爸爸在日葬禮 - 散心篇

當爸爸在日的葬禮完成並接過爸爸的骨盅後, 我地就由岸和田車站搭車番關西空港的Nikko Hotel, 先行將爸爸的骨盅安放好後. 由於當時只不過係下午4:00左右, 我地決定出外走走散散心吧. 如果由關西空港搭車去梅田區比較遠, 最後還是選擇了跟大家到空港附近的一個outlet區 Rinku Town逛逛吧. 在空港的書店發現多本安室做cover girl 的雜誌!

除了書店有勁多安室雜誌外, 在CD店亦同樣找到安室新大碟的予約廣告.

搭車去到呢個Outlet Area都係10多分鐘, 想不到這個Outlet Area又真係幾大的, 我地o係果度都逛左幾個鐘頭, 仲有唔少戰利品添咖. 晚上著左燈再加上有聖誕裝飾的大觀覽車都幾吸引的.

行左一半o既地方後就去左老麥醫肚, 呢款生菜煙肉burger真係好正. 如果香港都有就好喇.

補充過體力後又再出發去另一邊的名店Outlet行下, 見到好靚o既 Xmas Deco啊.

在往商場的路上看著媽媽孤單的身影覺得有點傷感, 我想媽媽心裡應該比我們更掛念著爸爸吧. 以往有爸爸相伴一起逛街的她現在只能獨個兒上路, 看得出她就算在逛街也是逛得心不在焉的. 相信媽媽都需要好一段時間才能將心情整理好. 希望大家可以互相扶持, 慢慢站起來再重新上路吧.

行完名店 Outlet再集合, 經商議後就決定番到空港先食晚飯了. 晚飯最後選了在空港商場內的一間拉麵店. 味道不過不失吧, 點都比香港的所謂日本拉麵好味的, 而且餃子也算不錯.

飯後由空港行番酒店時經過ANA counter見到棵 Xmas Tree 上面的吊飾好靚好特別.

睇下 ~ 其實今日行左一陣 outlet shops都有收獲的!

仲買定宵夜添咖, Melon 飽就變成我第二朝在返港班機上的早點了. 而WT亦o係 Lawson買左佢鐘意o既關東煮, 佢話味道都唔錯添.

過埋今晚, 聽日(14/12)星期一我地就會帶住爸爸一齊番香港了. 番到去仲有好多手續要辦, 不過好彩o既係我地反正都請了大假就可以慢慢安排, 仲應該有時間多d陪下媽咪添!

爸爸在日葬禮 - 進行篇

休息一晚後起床時發現自己的右邊臉不知何故腫了很多, 眼睛也差不多張不大了, 不過也顧不了這麼多了, 集合時間到了, 其他屋企人見到我腫起臉的樣子都忍唔住發笑, 因為真的好似變左另外一個人咁樣. 順利於9時15分左右就到達公益社了, 途中經過一戶人家的小花園看見一些比較特別又美麗的植物.

另外沿途亦不時見到很多不同品種的紅葉植物.

在到達公益社後大家當然先行到安置房再一次探望爸爸, 根據昨天間永先生的指示, 由現在起直至出發到火葬場呢段時間我地還可跟爸爸見面, 因為一旦遺體運到火莽場後就將不會安排送別見面的了. 所以大家都把握呢段最後的時光多看爸爸幾面. 而間永先生就跟我解講了在日本進行葬禮的應有程序, 例如佢地會將線香粉末撒進一個點了火的盆子內作為對爸爸最後的告別. 另外跟香港最不同的就是我地昨天所訂的兩個鮮花籃內的鮮花將會由家人親手放進棺木內伴著爸爸, 我覺得呢個安排真係太貼心了, 到最後一刻我們還可以近距離的跟爸爸接觸並好好的替爸爸的最後之旅作好準備, 對家屬而言真係一個非常好的安排. 在跟爸爸作出告別後, 間永先生就在我們面前把籃子內的鮮花剪下來交給我們逐一的放在爸爸的棺木內作點綴, 看著被鮮花圍著熟睡中的爸爸真的很安詳啊. 之後我們還將昨晚買到的一束鮮花及生果都通通放在爸爸身旁. 至此基本上都準備好可以出發到火葬場的了, 不過間永先生最後還安排我們每人以一片小葉子沾點水濕潤一下爸爸乾涸的咀唇, 他說這樣可防止先人上路時喉嚨會太乾涸! 時候到了, 看著爸爸的棺木徐徐蓋好蓋子後, 我們便搭乘間永先生為我們預約好的Taxi跟在爸爸的車子尾後出發往火葬場去了. 在往火葬場的途中見到很多漂亮的紅葉, 而原來火葬場所在地面對著的一大片山頭也有不少紅葉植物, 環境真的很不俗.

