旺角中的二星中菜．明閣 @ 朗豪酒店

星期六晚跟屋企人去左旺角朗豪酒店內的米芝蓮二星中菜餐廳『明閣』食飯.    今次揀明閣試菜除了因為星級魅力外, 仲要因為就腳.  今晚訂左6:30 p.m. 大家準時去到被安排坐的位置都唔錯.   一如以往搵食之前先做功課, 所以坐低後好快就可以落 order 了.  

首先精選小食原本想叫鹵水豬仔腳的, 但可惜今日沒有供應.   於是就叫左另一款金箔松露千層豆腐 ($45 一位).    一上菜時就嗅到香香的松露味了.    每層豆腐中間都夾滿了松露, 由外觀以至味道都相當夠創意的.   

之後就叫了幾款明閣的名菜, 先黎有龍皇披金甲 ($298), 全份共8件.   主要係龍躉片包著蝦膠煎炸, 真係好好味, 仲有炸得好香脆的蝦頭同埋甜美的菜頭伴碟.   果然係得獎的名菜, 心思都值回票價了.   

 

松露金縷衣 ($238) - 主要係雞肉 + 魚肉, 底部再有一件南瓜, 夾埋一齊再加上香味十足的松露, 呢道菜真係好好食呀.   中間仲有類似薯條的做法的南瓜條, 好好味呀.

跟住仲有另一道名菜紅酒火焰黑豚 ($238) - 呢道菜一上時真係好有氣勢, 因為真係著晒火咁上菜的!!  黑豚肉好嫩滑, 有紅酒的酒香, 醬汁亦好惹味.  用黎伴飯真係一流.

另外我地就叫左朗豪炸子雞半隻 ($198), 皮脆肉嫩, 再加上炸過的蓮藕片, 真係好正. 

至於明爐燒味就試左呢個乳豬叉燒雙拼 ($218).  乳豬片夠脆, 叉燒就夠蜜味, 只係肉質方面唔夠之前o係龍景軒所食o既咁軟身. 

最後仲叫左明閣鮑魚粒炒飯 ($238), 料足飯亦炒得夠乾身.  

當然試埋甜品就係指定動作了.   首先在服務員的推介下叫左呢個賣相夠晒 fun 的得獎甜品翅晶凝 ($108 / 5 pcs), 真係無介紹錯.  上菜時o既乾冰效果簡直就係好似仙境一樣煙霧彌漫的.  粗大的魚翅放左o係類似桂花糕的入面, 下面就仲有一層芒果布甸, 好有香芒味呀. 

每人試完一件後就各自叫左一款甜品添.  老公 & 細妹都係試楊枝甘露 ($48), 好足料喎.

我就試左呢款黑芝麻豆腐凍布甸 ($48), 估唔到係咁大杯, 豆腐布甸內有好多黑芝麻, 好香呀.   

媽咪就叫左呢個一客4件的擂沙湯丸 ($48 / 4 pcs) 大家一齊分.  由於係即叫即製的關係所以要等10分鐘, 真係好軟身好香.

好喜歡佢呢度o既甜品唔會太甜. 

是晚消費共$2,173.60 果然係一分錢一分貨, 以呢個價錢食到咁有心思又咁美味的得獎菜色, 再加上o係旺角區咁方便, 真係無得頂呀.

晚飯獲服務員通知可以申請 membership (凡惠顧滿$1,500以上就可apply), 就即刻填好 form了, 因為以後可以享有85折優惠了. 相信再黎幫襯的機會都應該幾大!!  

食之週末

今個星期六咁o岩媽咪 lunch 時約左好友, 於是我同老公就等埋細妹一齊去左 applegreen 食 Brunch. 因為細妹仲未試過所以佢主動提出話想去試番次. 當然去到就唔使多揀, 一行3人個個都係點番 Egg in the hole 啦.

呢杯係細妹 order 的 iced cuppacino, 好似都唔錯喎. 下次我都要試.

食完個 Brunch 兼吹完水後就解散了, 因為各自有活動. 幾個鐘後再集合於 K-11 的霞飛, 因為晚上約左媽咪出黎開餐!

以往o係霞飛食完野後通常都係會走去 The One 食 tuttimelon的. 不過今次由於見到 Smile Yogurt 位於 K-11 的分店已經開左. 於是提議大家一齊去食.

成間店都係得4張 high chair, 但又咁好彩比我地4個一齊有位! 媽咪今次決意要試佢o既Chocolate Lover!! 而細妹就揀左 Fruity Fruity!

我嘛, 當然就要食番杯 Mango Fever啦. 個賣相真係好正呀. 當然味道都唔差啦.

辛苦工作五天後能夠o係週末好好享受一下, 嘆下美食就係我同屋企人o既最佳減壓方法了!

玩味十足的笨 Na Na 雪條

老公上次行經7-11時見到有以下呢款雪糕做緊promotion, 順手買左2條番屋企一人試一條. 我其實都好耐無食過雀巢的雪條了.

拆開包裝後見到好似平平無奇的一枝雪條.

點知咬開左個頭之後發現果幾片"蕉皮" 係可以反落黎咖!!! 真係好似條香蕉咁咖.

玩味就真係十足喇, 味道就普普通通啦.   貪得意o既都可以試一次咁多o既!

