4月6日 (星期二) 中目黑 / 新宿 (重點: 臨別趁天氣好睇多幾眼櫻花)
黎到行程的最後一天了. 早上食完早餐番上房作最後checking後就拉著重重的行李去check out. 由於由酒店出發到羽田機場的Limousine班次實在疏得緊要, 若真的要坐Limousine我地就要早早2:00幾就要起程, 咁太唔化算了, 因為今晚我地搭乘的ANA航班起飛時間係2045, 咁早去機場做乜呢, 所以我地決定比多少少訂 van 仔直接出羽田仲好, 起碼時間可以由我地話事, 於是我地就book左5:00先走, 預埋少少塞車, 時間都應該頗鬆動的. 攪掂book車後我地又再四散了, 細妹跟媽媽先到生地館作最後沖刺. 而我跟老公就決定再到另一賞櫻地 -- 中目黑的目黑川. 搭JR好快就到了目的地, 沿路有指示好快就搵到目黑川了, 目黑呢個地方都比較閒, 無乜大型百貨店, 但就見到好多拉麵店呀, 下次可以黎試下的.
到左目黑川喇, 果然隔左咁多日後, 櫻花又再開得比之前其他地方所見的更燦爛了.
而且仲有唔少開始落花了, 有時大風一吹.... 好似落雪一樣咁靚呀..
一地的櫻花瓣, 將街道都染得一片淡粉紅, 好靚呀.
真係好唔捨得眼前o既美景, 唔知下次幾時有機會再幫櫻花映相呢?
兩公婆博命映, 映到夠果陣都已經差唔多12:30有多了, 又係時候番新宿搵食. 其實之前一晚都有上網search下無乜好食的, 不過實地考察後就覺得好似麻麻地, 於是臨時就改左去以下呢間『鍋 Zo』試下, 係我地至愛o既放題啊. 個樣有d似我地去越谷果晚食果間. 牛 & 豚 實在太好味了.
食埋呢個咁豐富的午餐後, 我地見仲有時間剩, 當然就係番酒店附近作最後沖刺啦. 再見了美麗的日本藍天白雲! 之後大家準時於16:45集合 get ready 就於17:00落到1/F 會合接載我地出羽田空港的Van仔.
由酒店的Lobby望出去見到新宿御園的櫻花還在盛開中!
估唔到今日唔太塞車, 去到空港都未夠18:00, 而ANA counter 就要1815先開始做check in, 所以我地就先去還 mobile 之後等...等...等... 終於可以check in了, 之後又忙於入閘. 其實應該先去T2行番轉先的, 因為T1實在太細了, 可以話係無野行的, 我都只係買左份三文治上機食. 不過見到佢話2010.10 羽田空港會擴大重開的. 唔知到時會唔會好少少呢?
飛機餐內惟一吸引到我的除了麵包外就係呢個看似唔的北海道布甸, 可惜係唔好味的!
在大堂等上機之時, 腦中不期然的不斷諗起12月時跟老爸最後一次在這空港的候機大堂等上機趕番香港, 果陣見到老爸的身體狀況真係一路路轉差, 心中最怕的就係佢要受苦一段時間先番到香港. 當然而家一切都成為過去了, 爸爸固然唔需要再受痛症的折騰, 理應我係為佢感到高興的, 但想念爸爸o既心就從來沒有退過! 在整個旅程中每每遇到開心滿足之事都會希望爸爸可以跟我地一齊 share!
而在爸爸的保祐下, 我地今次14天的東京花見之旅又完滿結束了. 下次會幾時再去玩呢? お楽しみに。
沒有留言:
張貼留言