6月11號 (星期六), 跟老公去左位於紅磡紅鸞道8號海灣軒海景酒店地下的灣畔餐廳 (Bistro on the Bund) 食海鮮火鍋自助餐! 今次之所以會揀去呢度試, 完全係因為初試團購的試驗品. 話說之前o係 Groupon 見到有呢個以$176的價錢就可以嘆到我同老公都鐘意o既火鍋, 仲要話係自助餐添, 見好似幾抵就學人試下團購囉. 不過訂完又其實有d 擔心平野無好, 不過既然 book 左就照去馬. 好與唔好都叫試過嘛.
結果收到 Groupon 的電郵通知及印好 coupon後就立即訂位, 因為佢有d 特別日子係唔用得呢張coupon 的. 到左指定日子一於就跟老公食呀食. 誰不知呢間餐廳都真係幾唔就腳的, 我地搭完東鐵去到紅磡站後就 get lost 了, 結果搭左18元的士先去到. 抵步後被安排在訂位時要求的靠窗位置, 環境都算不過不失啦, 但真係點睇都唔似係一間酒店的格局囉.
坐定定後先揀好湯底, 佢都有好幾款湯底揀的, 好似沙爹湯, 麻辣湯底等等, 不過我同老公都同樣要左皮蛋芫茜湯底. 跟住就到老公出去先行視察一下食物質素 & 種類, 好似都唔錯喎, 都有唔少選擇的. 另外今次個優惠仲包埋任飲汽水/ 橙汁 / Beer & 紅白酒. 我同老公就獨愛佢o既酸梅湯, 唔錯!
之前睇食評好多人都話佢個爐太弱所以成日都要蓋住等佢滾, 不過尋晚我地又唔覺有咁o既情況, 反而覺得個時間把握得幾好, 當你食緊時蓋一陣轉頭又滾番起可以繼續烚下烚下.
食物方面種類真係唔少的, 當然你話質素嘛, 就真係好一般貨色的.
如果以今次o既優惠價黎講都叫幾抵的了. 起碼眼見o既海鮮 / 肉食都幾新鮮, 佢其實仲包埋有龍躉片 & 基圍蝦的, 不過兩樣我地都無特別興趣所以無叫黎試. 但老實講如果係正價的話我就唔太推薦喇, 今次用左團購 coupon就真係可以一試.
除左火鍋配料外, 仲有一少部份係熟食黎o既, 不過我就無試到, 老公話都過得去啦, 好肚餓又唔想等的話都可以頂到一陣o既.
另外甜品就真係好弱喇, 無乜得揀, 雪糕我地又唔係好想 (敢) 試. 係d 生果都叫合格咁啦.
而最攪野o既就係個優惠仲送埋一人一份芝心蝦丸伴窩貼蝦多士, 個蝦多士又真係幾好味咖喎.
一邊食一邊睇住出面由無雨到落大雨又再變到無乜雨我地先離開, 今次走果陣可以慢慢搵路去番紅磡車站, 原來都唔係太難搵o既.
就係咁初嘗團購o既感覺都算唔錯o既 ~
沒有留言:
張貼留言