意外發現 @ 旺角風月堂

星期二晚由於細妹有約, 老公提議帶埋媽咪一齊去試下呢間位於旺角的樓上 Cafe & Restaurant 『風月堂』!!

由於我最準時收工所以搵位一事由我負責. 約於6:30 去到都見到有唔少食客了, 服務員安排我去左2樓的座位, 可惜坐唔到街景位! Cafe 店內環境都幾光猛白淨.

望望 menu 食物種類選擇都唔少.

無幾耐等齊人喇, 可以落 order 了. 老公叫左一個 Set Dinner. 個餐都好豐富的. 有餐湯 & 飽, 幾好味的 (掛住食唔記得映相), 跟住main dish 要左牛扒配帶子 + 意粉. 估唔到真係幾好味喎. 肉質都夠嫩滑的.

而我就揀左好多人食完都話好o既海鮮湯意粉. 大大碗仲好足料添咖.

另外由於媽咪主要想試甜品, 所以我地另外加多個細細地的煙三文魚 pizza 一齊 share 食. 估唔到個pizza 又幾好有水準喎.

之後就到甜品登場喇. 呢個係媽咪的彩虹芭菲, 跟餐牌上的相片有90%相似, 好味.

呢個係我的芒果芭菲, 味道唔差咖. 芒果仲好甜添.

跟住老公個套餐包左一份雪糕 waffle , 佢揀左朱古力味雪糕!

另外仲包埋杯奶茶, 個茶杯好華麗呀.

是晚消費約$450, 以食物質素 & 份量黎講都算幾合理.  環境亦唔太差.   我相信我地應該會再去幫襯的.

名不虛傳的三星：龍景軒

期待左2個月的米芝蓮三星飲茶終於都到喇.   話說2個多月前就想帶埋屋企人去位於中環四季酒店4樓的龍景軒飲茶, 因為佢係香港其中一間榮獲米芝蓮指南三星評級的食府!   好野當然就要大家一齊去試啦.  由於要 guarantee booking 係安排到 window seat 所以就要早成2個月前就book 定.

龍景軒午市由12:00開始, 我地大約11:45 就到左, 於是就o係外邊 waiting area 映下相先.  個環境都真係相當吸引的了.

到正式開門營業之時就有服務員親自出黎帶我地入座.   雖然今日天色麻麻, 但係幸運地總算無落大雨, 所以坐在窗邊仍可欣賞到對岸的風景.   

店內環境不俗, 每枱之間都有一定的空間唔會太局促.

每張枱上都放置了精緻的餐具, 仲有美麗的蘭花.   

再看看就連茶壺都精緻過人的. 

大家擾攘一亂後就開始熟讀菜單準備大快朵頣.   首輪 order 落好之後就送上了3小碟的醬料, 分別係(由左至由): 豆瓣醬, 素XO醬 (餐廳自家調製, 真係好好味), 辣椒醬油 (是日沒有用來配合菜餚). 

唔使幾耐點心就陸續送上: 最先登場的係龍太子蒸餃 ($36 per piece), 果然係三星食店的推介點心, 外型討好之餘連味道都係一流, 大大件的龍蝦肉再加埋帶子, 真係一流.

原隻鮑魚雞粒酥 ($48 per piece), 另一款必食之選, 我地4個食完後都讚不絕口, 就連頭先叫好的龍太子蒸餃都立即變成第二位了.

件鮑魚真係唔細件咖, 仲有大大粒的雞肉!

緊接登場的仲有黑松露菌蟹肉小籠飽 ($22 per piece), 好好味呀.  真係超水準之作.  

最後一款點心就係呢個XO醬栗子燒鵝酥 ($52) 亦係全場比較弱的一款點心, 味道唔係唔好, 只係沒太大驚喜.  不過還是很欣賞佢o既層層疊酥皮, 真係好好食.

跟住我地仲叫左兩款燒味, 分別係蜜汁燒叉燒 ($200), 嘩, 唔係講笑, 肉質真係超軟, 蜜味濃郁. 

呢個片皮乳豬件 ($260) 亦係上等之作.  脆卜卜的乳豬皮下夾著一片薄薄的甜包片, 再下層就係嫩嫩的乳豬肉.  

另外我地仲叫左呢一客鮑魚粒雞粒炆飯 ($380), 4個人分剛好每人有一碗.   足料的炆飯, 不過就未能說好出色.

食完主菜後當然就到甜品o既出現了.  4個人各自order了唔同o既款式! 

呢個係老公的香芒楊枝甘露 ($52), 料很足, 味道亦好.

我o既杏汁撞蛋白 ($52), 杏汁夠濃, 蛋白亦很多. 

細妹的合桃珍珠露 ($48), 合桃味夠香唔會太甜. 

媽咪的紅豆豆腐布甸 ($48), 有豆香, 兼有滿溢的紅豆, o岩晒鐘意食紅豆o既媽咪.  

最後食店仲送上每人兩件的特色甜品, 兩款都幾好味咖.  

今次飲茶o既消費共$1,756.00 不過我真係完全感受到乜野係一分錢一分貨.   由食物水準, 食店的環境以至服務態度, 我地一致認為呢個三星係絕對值得的.   我地已經約好下次再黎就會試下佢o既晚飯菜色!   我估應該唔會失望掛.

食飽飽離開之時見到大堂好靚o既 deco, 當然要順手映下佢啦.