好壞打算, 起碼有左心理準備, 對於bad news會接受消化到.

不過為免大家擔心, 我還以強裝若無其事的回到床邊, 跟他們講這講那的. 之後我地就先行到樓下canteen吃點東西後又再趕回病房陪著爸爸. 而在我們到canteen醫肚時, 原來爸爸已被落了瀉劑, 所以當我地番上房一會後, 爸爸就預備好要到洗手間了, 看來輕瀉過後爸爸又好像舒服了一點. 之後我地幫爸爸再打點好一切又差不多時間要離開了. 臨走時爸爸還跟我們每個人都做了一次give me five添呀.

明早我地都會早點到醫院睇爸爸, 醫生就話多數會10點至1點時到來看看他的最新情況. 老爸, 今晚好好休息為明天加油啊. 就算明天真的打唔到新藥都唔好灰心呀. 我地仲有機會咖, 等身體好番d時醫生會盡快為你安排咖喇. 唔好諗太多, 唔好煩太多. 專心的養好身子.

面對現實

昨天終於都是他倆要面對殘酷現實的一天了. 早上我先行到酒樓開定茶, 心諗先跟他們食過午飯 , 之後再跟他們一起到醫務所見醫生. 等了個多小時後見到媽媽到步, 但爸爸呢? 一問之下才知原來爸爸的肚還是在脹痛, 所以唔會上黎飲茶了. 在席間媽媽就跟我訴訴苦. 我也知這段期間媽媽也很累很辛苦的了. 每天都想著該弄些什麼給爸爸吃, 比爸爸早起預備定每日的藥物, 定時提醒爸爸服藥, 除了要照顧爸爸外, 還有家中那些常做的家務, 媽媽一天到晚也實在累得不可開交了. 況且有時病人的情緒起伏較大, 媽媽間中也兼任了爸爸的出氣袋. 所以難得有機會讓我跟她坐下來單獨共處, 就當然係比時間她好好的把悶氣發洩一下吧.

於是我地兩個飲完茶後就回家看看爸爸的情況再準備出發到醫務所, 回到家後, 爸爸的情況不是有太大改善, 肚還是痛, 沒太大胃口, 只是勉強食了幾口飽食過藥就準備出發了. 去到醫務所後我地就坐定定等醫生應診, 期間爸爸的狀態就一時好一時壞的, 看到他辛苦的樣子心裡真的很不好受啊. 終於我們由2:15等到3:15先輪到我地入內見醫生.

見醫生首先就係問下而家o既狀況啦, 咁爸爸就如實講出佢有乜野唔妥之處, 跟手醫生就幫爸爸檢查一下身體, 聽到醫生說 “唔, 唔, 個肺好清, 個肚都唔係實o既” 媽媽就好緊張咁坐o係我隔離偷聽住醫生跟爸爸o既對話. 之後就入正題喇. 醫生講左話上一次用o既藥對佢好似無預期中咁好o既反應, 不過可幸的是主瘤並無長大, 只係擴散的地方好像多了點, 主要係跟腹膜走. 而家最壞o既情況係如果條腸太塞就會影響下一個療程o既開始. 所以佢提議爸爸入院兩三天, 吊鹽水, 吊營養奶, 乜都唔好食, 等條腸自然暢通番先, 如果效果理想將會盡快安排開始注射第二種針藥, 今次係屬於標把治療法. 醫生話費用當然會較高. 佢亦都講明大家都係普通市民, 佢唔贊成我地成個療程都跟佢做, 所以佢會先幫我地試藥兩三次, 如果效果顯著理想的, 佢會寫紙比我地番公家醫院再繼續打針, 覆診就由番佢親自處理. 而醫生交待個具體情況後就先行使開了兩老, 剩下我跟醫生多談一會.

在此我真的要很感謝陳醫生的諒解與幫忙. 我相信若非醫生早兩三天前已通風報訊的話, 昨天當我聽報告時, 我一定會被嚇得不懂面對. 很感謝陳醫生幫忙避重就輕的向兩老講述報告內容, 雖然我也明白佢地約莫都了解到事情進展並未如想像中理想, 但最少他們會覺得係有希望的. 我就係想佢地依然有呢個信念, 否則我敢寫包單他倆一定捱不過去的. 我亦趁跟醫生單對單會談時將我o既顧慮 / 疑問一一向醫生說明了, 而醫生也相當有耐性的跟我講清楚現階段的情況. 真的很感謝陳醫生及趙姑娘的安慰.

而今次會診後的行動就係盡快安排了爸爸入院接受舒緩腸塞的問題, 而在趙姑娘的快速行動下, 爸爸昨天4:00多便已順利入住了浸會醫院了. 很高興今次安排的房間床位也很滿意, 起碼老爸應該可以好好的休養一下吧. 在等爸爸問診安排床位時, 剩下我跟媽媽獨處, 她便立即把握機會問我醫生係唔係有些什麼特別事跟我說了而瞞著他倆的. 我當然否認說不要多心吧, 醫生只係向我解釋點解要轉藥同埋點解腸塞會影響用藥吧. 醫生既然說可以把握時間轉藥的話就代表還是有希望的. 醫生說我們現在要做的就是好好的放鬆心情, 不要被情緒影響到病情. 雖然我知她對我所講o既一切都係半信半疑的. 但我也不理這麼多了, 如果隱瞞著他倆會令事情進行得順利點, 那就算我不孝吧, 我是一定不會一五一十的把醫生所講的轉告他們的.

終於在5時多爸爸換好衣服可以稍事休息了, 在此也得多謝醫院內的姑娘替我爸爸拿來了足夠的毛毯保暖. 而我就聽從媽媽的吩咐來回家中跟醫院把爸爸的日常用品帶來備用. 跟住7時多WT放工後也趕到醫院來了. 有他在身邊心裡好像踏實多了. 而爸爸在我來回屋企期間已被安排了到樓下照了X-Ray, 之後姑娘已替他打了止嘔針, 並接駁好營養奶了. 媽媽則在床邊牽著爸爸的手, 休息一下. 到約莫8時多妹妹也到了, 那時爸爸的精神已明顯比前好多了. 9時半左右陳醫生來巡房時順道拿來爸爸下午時在醫院所照的X-ray片. 然後跟我們說 “你張片都真係幾有趣” 我問醫生 “有趣? 咁笑唔得得出?” 醫生說應該都可以o既, 因為張片顯示條腸塞o既情況並唔係太嚴重, 反而個胃唔知點解有個氣泡, 我提議你插胃喉將呢個氣泡放出, 咁你會即時爽好多.” 我地當然贊成啦, 雖然知道插果下會幾辛苦, 但如果可以等爸爸之後舒服番的話, 我相信爸爸也很樂意照做吧. 之後我再把握機會捉著醫生問問爸爸的情況, 醫生說星期六會再照一次決定他是否適合用藥, 如果理想的話會立即開始新藥, 因為陳醫生下星期放大假兩星期, 所以期間會轉介我們到佢同事的診所繼續接受療程及診症. 我當然希望老爸星期六的報告理想可以快一點試新藥亦更希望新藥真的可以改善到爸爸的病情.

