開心滿足又relax 的 Brunch @ applegreen

話說上次上開飯網搵食時發現了不錯的applegreen後, 就存心一定要去呢間蘋果綠試下人人叫好的週末Brunch!   呢個好多人都大讚o既Brunch 係每逢週末11:30 - 5:00 先有供應的.   由於係即興的關係當我地星期五晚打去想book位時佢地話已經 full book 了, 不過就 suggest 我地可以 walk in.

咁老公見我咁想試就一於陪我星期六早少少出發去新世紀, 上到去時間尚早, 連舖都未開!  等緊開門之際其實都陸續見到有人客上黎想食 Brunch的.   結果等到11:30左右餐廳開門喇, 我地係第一對人客, 服務員安排左一個靠窗的 Sofa 位比我地, 果日咁o岩天氣超好, 個 feel 真係好 relax 呀.

坐低後睇睇 menu 都有幾款唔同o既選擇, 但當然黎得我就梗係要試下好多人大力推薦o既 Egg in the Hole 啦, 個名咁奇怪o既 Brunch 要 $90元, 再加$18元可轉飲特色 Coffee, 我同老公分別就轉左 Hot Latte & Hot Mocha.  飲品先上, 香濃的 Coffee 味, 滑一滑的 Cream!  單係呢杯飲品就覺得相當唔錯.  

無幾耐主角登場喇.  嘩!!  好精美o既一份 Brunch呀, 感覺有點似去左旅行時o係酒店食o既款色!  (自我陶醉中 ~~~)

其實所謂o既 Egg in the Hole 就係在兩片鬆軟的麵飽上挖出一個洞, 而在洞內再裝上一隻煎至半熟的蛋!  所以一切開麵飽時就見到有蛋漿流出, 好正呀真係.   除左蛋 & 飽外, 仲有脆脆的自家炸薯片, 一條腸 & 一片厚厚的蜜糖火腿.  

最正o既係仲包埋一杯鮮果杯!  入面款款鮮果都超美味, 好新鮮的感覺! 

跟老公傾傾講講, 嘆下美食, 話咁快又過左 一個愉快開心又滿足o既早上了.  是次 Brunch 消費兩人共$238.00.  唔知幾時會再黎嘆過呢? 

著數火鍋 @ 樂富牛涮鍋

之前幸得網友提示知道牛涮鍋有優惠, 於是星期五晚約埋屋企人再去涮餐勁. 今次走左去樂富新店試下.

店佈裝修都幾OK, 今次o既座位安排亦很滿意.

由於限時關係我地早於入座前已經落好單揀好火鍋套餐.  所以一坐低, 就分頭行事, 先拎定醬料 & 滑滑豆腐 & 飲料. 

跟住再拎埋其他各式的火鍋料.  

之後就等主角豬 & 牛肉登場.  真係唔錯咖. 

不過最大問題就係唔知因乜事當晚餐廳有點混亂, 我地要求o既豬牛 refill 要追單幾次先黎到一碟.  同場仲聽到唔少其他食客追單, 有d什至坐低後連第一碟肉都未有送到. 好彩最後肉類供應總算恢復正常. 

今餐我地仲勁食軟雪糕因為真係好好味呀.  加上有得自己唧覺得好好玩 

是晚因用了優惠的關係, 4人都只係500元唔使就走得, 真係好抵食呀.

有待改善的Cheers Yo!

睇左咁多有關日本哈根大師的新品消息後, 就等我貼番一則有關雪糕 / Froyo 的網誌先 ~ 話說好多時晚上行經太子都見到一間叫做 Cheers Yo! 的 Froyo 店. 講裝修門面就真係好普通, 甚至可以話太求其. 所以一直都提唔起興趣去試.

點知最近食 Froyo 食到有點上癮之下就即管上開飯網睇下佢o既食評啦, 發現又唔係太差, 於是的起心肝尋晚再經過時就捉埋老公入去試. 果陣應該係晚上9點幾. 店內係一個客都無的. 咁我地一入去店員就話今日有原味同埋藍莓味的Froyo, 咁我就點左原味的. 當店員正忙於"吱" yogurt 時, 我就睇下有乜野 toppings 揀.

點知一眼望埋去佢個toppings櫃... 真係可以話無乜野好揀, 一係就"吉"兜, 一係就唔吸引. 最後幾經思量終於都叫揀左要芒果味的星星椰果. 而呢個時候店員就同我講 "唔好意思呀, 原味好似賣晒喇, 介唔介意要藍莓味呀?" 我心諗"唔係掛!!! 賣晒都唔知呀, 仲要攪左咁耐先發現??" 不過既然一場黎到就算啦, 藍莓味都照試.

以下呢杯就係我最後的選擇了!

講賣相佢真係唔多得, 隻膠杯感覺係太 cheap.   至於味道嘛, 講真就唔太差o既, 其實都算幾好味, 份量亦好足, 呢度咁大杯都係$28.00 叫幾抵食.  如果佢可以改善下 toppings 的水準 & 款式就會更加好囉. 如果好似而家咁就真係唔太值得推薦比大家了.

忽然一試 @ applegreen

星期六想出去食飯, 但係天雨關係又唔想去太遠. 結果就揀左一間又近媽咪又近我地o既去試試. 呢間就係位於旺角新世紀廣場7樓的 Applegreen了.

