無錯今次係爸爸離開約3個月後, 我地一家人再度出發去日本, 今次之旅重點就落於花見 (賞櫻), 很慚愧之前去咁多次都無乜邊次就到時間可以帶到爸爸去花見, 反而等到爸爸走左後唔知點解今次竟然食到個花期正一正, 我應該開心定傷心呢? 當然今次之旅我地都會帶住爸爸o係身邊一齊出發的, 但感覺總係缺了一點什麼似的. 唔知係唔係心情有點複雜定係純粹因為個人懶 (相信後者先係真正原因), 我今次竟然係好遲先開始寫行程睇參考書.... 當心裡面一想起唔可以掃其他3名團友興時, 就不期然會落力地去睇資料的了.
今次其實於book package時都有點阻滯的, 我地其實都幾早(一月中後)開始問價hold位, 不過我諗我實在係低估了一連五天的復活節假期!!! 出發果程基本上無乜大問題, 因為都比出門旺季的Easter為早, 但回程呢就有問題喇, 可能係好多人都會4月6 號趕番香港第二日開工, 所以 agency開初一直都只係可以幫我地 wait list 住 JAL & ANA的早機, 老實講早機喎邊有意思咖, 而我地一直心儀的JAL晚機, 又真係一直都無位放出黎喎. 終於攪來攪去finally都總算 book 到ANA的夜機, 不過番到黎已經係7 April 凌晨, 諗起要番屋企放低d野沖過涼訓醒就要番工時, 真係....有點汗顏!!!! 不過我地一向都係玩就玩到盡嘛, 今次一於就盡地一煲啦, 反正番都係番3天又到weekend的了 (完全就係自我安慰中!). 我地一直都hold住ANA的機位, 其實心中係想要JAL的package, 因為有班flight係夜得黎又唔太過份的, 而且家人都好鐘意JAL的服務, 我想特別係經過爸爸件事, 我地真係覺得JAL先可以provide到令人滿意的service !! 但係事與願違, 我地最終o係一直拖到payment deadline都等唔到 JAL的機位之下, 今次之旅就惟有轉搭 ANA了.
好喇咁settled左機票後, 酒店又有點小問題, 我地今次成個trip都會stay o係 Southern Tower的, 點知agency覆我地話酒店比到佢地連package的booking只係可以去到1/4, 之後佢地就full book了. 咁唔通要我住住下搬酒店咁煩咩, 咁當然我都唔可以排除真係要咁樣做, 所以一方面我就叫agency幫我book 埋Keio Plaza先, 咁萬一最後無計可施, 我地一家四口都未致於要訓街嘛. 跟住我就自己上Jalan網再book餘下o既period啦, 但係Jalan提供到的又唔包早餐喎, 於是惟有試下自己send email 比酒店啦, 原來真係仲有位的, 只係佢地果段時間無咁多房放出去比agency咋. 我當然就快快手book埋後段1/4 - 6/4 o既房, 仲可以包埋早餐, 個價其實都唔係差太遠! 就係咁一切都settled 好啦.
但正如之前所講啦, 我好似對今次之旅無乜放在心上咁, 結果又係好遲先攪租電話, 好彩呢樣唔係大問題, 上網填下表就攪掂了. 反而個行程真係諗爆頭了, 希望各位團友去完唔好柴台啦! 我今次就決定要去多d之前比較少去o既地方, 部份地方之前無去係因為唔係花見的話, 我估無乜特別野睇, 二來就係果d地方唔會o岩爸爸行的, 所以就留番今次先啦, 不過我相信WT一定會比我地悶親! 放心吧, 我會盡量搵個balance的, 希望大家都滿意啦. 同埋今次我地之旅就真係睇天做人, 希望黎緊日日放晴啦, 否則真係對花見之旅有好大影響. 我想映多d靚相呀!!!!!
今日再check check天氣, 都okay啦, 最緊要唔好落雨就得咖喇, 至於見到幾多櫻花就真係睇彩數了, 我當然希望來個滿開吧. 不過無都唔緊要, 有得去玩已經係好開心咖喇.
沒有留言:
張貼留言