就在醫生巡房過後, 我地就暫時比爸爸一個人休息一會, 先行到樓下的canteen 醫醫肚. 食飽飽後媽媽先行上房睇睇爸爸, 剩下我, WT跟細妹時我就將醫生的說話跟妹妹略略的說明, 妹妹也知道我其實會隱瞞著一些事實, 不過具體上她也意會到爸爸現在的情況, 她也會明白我唔講出全部真相的目的何在. 就係咁我地三個閒談一會後也馬上折返病房, 當時見到爸爸已經插好胃喉把氣慢慢的抽出. 可能心情好了一點, 這時的爸爸也可跟我們講下笑. 氣氛輕鬆了不少. 但畢竟爸爸也被痛症折騰了一天, 見他有點累了, 所以我地多留一會後都起程回家. 希望爸爸可以好好的休息一晚, 明天能精神奕奕的等我們放工後的探訪吧.

在此除了感謝一眾醫護人員的幫忙外, 還要多謝身邊的WT跟細妹作為我的戰友, 也要感謝媽媽的辛勞, 當然爸爸的意志也要加許一番. 另外各位網友的留言祝福, 鼓勵與問候也一一收下了, 感謝大家對我們一家人的支持啊.

我該怎樣做?

昨天臨放工之時收到Dr. Chan診所的來電. 其實係老爸於上星期日時肚子脹痛比前厲害了. 整天都看著他很辛苦的樣子, 但我們又什麼都做不到, 只是可以不停予以問候.

其實醫生幫他安排了星期一(7月7號)早上會去做多次CT的, 看看經過一個療程後之進度如何才決定下一步怎樣做. 所以爸爸好擔心自己肚痛的情況會影響到星期一scanning, 例如要改期等等.

終於星期一早上順利進行了CT, 不過由於爸爸的肚痛情況沒有什麼改善, 所以最終在媽媽力勸之下還是要見一見Dr. Chan. 而Dr. Chan亦都對爸爸呢個情況有點在意, 立即就打電話到醫院看看能否提早知道報告, 但由於scanning係早上才做完, 無論點快都無可能下午就有結果, 所以最後醫生就先開左一d比較強力o既止痛藥比爸爸, 並答應報告一ready就會致電我地.

昨天(星期二), 我等了一天都未有收到醫生o既來電, 心想可能報告未番又或者報告無乜特別事, 可以留待星期四覆診時再說吧. 誰不知就在我差唔多收工之時我收到診所的來電, 姑娘跟我說 醫生已看過爸爸的報告了, 但說情況不太理想, 詳情會待星期四跟他們見面再傾. 當我一聽到情況不理想時, 我個腦其實已經空白一片了. 回過神後就問姑娘知唔知醫生所講o既唔理想係乜野意思呢? 姑娘卻說醫生沒有具體交待, 只叫佢先打電話跟我聯絡. 於是我請姑娘幫忙叫醫生睇完症後抽點時間直接打比我. 而醫生真的很快就回電, 跟我講出以下o既情況:

醫生說報告顯示爸爸完成了這個第一round 的療程後沒有什麼大進展, 雖然主瘤並沒有長大, 但可見之前擴散的地方範圍加大了, 咁樣亦同時解釋了為什麼爸爸會有肚脹肚痛o既情況, 係因為他的腸有點塞了, 那些壞份子黏著了腸衣, 所以當腸道一塞時爸爸就會痛, 而當腸一通番, 爸爸就會覺得舒服d. 而咁樣亦令到佢肚內有點積水. 醫生說其實第一round的療程佢已經用上了佢所知的第一線最好o既藥物. 如果而家反應不理想的話, 即使再試用第二線藥物, 都唔會扭轉到個病情的, 除非真的有奇蹟出現. 佢叫我地要有準備. 聽到呢度, 我真係唔知有乜反應. 我惟有問醫生最壞的情況係點樣. 醫生說情況有兩種就係

(1) 試用第二線藥物, 希望盡量幫佢延長爸爸的生存, 不過醫生亦說即使說盡量延長所講o既都幾個月的時間!!!

(2) 若未能及時開始第二round的療程之餘再有併發症出現, 例如腸管塞了, 那就頂多只能多留幾星期!

現在一切都取決於星期四他們跟Dr. Chan見面臨床時爸爸的表現, 如腸 / 肚谷的情況唔嚴重的話就會立即開始第二round的療程.

之後我再問醫生而家我其實係咪應該將呢個消息保密, 以免呢兩三天影響到兩老的心情. 醫生說 無錯, 而家就惟有等我頂住先, 雖然佢跟兩老唔係相識很久, 但都很清楚佢兩個o既作風, 就係情緒絕對會影響病情的一種人, 醫生會擔心如果我跟佢地講出以上的情況時, 會嚴重影響爸爸o既病情, 咁佢星期四見醫生時就極有可能不可以開始第二round 的療程了. 所以醫生叫我暫時忍住, 等星期四見面時佢會再向兩老交待清楚. 而醫生亦講左我知佢會點樣向兩老交待報告, 佢都會避重就輕咁講, 但當然一切都視乎當日爸爸o既狀況, 醫生也不可以太過隱瞞事實吧.

跟醫生通電後, 我就即刻打電話通知WT, 一聽到WT的聲音, 我o既淚水已經不受控制了. 將情況一五一十的跟WT說明了, 大家其實真的很不好受. 我相信爸爸雖然跟WT沒有什麼親戚關係, 但大家相識相處了7至8年, WT也一直很尊重爸爸的, 相信呢個消息對WT來說也真的太heavy了. 但很抱歉我實在不知該如何辦…. 我有想過跟妹妹說, 但坦白講我真的怕她回家後見到兩老會忍唔住, 所以最後決定連妹妹也不多講, 一切待星期四覆診後的情況而定, 我會慢慢向妹妹透露實情的.

放工後在車上想著種種, 心情真的不能平復. 下車後見到WT來接我, 當WT一拖著我時, 很不中用的我, 眼淚已想奪眶而出了. 不過我一定要忍住, 我唔想番到屋企比兩老察覺到我神色有異, 我真的不能讓他們擔心的. 回到家後看到媽媽的笑臉, 令我更加知道絕對唔可以o係現階段跟他們說些影響他們心情的事. 一直忍著到洗澡時一次過在洗手間就哭過痛快吧. 平復後才敢走到客廳跟爸爸聊聊天. 爸爸今天的氣色不錯啊, 有講有笑的一餐晚飯我最喜歡!

不過我哭過後的神態看來未能瞞過細妹, 她再三問我係唔係有乜特別事, 不過我都只係推說累, 想睡覺. 我實在不忍心睇到佢傷心. 現在就只可麻煩WT跟我一起承擔著這個壞消息吧.

