3月30日 (星期二) 新宿御園 (重點: 揀o岩日子 & 天氣) [上篇]
一起身打開窗簾望望, yeah! 絕對係陽光充沛o既一日呀. 睇黎今日應該去新宿御園賞櫻應該無揀錯的了. 今日陽光普照. 我地食完個豐盛o既早餐後就慢慢開始由酒店徒步去新宿御園了. o係酒店大堂 Lift Hall 見到一棵櫻花, 當然要映低啦!
我地今次選擇了在另一邊的入口千駄ヶ谷門進場. 由酒店行過去大約要15分鐘啦, 選o係呢一邊進園係因為會少人d. 因大部份遊人都會由新宿門進園的. 果然去到唔係太多人, 拿拿聲買票進場. 一個咁大咁靚打理得咁好的公園只係收你200円入場費, 我自己真係覺得抵到爛呀. 可惜張門票一過入閘機就被收走了, 好彩入園前映低左張相留念!
一入園後我地4個都嘩嘩聲的叫了出黎, 因為個景真係靚到不得了呀. 除了有唔少櫻花樹盛放櫻花之外, 仲有一大片綠油油的草地啊, 真係唔知幾多年無見過咁正o既草地了. 香港果d所謂公園真係唔該行埋一邊. 大家二話不說的就直向唔同的櫻花樹進發映相. 原先諗住會分散各自攞景的, 但最終還是先走在一起跟櫻花一齊拍番幾張團體照先再解散. 日本本土都有唔少攝影發燒友到園映櫻花, 好彩個御園夠大, 加上我地去呢日唔係假期, 所以大家都唔會阻到大家取景的.
狂映一輪大合照後就解散各自去搵靚景了. 御園真係好大, 我地行左成大半日都完全無機會再碰到面. 我就好忙咁四圍映, 老公就一於無我咁好氣, 坐下草地休息番陣先. 我都唔執輸咖, 映完一輪都走去草地度嘆番陣先. 嘩...感覺真係好正呀.
抖完一陣後又再出動, 雖然話御園入面有好多唔同品種o既櫻花, 但坦白說我真係唔識分, 我只係見到靚就映, 完全唔知自己映左乜野品種, 再加上有d品種相信係未到開花時候, 所以都唔察覺到究竟自己映左幾多唔同o既櫻花. 只知有d係淡粉紅色, 有d白色, 有d深粉紅色, 不過就全部都好靚, 配埋background 的大草地, 水池真係一絕.
o係御園內實在有太多靚花靚景可映了, 我地真係密密映到無停手的. 由於相片實在太多, 下一篇再繼續分享!
沒有留言:
張貼留言