一次就夠的『糖兄弟』

話說於大戶屋 & Tuttimelon 食飽飽又同老公行完街買完衫, 番屋企之際, 經過一間甜品點.   老公忽然問我有無興趣去試試.  雖然之前已經o係 Tuttimelon 食完 froyo.   不過難得老公主動提出陪我食甜品, 我就算變肥豬都應承啦.

今次試甜品 @ 糖兄弟.  星期六晚10:00左右間舖都無乜客, 除左我地之外, 就只得一枱大枱有客人.   都真係幾冷清.  

睇完 menu 後就決定一人叫一款唔同o既甜品大家 share.  我就揀左呢個楊枝金露豆腐花, 賣相都okay. 

至於味道嘛, 就跟細妹之前o係另一間甜品店『口甜舌滑』果度買比我果碗差得遠了, 呢個唔係唔好食, 但真係普通左少少, 料又唔算太多.  只可以話係合格o既水準囉.

跟住老公就點左呢碗夠薑芝麻湯丸.  可惜湯丸餡無得自選, 只得芝麻一種口味.  碗薑水算係唔錯, 真係好夠薑.

至於湯丸就不過不失啦, 餡料都幾多, 但係皮就略為厚左少少囉.  整體來說都係合格但未至於出色. 

兩個甜品合共$42.00.   只能說過得去, 不過多數都係試完今次就夠了.