明天就係佢地去見Dr. Chan聽報告的日子了, 我一早已請定假跟他們一起的, 原先的我想著的是如何跟他們在聽完報告後好好的去食個午飯, 開開心心的盤算一下爸爸情況好轉後去邊度旅行散散心的. 可是現在要面對的卻是我該怎樣跟他們一起接受壞消息的宣佈. 實在不敢想像見完醫生後我還有能力看護著他倆嗎?

爸爸化療第6針無事終了

食lunch期間收到爸爸來電話今日3個cycle的最後一針已順利完成, 番左屋企休息喇. 而家下一步要做o既就係會於7月7日(星期一)去做一次正電子發射層析掃描　Positron Emission Tomography，簡稱PET Scan. 希望一切順利啦.

振奮好消息

昨天係我因拔智慧齒後所放的最後一天病假, 碰巧又係爸爸再去中醫覆診之日, 我當然會陪住佢地一齊啦. 是次見中醫師主要都係問症同埋比左張新照o既X-Ray比黃醫師睇, 希望黃醫師可以開一d合適o既中藥比爸爸解決便便o既問題. 今次醫師開左8劑藥比我地, 下次覆診時間係7月2日. 即爸爸打完最後一個cycle最後一支化療針後的第3天. 完成最後呢個cycle後, 醫生提議爸爸再做一次檢查, 睇睇醫療進度如何再決定下一步點做.

而其實上次見醫生打第5針前一天都已經抽過血去驗癌指數的. 打針那天報告未番, 所以醫生話要等到今個星期一(即昨天)先可以通知我地個結果. 就o係我地睇完中醫搭巴士番屋企途中我就收到診所o既來電! 接電話果刻.....真係超緊張呀. 幸好趙姑娘帶比我地一家人o既係一個好消息, 報告話爸爸抽血驗到o既癌指數係21.2, 較前一次4月尾所驗到o既63低左呀. 聽完後當然第一時間通知細妹啦, WT啦同埋兩老. 大家都好開心好欣慰呀. 總算暫時有點起色, 相信爸爸o既信心都會再強d.

o係呢度真係要衷心感謝以下所有單位 (排名不分先後):

* 觀音娘娘的保祐 * 媽媽的悉心照顧 * 爸爸自己的努力 * 家人的支持 / 幫忙 * WT的神秘馬士基力量 * 茶客張先生一家的熱心幫助 * 各blog友的熱情鼓勵與支持 * 各醫護人員 / 氣功師傅的教導, 診斷, 醫治

中西合壁

星期一(6月16號)下晝爸爸開始中西合壁的療程, 多謝張先生的幫助, 爸爸比預期快開始可以接受到黃基恩醫師的診療. 當日我陪佢地兩個一齊去睇黃醫師, 將爸爸o既病情, 身體狀況一五一十咁向醫師匯報, 而黃醫師也很用心的將所有資料記錄在案, 之後開左6劑藥比我地. 叫我地下星期一再番去覆診.

而爸爸服用過黃醫師的藥後第一天的確通便有所改善了. 不過到左星期三開始, 爸爸又再有谷肚o既情況, 而且令佢無胃口食飯. 媽媽見到當然非常擔心啦. 因此最後我同細妹決定都係應該打電話問問醫生o既意見, 結果醫生話可以試下比兩粒panadol佢食, 希望有助暫時舒緩痛症. 而亦同時安排星期四下晝去見一見佢.

而星期四見醫生後, 安排了照一照X-Ray, 跟住就開左一種乳果糖, 同埋止痛藥比爸爸. 星期五就會打化療喇.

到左今日又係時候要去打第五次o既化療喇. 爸爸早上仍有點不適, 而可能因為有點悶氣啦, 爸爸跟媽媽又有點意見不合, 我就惟有盡量勸完一個又一個, 希望佢地可以冷靜d, 因為太勞氣對大家都無幫助咖嘛. 大約11點鐘我地上到診所喇, 等左一陣醫生番左黎就先替爸爸檢查一下肚谷o既情況, 而X-Ray片亦顯示到爸爸腸內的話有很多便便積存, 所以佢會有肚痛o既情況出現. 醫生就話會開定一樽比病人排便o既藥水比佢, 過左兩三日後可以食一次, 希望一次過幫佢排清入面積存o既便便, 咁佢就會舒服d喇. 不過我地之後覺得如果爸爸之後呢幾日自行排便OK的話, 我地未必會比佢食果樽洗腸藥, 因為始終天然咁排便總好過靠食藥嘛, 不過一切都要視乎老爸o既情況啦.

陪完佢地打針後我地都番左屋企休息喇, 因為我都要為晏少少o既智慧齒手術準備下, 稍事休息一下先再出發喇.

希望爸爸快d無事啦, 睇到佢咁辛苦但又幫唔到佢, 我都覺得會好大壓力, 媽媽當然唔使講就仲大壓力啦, 因為真係唔知點樣先會令佢舒服d, 又擔心佢無胃口食野的話對身體唔好. 不過而家有晒中, 西醫, 又上埋氣功咁, 我相信爸爸一定會慢慢康復過來的, 加油啊!

老爸初學氣功

話說老爸得病後得到茶客張先生一家人的幫忙, 提供了很多有用的資訊我們作參考, 而且還很熱心的跟老爸他們相約一起去見中醫, 雖然現在那位中醫仍未答應會收老爸這個新症, 但都要多謝張先生一家人的熱心協助. 而我地之前亦從張先生處得知癌協有提供一些健體課程給患病人士的, 當中張先生說他也正在學郭林氣功, 而且說現任的導師陳秀坤師傅是很有名氣的, 很多病友也說師傅教得好, 幫到不少病友調理好身體的. 於是我亦第一時間想幫老爸報名, 誰知那時其實所有氣功班都額滿截止了. 好在有一位好心的癌協義工說幫我的老爸先留名在waiting list, 如果有空缺的話會安排補上. 我當然立即說好. 其實報名時已知這是6月期的最後一班, 預定6月17日上堂的. 職員說有可能在上堂前一兩天才會通知我們後補成功的, 我們當然沒有問題吧, 只要有得上就是了.

結果在10號那天晚上收到癌協來電說有後補位置, 不過課堂時間改為12號(即本星期四), 我們當然亦沒問題, 大家都很高興的知道老爸趕得及上由陳師傅教授的氣功班! 之後跟張先生他們談起才知道原來這次課堂會是陳師傅最後一次在癌協授課了, 原因是癌協換了新主席, 所以會有一連串新活動課程安排, 而且亦聽說他們是用一個根本不成理由的借口把陳師傅辭退的! 最大的問題是有一個叫"查功"的課堂也將會在6月後取消了. 查功其實是給所有學過郭林氣功的學員一個機會問老師問題, 由老師提點指導一下姿勢的, 現在沒有了查功班, 那老爸學完後又有誰可以跟進呢? 最離譜的是當我打去癌協時, 他們說陳師傅在教完6月的課堂後, 他們會連氣功班也一併取消! 那以後想學的患病者怎麼辦? 現在不是師傅說不教啊, 而是新上場的主席單方面硬要將對病者有益的活動取消. 這個決定真的豈有此理, 完全沒有顧及其他人有需要人士的情況. 實在太過份了.

