4月1日 (星期四) Disney Land + Ikspiari + 台場
(重點: 非常應棍的愚人節) [上篇]
(重點: 非常應棍的愚人節) [上篇]
就咁睇標題都知今日o既行程應該係問題百出吧! 我地一行4人順利出發去到舞濱站, 一出站我就睇到有個告示牌, 同時亦聽到廣播聲, 於是即刻衝埋去睇下有無通告啦, 一睇真係幾乎暈低. 張通告話由於今日Disney Land遊人太多o既關係, 佢地而家已經唔再售票喇. 視乎園內人流, 樂園或者會考慮於下午4時重新售票!!! 立即將消息告知團友們, 大家都真係呆在當場. 我就真係忽然間腦中一片空白了. 同時亦極度自責的點解唔早d買定預售票呢? 我之前每次去Disney都係一早買定飛的, 如果我真係買左票而家就唔使亂到咁啦. 但我今次真係完全無預計到Disney今日會多人到停售門券的. 坦白講我真係好在意自己今次o既失誤, 我自己個人黎講真係接受唔到咁o既錯失的. 肯定暫時入場不能o既我地就惟有先o係樂園外的Disney Store行一陣, 再o係天橋映左一陣相. 期間見到Spring Carnival的monorail ~
而無得入場的我就要即刻開始諗究竟我要點樣做先o岩呢? 首先如果4點先再賣飛, 入得去都已經趕唔切 Easter Parade的了, 咁仲應唔應該等呢? 好喇, 如果等到4:00時樂園決定唔再賣飛的話, 咁我地無啦啦留o係舞濱呢度咁耐做乜呢? 有諗過既然一場黎到不如過Disney Sea算啦, 但係又係睇Spring Carnival我又覺得唔太抵, 無理由入去玩一陣, 又再買多張飛晏少少趕番入Land咖嘛.... 咁點呢? 究竟點做好呢? o係我o既腦中有好多options出現之時, 我要冷靜一點再重新組織下先得. 於是唔理咁多, 首先o係Disney附近映下相先算喇, 反正黎咁多次都無點映過條bridge的. 映完後問下團友意見, 佢地都無乜所謂, 一切都等我安排. 於是我再跟老公商量後...決定都係留o係度博一博佢晏d再售票吧. 既然決定左就唔好諗咁多繼續行程先, 我就帶各團友先到Disney Resort內的Ikspiari商場行番轉, 講真黎左舞濱咁多次, 我真係完全無行過呢個商場的, 因為每次一到步就趕住入樂園玩的了. 不過好彩今次一役比我地知道原來呢個Ikspiari商場都真係幾多野行的. 起碼我知媽媽同埋細妹o係度出左血了. 加上呢個商場唔止有野睇, 原來環境都真係唔錯的, 我就o係度映左好多靚花相喇.
知道個商場都叫有d野行下o既我先稍為安心一點, 實在好喜歡o係日本一個商場內的環境 / 花卉都可以keep得咁好咁企理, 就算唔當一個商場黎行, 我覺得呢度絕對可以當一個公園咁行下relax下咖, 開初 我幾驚唔使一陣我地就KO左個商場咁我地點等幾個鐘呀? 我最怕就係等左幾個鐘後佢先話唔再賣飛咁我真係爆粗都有份. 就係咁映下行下都消磨左我地唔少時間!
唔知好彩定唔好彩喇, 約莫到2:00幾就再次聽到廣播話樂園開始再賣飛喇, 於是我跟老公就做先頭部隊即刻走番過Disney Land入口買飛先啦. 之後再call兩位團友集合, 我地決定由我先入場睇下環境先, 跟住老公再入黎join我. 不過由於細妹正忙於血拚, 所以我就叫老公不如入左場先啦, 遲少少再出樂園門口pick up佢地囉. 終於都入到樂園了!
我仲好開心地o係樂園個大門映下相, 因為有好多好得意o既Easter Eggs呀.
仲有一大堆Tulip 比你任映唔嬲!
心想也不錯吧, 等了半天就再開賣入園票, 入到去仲比我咁o岩睇到2:00幾果場o既 parade的尾聲, 果陣真係覺得好好彩的! 而當人群開始散去後, 我就立即跟老公霸定靚位等16:30的Easter Parade, 今次好彩呀, 比我地搵到個好位, 於是就坐定定先出去接媽咪 & 細妹啦, 人齊後就採用交替制度, 兩個坐低霸位, 兩個出去行下買d野食咁. 我就當然要食番個好好味o既燒牛肉碎蛋飽再加包milk啦.
大家一邊食一邊等parade的開始! 期間咁得閒就梗係映下相先啦.
天朗氣清, 有誰估到"好"戲在後頭呢?
下一篇再講我地點樣比Disney玩到謝!
沒有留言:
張貼留言