3月26日 (星期五) 新宿 / 秋葉
(重點: 離不開下大雨逛秋葉的命運, 好彩試到了好味的"黑虎"拉麵)
今日起身望一望窗外, 天色雖暗但起碼無落雨, 算係唔錯的了. 吃過早餐後就先帶妹妹 & 媽咪去到新宿的Okadaya, 今日就要唔該細妹幫我照顧住媽咪先喇.
既然一場黎到Okadaya, 老公就叫我不如都o係度逛番一圈睇下有無乜野o岩買的, 尤其係手作書, 買左佢就可以幫我拎左番酒店放低後先有會合出發往秋葉了. 唔該晒呀, 結果我o係頂層就毫不客氣的入左幾本手作書先, 香港有d雖然都有得賣, 但係個價就真係嚇屎人啦, 加上種類又少, 人家呢度就本本都有一個見本開晒比你睇過望過o岩先買, 不過我相信o係香港真係咁做的話, 本書一定連渣都無剩, 因為香港人係無乜公德心的一群. 以下o既就係今日所入的書了, o係呢邊入手唔使比奸商賺咁多, 所以一定忍唔到手見書就買的. 家陣去親日本行書店已成為我們一家的指定動作了. 買左幾本書當然就要麻煩老公幫我先行將戰利品運番酒店, 之後我先跟佢會合出發往秋葉.
今次秋葉之行最主要係陪老公行下呢幢UDX, 今次撞o岩仲有animation exhibition, 唔使錢入場, 估唔到都有d收獲喎.
o係秋葉一樣見到好美的花花, 忍唔住又要映低佢先.
仲有街上的自動販賣機都見到唔少安室的廣告!
仲記得上次去秋葉時撞正大雨天, 真係行到無晒mood呀, 心諗今次應該無問題啦, 出發到步行左幾間主攻的店子後天氣都仲係唔錯的, 終於行到差唔多成4點鐘喇先走去搵野食, 同時打電話問下細妹果邊o既情況, 佢地都仲o係係Okadaya逛緊, Lunch時兩個仲走左去附近的三國一食烏冬, 不過由於媽咪對烏冬麻麻的, 所以佢話三國一唔係好好食! 但係據細妹所講其實呢間三國一都算唔錯的, 烏冬亦都夠彈牙.
不過好彩o係食烏冬前細妹同媽媽先食左一件餡料十足的紅豆餅打底!
而這邊廂的我們就在決定去邊間拉麵店食lunch時出現嚴重的溝通不能症. 雖然最終都係如願去到想試的拉麵店, 但過程就有點不爽了. 不過都總算好快無事! 今次揀呢間拉麵店都係睇左Tokyo Walker介紹話唔錯的, 所以就一試囉, 怪就怪自己準備個map唔夠好, 以我呢個無方向感, 無距離感的人黎講, 我就成日以為要行到好遠先搵到, 所以就諗住行咁遠先有得食, 餓死個老公都未得天光啦, 點知老公又一心諗住同我去試下我準備好o既呢間拉麵店, 好明顯就係溝通出左問題了.
Anyway, 講番呢間名叫『黑虎』的拉麵店, 真係唔錯喎. 由於我地去到店子時都差唔多16:00幾喇, 當然就唔使排隊啦, 不過一直坐低食麵時都不時有客人進店的. 我就試左最basic的豬骨拉麵, 而老公就點了つけ麺. 個人食後感係真的不錯, 下次有機會再落秋葉的話, 相信都會再黎幫襯的.
就當我地食完拉麵準備再繼續行多幾間店子之時.... 點解好似有d水滴落個頭度o既? 唔係掛..... 落雨? 唔似喎, 天氣報告話多雲之嘛.....再行多兩步...咦! 唔對路喎, 開始落得好密喎. 最終還是要開遮先行得, 仲要係好大雨果種... 真係無晒癮呀. 好彩我地都總算行左主攻的店子同埋食左碗美味o既拉麵, 否則今日行秋葉又係大掃興啦. 至於收獲方面都算唔錯啦, 好鐘意新買的芒亨mug, 好可愛呀.
而今日o既晚餐就決定買魚生番酒店慢慢嘆. 其實呢個都係我o既飛佛黎咖, 黎到日本咁容易買到超正魚生仲要平喎. 唔食番夠本邊對得住自己咖! 當然嘆番杯Beer亦係人生一大樂事啦, 今次老公初試Kirin的果汁味Beer ~~~ 原來都幾好飲咖, 不過對於一向唔鐘意飲啤的老公黎講就真係麻麻地了, 皆因一飲完無耐佢就呼呼入睡.
除左魚生外, 每次黎日本番酒店必要買黎食的應該就係蛋糕喇, 因為大部份o既蛋糕真係由賣相到味道都好perfect 的, 唔食番一兩件又點抵得呢? 第一款呢個係期間限定的櫻花栗子蛋糕, 除左靚之外, 仲要好味.
根據事前所訂的schedule & 天氣報告, 明天將會係按計劃去一個我地o既新景點 -- 日暮里! 之前好多人都話日暮里都幾多野睇, 有d似香港深水埗 feel 的, 而我仲安排左晚黑o係日暮里附近睇一個有關花見 & 花火的祭り。 最終係咪順利完成? 下集再講!
沒有留言:
張貼留言