雖說我的老爸有幸趕及上陳師傅的最後課堂, 但對癌協這種不負責任的行動也實在是不吐不快的!!!

Delay的第4針無事終了

剛剛收到老爸來電話delay後的第4針已經無事終了. 下次將會係20號再打第五支.

由爸爸開始打化療針以黎, 我地一家人一直都好支持佢, 尤其係媽媽更加出盡力咁去幫佢調理好個身體, 知道有乜o岩食, 有乜食材對佢有幫助o既都即刻整, 目的就係要爸爸keep住一個最Fit o既狀態去接受治療. 但需知呢d化療針o既副作用都不少, 有時真係未必次次都係同一症狀. 所以我地係極需老爸o既協助將自己o既身體狀況如實地報告比我地知. 可惜有時老爸就係好似怕我地太擔心咁, 又好驚講左出黎後醫生會delay佢o既針期, 硬係有時唔肯講老實說話. 又或者係將實際情況講得太輕率. 而家唔係小病呀嘛, 身體上每一個反應不論大小都會對病情或治療有一定程度o既影響.

所以老爸呀, 你要聽話啊, 乖乖的將實情相告, 只有咁我地/醫生先可以盡力幫你咖. 你千祈唔好浪費晒媽媽對你o既一片苦心啊. 我知有時媽媽或者我地o既反應係大左d, 但我地其實都係想你好先會有咁o既reaction. 希望你明白啦. 老爸, 好好的注意自己身體狀況, 多點休息, 做適量運動, 跟我們好好的溝通, 我相信你一定可以捱得過, 打贏呢場仗o既.

o係呢度我亦都要多謝媽媽在這段期間不停地為我們好好的照顧著爸爸. 辛苦你了.

第三針無事終了

剛收到爸爸的來電說第三針已經完成了, 好野呀. 身體無乜大礙喇. 由於報告表現幾好, 所以黎緊定左下星期五會打第四針咖喇. 希望老爸keep住呢個狀態, 努力呀.

第二針無事終了

Yeah, 午飯時間接到爸爸來電說今天第二次的滴針已經無事終了. 佢地都番左屋企食午飯同休息一下. 話說今早滴針前的驗血報告很理想. 連醫生都讚他們"谷"得唔錯. 如果成日都keep到咁o既狀態就相當唔錯咖喇. 不過我知今次滴針後, 老爸應該又會有幾天出現反應而身體不適的了. 但係我地會盡一齊方法務求令老爸有足夠營養的. 老爸加油啊!

第二針延期

剛剛於午飯時間收到媽媽來電告知原定老爸今天打第二支化療針一事已經取消, 改為5月14日再打. 原因係今早打針前的驗血結果顯示老爸的營養不足, 中性白血球的讀數不合格, 醫生認為不宜今天打針. 所以就決定改到下星期先打.

而家要做o既當然就係要令老爸食番多d野, 等佢營養好番d啦. 其實而家老爸o既飲食都算唔錯, 幾健康咖. 不過佢自己就有d怕食肉, 有時我地都叫佢要食番多d紅肉, 但佢可能有點心理障礙, 好多時食左一兩件已經話夠兼太多. 主力都係食菜 + 魚. 而家結果就比醫生話唔夠營養喇. 希望佢聽完醫生所講之後會肯食番多d野啦. 雖然要戒口但都唔好太過份呀嘛.

另外媽媽亦趁機問下醫生老爸o岩唔o岩食一種由朋友介紹買比老爸食o既營養素 Oral Impact (速癒素). 醫生睇過後話老爸可以食呢種營養素, 不過就叫佢唔好一次一包咁, 最多一次食半包好喇, 因為怕佢食一包的話會太飽食唔落正餐.

就係咁, 兩老下一個節目就係去嘆番啖茶先. 老爸你要聽話呀, 食番多d野先夠體力咖.

打仗

今日老爸正式開始接受化療的醫治. 之前到QE聽取報告後, 佢地決定再多看一位私家醫生的意見, 而呢位私家醫生係一位茶客介紹的, 而這位茶客亦剛於最近從癌病中康復過來. 而聽取過呢位私家醫生的意見及經大家商議後, 我地決定要比最好o既醫治給老爸, 盡管醫療費用較公家的貴了一倍, 但我地覺得係值得o既, 因為醫生已表明會給一些好藥比老爸, 將副作用降至最低, 咁樣老爸o係治療過程中就不用受太多苦了. 而且經私家醫生醫治的好處係唔需要佢地兩老再咁奔波的走到QE又要花時間輪侯應診, 咁樣對佢地黎講精神負擔都會輕d. 加上環境又理想d, 我諗對老爸的病情都會有點幫助.

其實在決定接受公家還是私家的治療時, 老爸是有所顧慮的, 佢係極度唔想屋企人為佢花費太多, o係佢心目中好好照顧屋企人一向都係佢o既大前提. 佢永遠都係想將最好o既比屋企人, 而家要用貴一倍的價錢去醫病, 令佢覺得自己好似將屋企人的金錢都花去不少, 佢好擔心會影響到屋企人o既生活質素. 但站在我地o既立場, 有乜野會比老爸的健康更重要呢? 只要老爸可以o係一個理想o既環境下, 舒適地接受治療, 其他野對我地黎講都唔重要. 能力負擔到的, 我地都一定會盡力協助. 所以老爸啊, 真的不要想太多了. 我地只想你再次健健康康! 在此希望老爸唔好再諗太多, 專心醫治, 好好的調理身體! 老爸你一定要打贏呢場仗啊!

下午2時更新: 大約1:30接到老爸電話, 佢已經番左屋企休息喇. 媽媽正在為他準備午餐, 而第二場仗將訂於5月9號再展開. 老爸, 你要好好地休息一下, 為第二場勝仗作好準備!

打擊

今日終於都到了老爸聽報告的大日子. 可惜我地接到o既並唔係我一直期待出現o既好消息!!!

今日我地如常9:45已到醫院等候, 一直到11:15才開始叫名見醫生. 我地係第一組o既. 入到去後醫生已好直接講明上次抽取組織後化驗結果發現係該腫瘤係屬於有毒性o既, 簡單d講就係cancer. 聽到醫生咁講之時, 我其實個腦係完全空白晒.

