驚喜試菜 @ 大戶屋 TST

之前細妹跟同事去完大戶屋試菜後話唔錯可以帶媽咪黎試番次.  咁o岩佢星期日約左 Friends唔同我地開飯, 咁我老公就打算不如就由我地帶媽咪去試下啦.   點知後來細妹又可以 join 埋我地一齊, 咁多個人就梗係可以試多幾味啦 ~

我地book左 18:30, 細妹率先到場揀好座位.  人齊後就落order喇.  點解話今次試菜係驚喜呢?  事關我地對於o係香港食日本菜都真係無乜特別期望的, 什至有時覺得都幾唔抵食的.  點知今次一試就發現原來大戶屋o既菜色都真係唔錯喎.... 除左老公果份有點中伏之外, 其餘各人對自己的 order 都話讚的. 

首先我地叫左一客2只的炸蠔, 由於只得媽咪 & 細好係「蠔」 客, 一客2只就o岩o岩好.  一食落口媽咪就大讚了, 最後竟然要再encore多一客添 ~~~

另外到我讚好ｏ既就係呢個我最愛的日式薯仔沙律, 真係好得, 勁滿意. 

跟住叫左2串鹽燒雞腿肉, 係估唔到咁好味, 有炭火燒的香味, 雞肉亦夠晒大件.  抵讚.

點完前菜 & 小食後, 係時候各自 order 一款定食了. 

老公就因為唔食飯類的, 所以話要試呢個熟鴨湯配冷Soba.  點知就係咁出事了, 個Soba 太硬.  老公話連飛機餐o既都好食過佢 ~~~~  所以呢個下次一定唔會再叫.

反而我地3母女o既 order 就真係充滿驚喜. 

先黎有媽咪的order - 火炙三文魚盒飯.   實物上枱跟在menu內見到的照片有9成相似!  味道亦真係唔錯.

跟住細妹就叫左個魚生飯定食, 好豐富呀, 實物跟圖亦相當相似.   魚生唔錯, 係件蛋我覺得硬身左少少.

然後到我揀o既鹽燒雞肉玉子盒飯.  可以講真係一流, 份量夠之餘, 仲要好味.  真係好食, 玉子夠滑, 鹽燒雞肉夠香. 

雖然都各自叫左一份定食, 但我地又點會就咁就夠.  於是之後再追加了一份炸豬扒, 外表睇黎好粗o既炸衣.  但原來個係好薄身o既炸粉, 唔會一咬就炸衣與豬扒分離咁甩頭甩骨.  

最後仲 order 多一客太卷壽司.  唔係講笑大大件, 一客4件的太卷, d料係好足的.  我好鐘意食呀.






今餐由細妹做老闆宴客, Total 4 人消費食左大約 $730元.  雖然唔係平, 但有番咁o既質素, 我覺得都叫抵食的了.  所以食完之後媽咪都話下次會再黎幫襯!

食飽後我地仲去左附近o既重慶站行左一陣, 跟住就當然係「順路」 去左 The One 食 Tuttimelon 啦.  不過今期o既 Tutti spoon color 唔係太靚.  我希望佢快d 出番d 鮮色d o既咁先襯 summer 咖嘛!!  

重投三哥懷抱

記得之前曾經o係 blog 度介紹過一間叫做『川之味』的米線店.  果陣自從搵到佢之後就立即揚言要跟『三哥』分手.    跟『川之味』熱戀之時真係一個星期食一次都嫌少的.  不過唔知點解最近食果陣發覺水準下降左.  往日最愛o既小辣竟然變得淡如開水 .....

於是又再o係呢個時候重新去左『三哥』一趟.  想不到今次o既重逢發現佢o既水準都仲 keep 得番住之前咁喎.  同埋唔知係咪耐無食o既關係, 今次再食番覺得好好味呀!



特別令人懷念o既係佢o既土匪雞翼!

P.S.: 相片由 Disney 手機 (DM005SH) 所拍, 質素都唔錯的!

父親節晚飯 @ 御膳 (最怕貨比貨)

雖然爸爸不在身邊, 但我地都照舊一家人出左去食飯慶祝.  今晚揀左好耐無食的樂富御膳.  不過食完今次後睇怕都唔會再點黎了.  原因好簡單就係質素差左囉.  正所謂最怕貨比貨.  呢度o既菜色十之八九都可以去家人新寵的 K-11霞飛食到.  而且質素比佢超班不知幾多.  致命傷係價錢大家都係咁上下.  咁你話仲點會揀一間差d o既去食呢?

一如以往都係叫一個4人套餐, 個套餐平心而論係算抵食的, 首先前菜可以揀3小碟. 我地就要左海蜇, 粉皮, 滷水牛腱.  味道其實唔差, 但份量比之前食開的少左好多囉.

