Weekend Brunch @ BLT Steak

唔係抵賴搵藉口, 但真係自從 Yahoo Blog 所謂的升級之後, 寫 blog 的意慾真係低左好多. 因為新版面真係超級咁唔好用啊.   而家成日都有一堆 Blog 要追.  咁D 相映好又執好, 唔上的話又好似好 waste.  所以都係慢慢等自己有心情就逐一慢慢上番吧.

要追的先有呢個O係11月13號 (星期日) 同屋企人去尖沙咀海運 BLT Steak 試左O既 Weekend Brunch.   揀佢係因為上次去 Al Molo 時咁O岩經過見到呢間都有 brunch menu, 咁一於就齊齊試下啦.  

不過一進門就首先發現店員服務認真麻麻了, 幾乎所有服務員的面口都係黑黑的, 一點笑容都無, 仲好似個個都未訓醒未ready開門一樣.   店內環境就應該係隔離O既 Al Molo 舒適一點.  這間 BLT Steak 的格局就係比較 casual 一點.    另一致命點係店內不時有烏蠅四處飛囉.  呢樣真係好唔得.  點可以O係一間餐廳內不時見到烏蠅處處咖.  加上佢O既 buffet corner 上的食物係完全無遮無掩的, 我地都見到幾次烏蠅們降落於食物上面O既情形, 都真係幾嚇人的.  

好, 講番呢餐食左乜先.   Weekend Brunch 都係 semi buffet 的形式, 前菜 & 甜品都係自助形式的,  主菜就係另外落order 的.  BLT Steak 的前菜選擇都算幾豐富的.  不過水準就比 Al Molo 有點遜色.  只能話係不過不失啦.  

第一轉出去就梗係乜都拎d 黎試下啦.

當中佢有 Prime Rib Carving Station 都係任食呢樣就真係好驚喜, 加上仲要係頗有水準的燒牛肉, 真係令我地喜出望外.  

食食下仲有呢盆BLT Popover 送上, d 牛油好香呀.

主菜我地揀左 USDA Hanger Steak / Mustard - Citrus Marinade / "Three Minute" Egg.   我跟mom 要o既 Medium Well 又真係剛剛好, 唔錯.

老公就叫左佢O既招牌菜 BLT Burger with Fries.  份量真係好驚人.  食完個主菜真係飽到上心口了.  

所以甜品只係試左好少咋.  呢個 New York Cheese Cake 普通啦, 唔太出色.  

反而幾鐘意佢O既鮮果拼盤, 因為有我至愛O既芒果登場.

個 Brunch 仲包埋杯餐飲的, 估唔到杯 Iced Lemon Tea 又唔差喎 ~

呢杯係媽咪o既 Hot Lemon Tea ~

呢餐4人消費合共HK$1,444, 整體黎講只能算普通唔太出色, 相信大家都係比較喜歡去多一次 Al Molo 多過再黎呢間 BLT Steak了.  不過都總算值得一試O既.