之後醫生話暫時佢地呢邊係講唔出源頭o係邊, 只可以話今次佢地發現o既地方係屬於擴散出黎o既受影響位置, 換言之要等到今個星期五再去睇腫瘤專科, 果邊o既病理組醫生應該可以有更進一步o既資料提供到. 到時佢地會提議療程如何, 用乜野藥等等. 跟住老爸再問醫生其實而家係屬於邊一期o既cancer, 醫生亦坦白講醫學上而言其實已屬第4期. 不過佢同時都講明唔好比呢個期數嚇親, 有好多病例係去到呢期只要配合有適當o既療程的話, 係有機會康復番o既. 好彩o既醫生亦都講明老爸病程惡化度係比佢預期o既要慢好多. 即係話情況唔係最差, 我地依然有機會對付佢.

就係咁報告就聽完喇, 奇蹟並沒有出現. 而家我地要面對o既係點樣對症下藥, 好好的照顧爸爸, 等佢有足夠力量去接受未來o既一連串療程, 雖知呢段時間老爸可能會比較辛苦, 但希望老爸可以支持落去, 捱過呢關, 身體就可以慢慢康復過來!

大日子

明天又到了老爸聽報告的大日子了. 今次我想不論好壞都應該會有個Final answer咖喇. 所以心情倍感緊張. 希望聽日有好消息跟大家分享吧. 明天我一樣請左假陪兩老一齊去聽報告的, 雖然我未必可以幫得上忙, 但多一個人跟他們一起去迎接一個未知的結果, 我想會令他們心裡踏實一點吧!

老爸出院了

經過3天的留院後, 昨晚醫生通知我地老爸今日可以出院了, 媽媽昨晚已開始幫老爸執拾行裝, 諗住今日出院就唔使拎太多野喇嘛.

點知我今早打比佢以為佢地走得之時, 醫生又話老爸血壓高左, 要再多留一會再check清楚先可以放人. 個心當下一沉, 有d擔心老爸的狀況. 好彩後來4時多媽媽打比我話老爸出院喇. 而家會去排期覆診.

4月22號我地就會知Final Result喇, 今次應該無論好壞都會知道喇. 當然我依然希望係一個好消息啦.

手術無事終了

昨天老爸又順利過了一關, 手術無事終了.

不過手術後就曾發生驚險事件, 事緣老爸稍事休息左兩個鐘後想去一去洗手間, 佢問其中一位nurse, 咁回覆係佢可以自行落床去洗手間, 咁o岩果陣細妹跟媽咪去到醫院探佢, 點知唔見左佢o係床, 等左15分鐘都唔見佢番黎, 於是問姑娘, 點知呢個時候有一位姑娘就話 "果位病人今日o岩o岩做完全身麻醉, 點可以自己落床咖?" 於是走去搵佢啦, 結果o係洗手間搵番老爸, 但果陣佢已經半暈狀態, 要即刻wheel chair咁番出黎, 細妹話見到老爸面色青晒, 眼睛緊閉, 真係比佢嚇親咖. 好彩當時媽媽o係外面等緊, 如果比佢見到老爸咁樣, 肯定受不了.

之後老爸上番床休息一陣後面色轉好, 不過由於血壓偏低, 所以精神都唔係太好. 於是佢地兩個就等老爸再抖多陣先比野佢食, 點知d姑娘又係咁叫媽媽離開病房, 夠鐘先比佢地入去, 但眼見老爸成10多小時未有進食, 當然心急想盡快比野老爸醫肚啦, 最終幾經擾攘先可以比媽咪照顧老爸.

跟住約於5時左右終於有一個好消息就係老爸可以調番上二等房喇, 其實我地一入院時都幫老爸申請左排二等 / 頭等房咖喇. 見識過普通病房o既情況, 就更覺轉上二等房係必須o既. 老爸係轉完房後心情都大好, 仲好好胃口添!

而家雖然仲未知報告幾時有, 但起碼手術能夠無事終了都係一件好事黎o既! 希望老爸好好休息一下, 遲d就可以番屋企咖喇.

(P.S. 多謝WT馬士基力量!)

祈求順利

昨天老爸已入院, 為今日要做的手術作好準備, 在此希望一切順順利利! 老爸, 加油啊, 大家都在支持你的!

過關斬將

話說4月1號那天我跟兩親戰戰兢兢地去聽報告, 那天下著微雨約於9:45就到醫院等候, 老爸的預約時間實為10:15, 但一直要等到10:45才聽到廣播開始應診, 終於我地要等到11:20先見到醫生.

等左咁耐自然好心急想知結果, 點知那位醫生又好似晨早未開聲咁, 入左去坐低有成5分鐘一句說話都無講過, 只係不停在翻老爸的病歷檔案. 終於醫生金口大開, 點知帶比我地o既唔算係一個十分好o既消息, 佢話 "上次抽tissue抽唔夠, 所以未能確診." 天啊, 呢個係乜野意思??? 老爸一把年紀捱過一個風險頗高的手術後, 又要乾等了兩個星期, 然後得到o既結果係 "仲未知" ?????? 但我地都無法子, 醫生說唔知就係唔知, 而家終於又係要再安排入院下星期去做全身麻醉的腹腔鏡檢查.

當然今次報告又唔可以話係完全白做的, 因為有一個令我地家人放心不少的消息就係老爸上次從甲狀腺抽的Tissue份量足夠且做完化驗後証實為發炎而已. 呢個消息真係令兩老relief不少, 起碼情況唔似媽咪所預料咁差. 老爸幾個懷疑有問題的器官組織而家都逐一証實純粹係發炎影響. 現在只需集中火力對付剩下來最麻煩的一個部份. 而醫生亦早就講明其實呢個剩餘部份很大機會都唔係好東西, 但由於唔係100%肯定, 即使只有2~3%係其他問題佢都建議我地一定要做下星期果次o既腹腔鏡檢查, 務必令將來可以對症下藥.

以上就係老爸4月1號的病情報告了. 現在又要等下星期再入院做檢查. 希望一如之前的手術, 一切順利吧. 我真的唔想再見到老爸捱苦了.

結果發表

終於明天就到左老爸做完抽Tissue後的報告結果發表之日. 自從上次做完抽Tissue化驗之後我地一家就不停比報告ready這一天弄得神經緊張似的. 其實當日抽完Tissue後得悉老爸o既報告要等咁耐先ready之際, 我地已經問過可唔可以快d知道, 因為期間又經過漫長的4天Easter Holidays, 我地最想o既係假期前有好消息收到. 不過醫護人員說化驗報告真係需時咁耐, 而萬一報告提早ready同時醫生又覺得事態嚴重需要即時約見的話就當然會第一時間通知. 聽到呢個消息後個心又怕真係會提早接到通知要見醫生, 因為咁即係意味著報告唔會係好事啦.

所以呢兩個多星期就真係飽受煎熬, 說不擔心就係假o既. 忐忑不安的心情其實係最痛苦的. 現在只盼這段時間的折磨最終會帶給我地家人一個開心的Result吧! 明天我會放假一天陪著兩老去聽報告的, 但願覆診我我地3人可以去食番個久違了的開心午餐.

