2010.03 東京花見 (Day 5: 淺草隅田公園 + 銀座) [上篇]

Day 5: 3月28日 (星期日) 淺草隅田公園 + 銀座 [上篇]

(重點: 試到了言問団子)

起身必早之事 --> 睇天氣. 天陰陰咁啦, 希望唔好落出雨就得喇. 行程定為先到淺草隅田公園一帶花見, 之後有時間就再落銀座行下街. 去到淺草後就即刻朝著目標進發, 一開始時櫻花樹唔係太多, 但大家都唔理咁多, 照影可也, 點知原來一邊沿河行入d一邊就見到河的兩岸都有唔少盛開的櫻花了.

原朵落下的櫻花其實都仲好靚的!

隅田川兩旁的櫻花都開左唔少的了, 雖然未致於滿開狀態, 但都已經好靚了.

o係隅田公園仲可以見到正在興建中的新地標 Sky Tree.

儘管天色麻麻, 但見到咁靚o既櫻花大家都忘情地狂映了. 可能係近河邊又空曠的關係, 沿途都真係幾大風, 吹到隻手硬晒了. 一路上除左有櫻花比我地猛映外, 其實仲有好多路邊小花的, 我地當然唔會錯過啦, 一於見花就映!

我地4個映完一邊又再向川的另一邊進發. 吾妻橋上見到好得意的櫻花圖案地磚.

黎到隅田川的另一邊, 原來呢邊種左好多唔同品種o既茶花咖, 睇到呢d茶花就諗起o係舊屋露台我地屋企o既茶花都曾經開到咁大朵咖, 仲記得dad都好欣賞!

而映到咁上下我就決定帶大家去試下黎到隅田公園賞櫻時最受歡迎的和果子 -- 言問団子. 在最新買的Walker內都有推薦咖. 終於o係狂食風的情況下搵到言問団子了. 又真係有好多食客專程黎捧場喎.

好彩我地早少少到, 唔使等位就有得坐了. 一坐低服務員都唔使問你要乜就自動奉上熱茶一杯, 吹左咁耐風, 呢杯香濃的綠茶真係暖在心頭. 隨後服務員又再次送上一碟3色的団子. 開初我仲怕呢類団子會較甜, 但點知食過後就覺得言問団子果然係名不虛傳的. 団子一點也不會過甜, 而且配合埋綠茶真係超好味呀. 本当にうまいですよ。

大家一邊慢慢嘆茶, 一邊乘機躲在店內暖一暖身先再出發. 下一篇再講食完言問団子後的行程!