由於無訂位而又要限時交枱的關係, 我地被安排坐o係近大門的位置. 不過好彩都算幾好坐的, 只係成間餐廳的坐位安排都係有點迫迫的, 每張枱的距離都好近的.

坐低後就 study 下餐牌, 發現可以揀o既野都唔少喎, 好似好多都好吸引的. 首先我地就揀左一個前菜 鮮製牛油果醬配墨西哥脆片, 唔係講笑真係幾好食的, 果個牛油果醬真係好得!

跟住 Salad 我地就揀左一款叫做加洲棒棒雞沙律 , 估唔到都幾清新的. 其實仲有其他款我都想試咖, 好似蟹肉牛油果沙律都好似好吸引的, 一於就留番下次試先得.  同埋最好o既係呢度o既沙律可以要大盛 or 半份的.

主菜方面我地就叫左呢份炭燒菠蘿, 美國安格斯肉眼扒, 幾有水準的, 有炭燒o既香味, 特別係件 pineapple 真係好得！

而意粉方面我地今次叫左煙肉忌廉意粉, 值得一提o既係呢度o既意粉仲可以加$$而加入其他配料 e.g. 煙肉蛋, 蘑菇, 肉腸 & 海蜆).   不過今次我地就無加任何野.  味道方面都真係唔錯的, 幾有水準的Carbonara. 

而呢個就係老公想試的芝士通心粉, 芝士味幾濃, 不過d 通心粉有點太硬.

是晚消費4位共 $592.00 都算幾抵食的了.  下次有機會應該會再黎的.

 

 

摘星有理的國金軒 @ The Mira

5月22號(星期日) 黃雨下出發去左 The Elements 睇完海盜兼試完 Froyo 後就要諗晚餐o既最終決定係邊間呢?  因為其實一早就book好位想一家人去位於 The Mira 的國金軒 Cuisine Cuisine 試菜的, 因為想試下米芝蓮2星的中菜有幾好食.  點知出發時見到咁大雨就有點動搖, 因為唔想一家人o係 Elements 睇完戲後仲要徒步走到 The Mira 就係為左試菜.  所以之前一直都研究左好多其他應變plans.  諗住萬一真係太大雨的話就會留番o係 Elements 食千兩壽司算了.   但真係天公造美啊, 睇完戲出黎食完 Froyo 後見到都算幾天朗氣清.   所以大家決定照舊去國金軒試菜. 幸運地一直沿路行出去 The Mira 都無再落雨, 涼涼地咁仲行得幾舒服.

結果比預定時間早左少少就去到 The Mira 了.

由於時間尚早, 我估國金軒都係剛剛準備好不久, 服務員帶我地去到訂好的座位, 係一張靠窗的枱!　

枱上有朵好清o既蘭花做擺設. 

之後大家忙於映下環境相, 好鐘意頭頂的波波燈.   

好喇, 係時候睇睇 menu 決定今晚要試d 乜野菜色喇. 

首先前菜我地就試左呢個桂花糖脆鱔球 ($70), 一客共4件, 味道真係唔錯, 只係個人黎講如果連皮都先起左就會好d.  不過個醬汁真係好好味. 

跟住燒味部, 要左兩款, 分別係蜜味金牌叉燒 ($130) 同埋金牌炸子雞 半隻 ($200), 兩樣都好有水準, 尤其係叉燒真係好一流, 值得推介. 

到其他主菜類別就試左滿載而歸 ($350), 其實係蘆筍炒帶子, 蝦球 & 魚片.  估唔到咁好食, 下次有機會再黎一定要再encore.  

另外仲有宮廷京醬烤肋骨 ($160), 呢個又係必食之選, 肉身夠腍之餘亦很入味.  抵讚.  

最後一道菜就選擇左龍蝦湯蟹肉炆伊麵 ($160), 呢個係全晚比較失準的一個菜色, 可幸的係蟹肉算多, 不過伊麵就略嫌炆得太腍了. 

跟住餐廳仲送上每人一杯的功夫茶 & 兩款精美甜點, 兩款都好正, 呢個應該係桂花糕的甜點好清香.

當然只係試兩種甜品又點夠喉, 於是大家都各自 order 左唔同o既甜品, 旨在試下唔同款式嘛.

首先細妹o既蛋白杏仁茶配芝麻湯丸 ($36), 相當唔錯.  特色在於杏仁茶係上枱時才在客人面前倒進碗中.  

呢個係老公的香檳啫喱芒果布甸配椰汁西米露 ($48), 味道唔錯, 但其實味道就似楊枝甘露. 

呢個外表好似一件朱古力蛋糕的係媽咪的 order 朱古力豆腐餅配杞子薑汁 ($48), 入面其實係一件豆腐蛋糕黎咖, 媽咪話都幾夠豆香的. 

至於呢個擺得太係求其o既係我的甜品國金三式美點 ($48), 就咁睇個賣相又真係普通左d o既, 不過好彩係味道幾好, 唔會太甜.  如果可以改善下個賣相應該會更加吸引.

是晚大家食到飽一飽, 消費共 $1454.20, 都算抵食, 因為話晒都係二星級的餐廳, 服務水準都幾滿意的.  我相信應該都有機會再幫襯.  不過下次唔知會試飲茶定係晚飯呢?  

P.S.:  最好彩的都算係食飽飯後散步途中都仲係好好天氣, 只係差唔多行到番屋企時先開始落起大雨黎!!!