又繼續等

昨日一整天的拆騰, 真的令我很疲累. 由於老爸要於早上8:00就到達Q.E. 我跟媽咪大約6時多就起床準備一切. 約莫7:30我們已經到達Q.E.等候. 直到8:00才正式入內作登記. 之後姑娘就交帶我們的準備事項, 又幫老爸量體溫, 血壓等等. 之後我們一直待在房內等待. 8:30時有醫生再跟老爸說明了是次抽取組織手術的風險, 一邊聽我就一邊擔心, 因為雖然唔係什麼大手術, 但當中就存有一定o既風險, 例如會傷及其他無關的器官 (這個亦是我最擔心的), 還有其他好像感染併發症, 或流血不止等等, 光是聽著都已覺心驚. 解釋過後又係等. 醫生說如果手術室有期的話, 可能不用等到12:00才做, 不過最起碼也要等到11:00多. 我就跟老爸和媽媽坐在房內, 看著他倆有點累的在打瞌睡. 之後等到9:30左右, 媽媽就先跟我外出食點東西, 回頭再陪老爸.

我地胡亂的吃點東西後又趕回醫院, 期間收到老爸的電話知道可以準備了, 於是加緊腳步, 點到Q.E.時剛好見到老爸已被安排在Radiation房的門外等候了. 媽媽快步的跑到老爸床邊, 緊緊的捉著老爸的手, 我於是自己坐在一旁讓他倆獨自相處一會. 等到11:45時我才走到床邊看看老爸. 此時已看見媽媽哭過後的眼睛, 而老爸更是一副擔心的模樣. 我真的好怕自己會忍不住哭起來. 不過我一定要表現得堅強點, 我唔想老爸太擔心!

之後手術室門打開了, 醫生說準備好可以開始, 看著爸爸被慢慢推出手術室時, 他還不忘抬頭向我跟媽媽望來, 那種依依不捨的感覺真的很難受. 大約過了10分鐘後, 手術室的們突然打開了, 那一刻真的很緊張, 原來是醫生將另一個儀器推到房內跟老爸做另一個檢查, 原先是要老爸到另一間房做的, 但醫生說不想老爸走來走去的, 所以提議將儀器推進來配合一下. 在此真的要感謝醫護人員的貼心服務.

最終大約12:45所有手術都順利完成了. 看到老爸被推出來時, 我跟媽媽都一擁而上看看老爸的情況, 幸好老爸只是手術後有點累, 精神尚算不錯的. 跟住就有姑娘幫忙將老爸帶回病房休息. 期間姑娘們的服務真係值得一讚. 真的很感謝她們. 我們三人在房內等著等著的. 到5:00多時醫生才到來為老爸再檢視一下傷口, 確定沒問題後就安排出院了.

但係化驗的報告就要2星期後才有, 心急的我們試著問醫生可唔可以早點知道, 不過醫生說化驗需時, 所以一定要2星期後才安排我們回來覆診見醫生的. 無奈的我們又要多等一段時間了. 現在安排了4月1日的早上回去聽報告. 我想在這段期間大家的心情一定會很緊張的. 真的希望4月1 日所帶給我們的會是一個好消息吧.

支持

老爸明天要入院抽取Tissue做化驗! 唔知今次o既結果要幾時先知啦. 我好希望呢個會係好消息.

我已經請左假陪住佢兩老, 希望多點給予他倆支持及鼓勵. 老爸, 你一定會無事o既!

總算有點好消息

今天媽媽自己一個到了之前做檢查的法國醫院問了老爸所做o既其中一個化驗報告. 其實呢個報告係有關老爸最初入院做第一次胃, 腸鏡時順道由食道 / 胃抽取的化驗, 當其時未知腹膜有事, 我地一心諗住可能係息肉之類啦. 但之後由於突然爆出了有腫瘤呢個issue, 所以"息肉"呢件事就不了了之的.

最近媽咪終於記起仲有呢個化驗報告未聽, 佢唔想老爸再受刺激了, 所以選擇自己去問醫生, 因為佢最擔心o既就係有機會呢個化驗會check到有擴散的結果, 因此一直都好忐忑不安, 好想知道報告到底怎樣, 但同時亦好擔心又再有壞消息. 其實說到底我都好贊成佢地去問個明白, 因為及早治療總比不聞不問好, 你唔問唔理, 唔代表呢件事無發生過. 咁既然發生左, 點解唔清清楚楚的問個究竟, 有多d資料在手, 相信醫生可以更加幫到我地. 當然我都可以理解佢之前怕去問o既原因, 相信佢地都好難接受一下子咁多負面o既消息.

所以而家媽咪終於面對現實去問明白都係一件好事. 而更好o既係醫生証實了上次從食道跟胃抽取做化驗的都係發炎罷了. 並不是有什麼擴散的問題, 聽完後真係成個人都無咁繃緊. 總算在咁多日裡聽到一個好消息了.

擇日

剛收到媽媽來電, 知道今早老爸完成了超聲波掃瞄, 顧問醫生都有落黎幫手, 不過就話腫瘤位置實在有難度. 所以suggest預約13號再番去先做抽Tissue. 希望到那天會順順利利吧.

老爸加油

而家老爸應該已經準備好進行超聲波掃瞄的了, 希望一切順利. 老爸, 你要加油呀. 我地全家人都會支持你咖. 唔使擔心.

開解

昨天老爸他們趕了上下場去看醫生. 上午的結果昨天已在這兒說過了. 之後他們三人去了飲茶. 期間在酒樓還遇上了一位茶客, 大家都相識了一段時間, 前陣子還得知這位茶客(張先生)也剛從大病中康復過來. 所以他們昨天跟老爸們談到一點小心得及患病後要注意的地方, 康復期間的調理等等. 他們真的給了不少寶貴的意見, 聽過了張先生的經驗之談後, 老爸們都好像加強了不少信心. 因為始終係一位過來人, 由他口中說出的一切都好像更有說服力. 我也很感謝張先生夫婦所提供的幫忙. 現在老爸對治療過程中所會出現的情況總算有個底, 在心理上應該會比較容易接受到, 而媽媽亦在張太處得到一點有關身體調理的資料, 若果老爸真的要接受一連串的治療的話, 希望那位中醫生肯再收老爸這個新症, 幫忙調理一下吧.

臨走時張生還跟老爸說不要怕, 一定可以戰勝今次o既難關的. 感謝張先生一家的鼓勵. 之後他們又要出發往廣華醫院作內科的檢查. 而今次得知一切安好, 醫生也說現階段我們只需專心一致的處理那個疑似腫瘤的個案, 其他的都不用擔心. 聽罷相信老爸們都放心不少了.

明天老爸還得到Q.E.進行超聲波掃瞄, 確定位置, 之後如果醫院有床位的話, 應該會入院順道抽取Tissue, 在此先祝願明天亦一切順利. 老爸, 家中各人都會齊心支持你的, 唔使驚呀.

結果

終於細妹12:00左右打比我喇, 等左我一朝真係好擔心.