套餐內包埋的清炒河蝦仁.  估唔到呢個最好味. 

跟住仲有甜酸松籽魚, 甜酸味道適中, 幾開胃. 

主角仲有呢個招牌片皮鴨, 今次再食只可以話係不過不失.  

金華火腿津白就唔錯. 

跟住呢個係叫做 keep 得到水準的砂鍋雲吞雞.

而以下呢兩個相信真係食完霞飛之後都唔想再食佢o既小籠飽 & 煎窩貼.  

最後呢個甜品腰果露就一向都係咁上下水準!

是晚消費4人合共$640  雖然唔係話好貴但從食物o既質素黎講就唔係太值得了.

水準不俗的 Smile Yogurt

最近終於捉左老公陪我去九龍城的 Smile Yogurt 食 dessert 了. 之前睇過報紙介紹好似好吸引咁, 雖然貴貴地不過都想去試一試.

由於無寫低地址開初都怕搵唔到咖. 不過好彩o係我想放棄之際就見到白白淨的店子出現眼前.

Around 1:00幾去到無乜人.  店內裝修就普普通通啦, 對正大門的 display 可以見到 dessert 的 samples. 

而牆上就掛有繪書形式的甜品介紹. 



今次 order 左一客 Mango Fever 試下.   而家做緊 promotion 都要 $58 的.  不過個樣又真係幾吸引的, 起碼跟見到o既 Sample 有9成似.

如果係 Mango 愛好者, 呢個 Mango Fever 相信都應該可以滿足到的.   因為都真係由頭『芒』到尾的.  最頂頂的 mango 雪葩酸酸的好開胃.   原味的 Yogurt 都唔錯.  中層仲有 Mango Pudding, 夾埋一齊食, 好正.  食到底都仲有唔少芒果肉.  整體而言都係一個抵食o既 dessert! 

唔知仲有無機會黎試埋另外其他口味o既 Yogurt Dessert 呢 ?







週六開心 Lunch @ 清真牛肉館

星期六趁要到九龍城買材料 for 自家 Shabu 之際, 跟老公順道去左清真牛肉館食lunch! 今次係第一次於午市光顧. 估唔到食客都唔少的.

由於要留肚去試甜品, 所以都唔係叫左太多野食. 當然黎到就一定會叫不食不行的清真牛肉飽. 真係好好味.

再黎就係今次o既新嚐試, 三絲麻醬冷麵, 味道係唔差的, 只係麻醬食得多有點膩.

另外為左要食銀絲卷而叫左一客咖哩雞.  真係好有水準.

老公仲順便試埋佢o既豆漿, 原來都真係幾好飲咖.

週年 lunch @ 上環梨花苑

實在係好難得的機會老公可以過黎陪我食lunch的, 繼上次帶老公去左西港城的Das Gute試西菜之後, 今次就跟老公去試附近一間我同公司大親友都幾鐘意食o既韓國餐廳 - 梨花苑.

梨花苑o既坐位環境講真就非常之麻麻的, 張張枱都好迫好近.   不過附近想食好少少o既韓國料理又的確無乜得揀.   雖然環境就唔係太理想, 但食物質素就有番咁上下的. 

今次我跟老公各自要左一款石頭鍋飯, 落完order後會先送上8小碟的韓式前菜, 都幾好味咖.   特別鐘意佢o既粉絲 & 醃蘿蔔. 

跟住仲有一碗普通過普通的蘿蔔湯. 

到主菜登場了:  老公o既係石頭海鮮鍋再加粉絲.

而我呢個就係石頭什錦鍋. 

飯後仲有一杯飲品送的, 我地都一齊要左凍o既柚子茶, 好味呀.

食飽後就跟老公去左 City Super 行街兼買料 for tonight's anniversary dinner!!  當然大廚嘛仍然係由老公擔任啦!!! 

Tuttimelon新口味 - 綠茶 & 黑芝麻

自從成家 (老公除外) Froyo 上癮後, 去完尖咀食飯後的指定動作就係去 The One 的 Tuttimelon 食 Froyo 喇.  咁o岩上次去到有新味試呀! 仲要係媽咪最愛的綠茶 & 黑芝麻味添!

呢杯係我跟老公的, 都有試新味咖, 不過比大大堆的益力多味遮晒囉!  

媽咪兩樣都有試仲要加埋 Monster size 的 Blueberries!

細妹一樣兩款試晒 ~

總結係: 綠茶味唔夠濃, 好似奶味重左少少.  黑芝麻就真係好正呀.  想試就快喇, 因為新口味唔知幾時完咖嘛.