消息係一如所料, 老爸要多做其他檢驗去確診, 換言之又係要等. 今次排期會係一個星期左右, 到時會先睇下做甲狀腺定係腹膜先. 因為呢兩個地方都好像有點問題, 而之前o既膽管, 醫生說有可能係生得厚左, 塞了膽管. 反而腹膜那處就真的有一"舊"野, 而家要做either超聲波 or 掃瞄去抽取tissue作進一步檢查.

就係咁佢地就忙左一個上晝, 細妹話等醫生叫名入房時心跳得好快. 真係緊張過放榜. 暫時而家我地可以做o既就係盡量令老爸心情keep住開朗, 同埋好好的照顧佢o既日常飲食. 希望一家人一條心好好支持老爸.

等待

昨晚勉強地入睡, 心中所掛的當然就係老爸今早覆診的事宜. 希望今天會帶給我們一家一個正面的報告吧! 我真的不願再見到一家整天都掛著一副憂心忡忡的表情啊.

給媽媽的話

心情並未因放了兩天假而覺得舒暢了, 反而有種說不出來沉甸甸的感覺. 過去幾天媽咪反覆的態度與情緒真的令我們很擔心. 以下o既說話其實自老爸發覺身體有點毛病後, 我已經經常跟她說的了, 但她好像一時明白, 一時又不明白的.

媽媽, 你話過如果老爸有乜野事的話, 你會好唔捨得. 我好想話你知, 其實真係唔單止你會唔捨得, 任何一個屋企人相信都無一個會捨得的. 你又講過老爸跟你的關係跟我們係唔同o既, 呢點我都明, 始終老爸跟你的關係是最親密的, 你地兩個都係對方生命中的伴侶, 我好同意亦明白你所講仔女大左會有自己o既家庭, 到頭來都係會得番你跟老爸相伴, 既然係咁, 你應該清楚知道老爸而家最最最需要的就一定係你對佢o既支持同鼓勵, 你o既所有行為心情都會直接影響到老爸的. 佢都同我講佢擔心你, 咁你忍心要一個有病在身o既老爸擔心番你轉頭咩? 老爸自己都好積極面對呢件事, 佢都相信自己無咁容易被打垮的. 請你作為老爸的親密伙伴可以振作多點, 比多d信心老爸. 佢一定可以過到呢關的. 如果連你都失去信心的話, 相信老爸都唔會有心情支持下去.

未來我地一家仲有好多事情要去處理的, 當然我知道老爸今次的狀況令到我們一家的計劃好似一下子出了亂子. 有些事會提前發生, 有些事會延期, 但都無傷大雅, 因為最緊要o既係能夠一家人一齊面對, 一齊去應付. 人生不會經常都咁完美的, 今次係一個考驗, WT, 我, 細妹跟老爸都有信心可以面對, 應付呢個考驗, 希望你都一樣可以跟我地一齊去面對. 要記住老爸真的很需要你. 你一定要堅強點.

又繼續等

今日下午老爸依時去到Q.E.諗住聽下有乜新進展. 點知結果係叫佢地下星期二上午再去覆診. 點解又要等呢? 原因係醫生話無可能而家一陣間就可以幫佢地研究晒咁多張scan圖同埋reports, 佢地都唔想草率地講一個結果出黎, 加上佢地下星期一會有大會開, 到時醫生打算會將呢個case提出一齊研究, 因為老爸呢個腫瘤生長o既位置實在係有難度去處理. 所以佢地都唔敢貿然話做腹腔鏡抽細胞檢查. 所以惟有等到佢地詳細地study完所有reports後再跟佢地講啦. 無辦法, 雖然十萬個不願再等, 但醫生始終都係professional, 我地都惟有接受再等下星期二再算喇.

咁睇完呢單之後, 原來佢地兩老又趕下場去左睇regular會visit o既一個風濕關節醫生, 就係呢位醫生診斷出老爸之前o既痛風症, 幫佢對症下藥的. 所以而家老爸都當足佢係半個家庭醫生咁滯, 好多時有乜唔妥都會搵左佢睇睇先. 當然呢次都唔例外啦, 佢將最近發生o既事講晒比呢位陳醫生知. 之後陳醫生就提議佢不如再做多少少檢查啦. 因此當我得閒趕去搵佢地時, 佢地仲o係陳醫生度等緊X光圖.

我一上到Dr. Chan果度, 老爸就話 "原來我真係一個金玉其外, 敗絮其中o既例子. 表明上睇黎我都好健康, 但原來一check出黎有咁多問題, 而家又話十二子腸有點發炎, 仲有其他毛病, 頭先陳醫生就叫我照埋個肺睇下, 家陣等緊張片ready." Oh, 乜原來老爸真係有咁多病痛喇, 平時睇真係一d都睇唔出咖.

終於等到差唔多6:00時張片就ready喇, 我地於是一齊去等陳醫生o既診斷, 好彩, 今次陳醫生話個肺係Good o既. 起碼可以擔心少一樣先. 跟住我就開始問醫生究竟老爸有乜野飲食上要注意喇, 當然有好多老爸鐘意食o既野而家都要戒喇, 好似雪糕, 甜品, 煎炸食物, BBQ, 魚生, 醃製食物 ....等等都唔應該再食喇. 講就好似有好多野唔食得咁, 但其實仲有好多美食都仲可以享受o既, 好似拉麵, 新鮮的豬, 牛, 雞, 魚, 蔬菜, 生果, 芝士, 粉麵 ... 等等. 不過我知對於一向為食o既老爸黎講, 要跟咁多佢鐘意食o既食物無緣又真係好痛苦o既. 為左支持老爸, 我地都決定跟佢一齊戒口! 咁對大家o既健康都有幫助.

當老爸聽完陳醫生o既忠告後真係有d無晒心機, 仲話咁咪唔使去日本玩囉? 我話 "點會唔去呀, 我地仲要去浸溫泉, 至多我搵多幾間好味o既拉麵店, 烏冬店一齊去試啦." 希望老爸會開心番d啦.

另外醫生提醒我地都要注意下媽咪o既situation, 因為連日o既折騰, 令到媽咪一刻間都好似老左好多咁, 個人憔悴晒. 如果媽咪再係咁落去唔單止會影響自己o既健康, 就算係對老爸都會有壞影響咖. 希望媽咪可以堅強d支持落去.

總結: 痛苦的等待一直要到星期二才會有機會消除. 希望星期二醫生會帶如我們一家一個好消息吧!

陪老爸聽報告

今日下晝我就趕番去醫院跟父母會合, 因為約左醫生3:00睇報告.

我大約2:00已經去到, 而父母由屋企慢慢行黎後, 我就跟老爸去登記. 之後就安排去診症室no. 25等Dr. Ha. 期間有其他病人睇緊症, 亦有3至4位未做booking的病人在外等候. 當時間愈近3:00時, 我地o既心跳就不其然的加速. 每次診症室開門, 我個心都"離"左一"離"咁. 緊張程度比考試放榜簡直係有過之而無不及. 一點也不好受.

終於nurse叫我地就診喇. 入去坐好後, Dr. Ha就開始檢查老爸昨天所做的正離子圖片, 一共有28張之多. 睇完一輪後, Dr. Ha就話今次呢個正離子檢查主要係證實左呢個腫瘤係生左係肝跟膽的交叉位, 不偏左亦不偏右. 所以做手術切除的話係唔太理想o既, 因為若果佢生近左邊的, 大可連左邊的肝都切去, 但而家o係正中間就比較難用手術去對付喇. 如果我地決定都係做手術的話, 佢提議我地先再諮詢呢方面o既權威醫生, 例如廖教授. 但相信佢都唔會100%贊成動手術.

所以最後Dr. Ha話倒不如先寫一封信等我地可以去Q.E.再見一見醫生, 之後o係果邊安排做一次全身麻醉o既腹腔鏡檢查, 抽取細胞再驗證究竟呢個腫瘤係屬於乜野類型. 可能醫生都見到我地3個憂心忡忡的樣子, 所以佢同我地講 "你地唔好諗到好似世界末日咁嚴重, 要知腫瘤都分好多種類o既, 有纖維瘤, 淋巴瘤, 脂肪瘤等等, 呢d都會因為佢長大左壓住膽管做成你上次o既不適, 所以現階段真係唔使太擔心. 放鬆少少, 等再做多d檢查, 出左報告後先再作打算."

聽完Dr. Ha呢番話後, 明顯地見到媽咪幾天以來難得一見o既寬容表情. 當然我地唔係百分百鬆口氣. 只係覺得原來仲有希望咖. 所以見完Dr. Ha之後, 我地立即拎住佢封信就打的去左Q.E.登記喇.

去到做好登記後, 而家安排左老爸明天下午1:30再睇醫生, 到時就應該會安排時間入院再做腹腔檢查. 希望一切順利. 我地一家人已經一齊過左咁多關, 相信一定可以平安大吉o既.

o係呢度亦都要多謝WT同埋一眾跟我及我家人素未謀面的Blog友所送上的祝福與鼓勵. 真的很感謝大家!

P.S.: 感謝WT今天晚上應酬過後咁夜都上黎探下我地, 可惜老爸累喇, 你上到黎時佢都已經係休息中. 你o既心意我代佢多謝你吧!

老爸檢查記

今晚放工回家後問了老爸今天看醫生的事宜. 老爸說估唔到原來都有一d年紀相當輕的後生仔都要做呢個檢查, 疾病這回事真係唔分年齡性別的.

聽完佢講左一次今日做檢查的程序, 發覺原來都唔簡單的, 做檢查前都有好多準備功夫要做. 所以今日佢地就由早上10點開始一直做到下午3:00先正式完成.

而家就要等聽日下午3:00再見醫生聽報告. 我打算聽日下午都會一齊去聽下醫生講乜. 雖然我唔可以幫佢地做決定, 但都想親身在場分擔一下佢地o既worries, 希望到時我可以表現得堅強d啦. 而當然我更希望o既係老爸可以吉人天相!

擔心

發夢都從來無想過我會親耳聽到媽咪同我講o既呢個壞消息.

昨天老爸他們去了醫院跟肝臟外科醫生研究之前住院時所照的X光圖, 醫生跟他們說凡出現在那個位置的異常組織大多數都唔係好東西. 提議佢地今日再到醫院做一個正離子檢查, 然後星期三下午再約見醫生, 到時醫生就會交待呢個組織o既正確位置, 大小, 多寡. 跟住再建議我地應該點樣處理. 由於呢個位置比較麻煩, 不能開刀切除, 只能靠either化療 or 電療, 一聽到呢兩個方法, 我心就只係想到老爸會好辛苦了.

而當聽到媽咪話 "點解會係佢? 我好唔捨得." 時......我再亦都控制唔到自己o既眼淚 老實講成日都聽到別人話生老病死係一個人必經o既階段, 無錯呢樣我都知, 人終歸一死. 但我真係無諗過係o係呢個時間發生咁o既事, 我暫時都真係未接受到. 如果老爸有乜野事的話, 我真係會好唔捨得. 因為我地一家人向來都好親密, 關係亦好好, 試問突然間有可能會少一個成員, 你心情會怎樣?

WT跟我說我要堅強點, 因為仲要睇住媽咪跟細妹, 我會盡力試, 但以我一個咁鐘意喊o既人黎講真係有點難度. 但為了緩和氣氛, 唔好令沉重o既氣氛使老爸難過, 我會盡能力o係屋企人面前表現得"硬淨" D. 老爸, 你都要為自己加油呀.

昨晚大家o既心情都稍為冷靜了一點, 開始研究討論下一步該怎麼走. 當然無人想行到果一步的. 惟有期望奇蹟的出現, 那個組織不是大壞蛋吧! 又或者以而家醫學咁昌明, 老爸的只是小問題, 慢慢一定可以完全康復的.

幸福真係唔係必然o既, 有機會有時間的話真係要好好對待你o既家人, 否則恨錯就太遲喇.

老爸病情進展

星期日那天老爸終於獲准出院了. 不過並不代表佢已經完全fully recover. 因為今次入院時做了幾種不同的檢查, 當中有pass的, 亦有marginal case. 就好似胃鏡, 腸鏡就pass左. 但係一個關於肝臟掃瞄的就係marginal case. 因為醫生發現老爸的肝跟膽相連的位置有一些不明組織, 佢提議我地先找肝臟外科醫生詳細點再看一次掃瞄圖, 之後聽取佢o既意見, 看看有沒有需要進行手術, 又或者睇下急切性如何.

所以最後我地決定等dad先出院休息番一日先, 之後今天會跟保險經紀商談一下所購的Insurance係cover左乜野先, 跟住下晝多數會去見肝臟外科醫生, 之後再根據醫生的專業意見考慮下一步該怎樣做.

其實當那天醫生說有不明組織出現時, 我的心真的往下沉了一沉. 雖說未知係屬何種組織, 但畢竟有機會要老爸做手術, 心裡都不好過. 因為老爸年紀大喇, 動一次這樣的手術真的復原需時.

現在只希望一切都能安然渡過, 老爸身子快點康復過來吧!

P.S.: 感謝WT這幾天都陪住我地一家人, 仲要幫我地做埋跑腿, 謝謝你.

老爸入院了

自農曆新年起開始, 老爸o既健康就出現了一點小狀況. 可能年紀大左喇, 有時一點看似no harm的小毛病其實都不能忽視的. 幸好在媽媽的囉嗦與照顧下, 老爸終於肯乖乖的入院作檢查. 老人家每年一次行例的身體檢查真的不能少, 有問題及早發現的話會有更大機會治癒. 在此希望老爸快快康復過來, 我們一家人每年一度的家族旅行今年還未出發啊, 老爸一定要趁這段時間好好休息一下.