大約11:00到達火葬場後, 先上線香粉末跟爸爸告別, 然後我們就被帶到後面的火莽處, 在那裡看著爸爸的棺木放好在指定位置後由工作人員輕輕一推就進了火爐內, 跟著由間永先生在我們面前按下火爐的大掣, 此時要好好控制眼淚實在不易, 眼看著早兩天還跟我有傾有講的爸爸, 現在快要隨著一絲輕煙變成另一種形態出現, 真的很難受.

而據間永先生所講整個火葬過程需時大約2-3小時的, 所以先行安排我們搭車到附近一間食店吃了一頃午飯, 清清淡淡但味道不俗的菜色.

我們在這家飯店逗留至大約01:30分時就有Taxi來接我們再度返回火葬場. 回去後原來爸爸的火葬儀式已經完成了, 跟香港的最大分別就是這兒會安排家屬根據工作人員的指示而親自將爸爸的骨放入之前購備的白色骨盅內. 呢個環節係我們之前沒有想到的, 所以當第一次聽到間永先生跟我講起時我真係有點怕誤會了佢o既意思. 看著之前放著爸爸遺體運進火爐的箱子現在再度出現在眼前, 打開後就只剩白色的骨頭, 心中的痛真係難以形容. 我地大家先跟隨工作人員及間永先生的指示把爸爸的骨由足部開始放進骨盅內, 每放一個部份工作人員都會跟我們講解清楚所放的係屬於爸爸身體的哪一個部份. 慢慢的我們就將爸爸的頭蓋骨也放好入骨盅了, 此時工作人員幫我們把骨盅蓋好再用白布包好後就由間永先生手上慢慢的將爸爸移交到我們手上了. 這刻大家的心情同樣難過不已, 而在媽媽小心奕奕的接過爸爸後, 大家便再度乘回原先的Taxi由火葬場離開返回岸和田車站準備搭車回酒店.

在到達岸和田車站時我們見時間尚早便在附近的藥房逛了一會, 期間還讓我看到這個安室最新的Vidal Sassoon 廣告板.

之後由於乘車時間未到, 我們便在車站外圍映映相, 花圃都有不少美麗的花卉, 有些品種係我第一次見到的. 大家映完相後時間剛剛好的就搭車直返酒店去了.

至此爸爸在日的葬禮基本是完美地完成了. 在此我們真心感謝當中協力的所有參予人士, 在整個過程中每位工作人員對家屬們都表示出很真誠的關心與慰問, 而對爸爸亦是十分的尊重, 這點我們真的很感動. 說真的我也曾在香港參與過親友的喪禮, 亦曾親眼目睹工作人員對故人的不尊重及冷漠, 所以今次縱使在他鄉遇到這麼不幸的事件, 但對於能遇到很多誠懇認真提供協助的人, 大家都真心感到很幸運.

相反我真的想借爸爸今次在日本遇上問題一事反映一下香港的入境處的不足. 你試想想如果當你屋企人在外旅遊時遇到問題而又想找自己的政府幫助之際, 對方在接到你來電查詢時只表示一頭霧水之餘仲未能提供任何有用的協助, 你會覺得點呢? 坦白講當我一知道要盡快找機位趕回香港之時, 我當然唔係立即就想要找政府幫忙, 反正這點事我相信自己係可以辦到的. 但當爸爸已經離世後我們再打去入境處詢問有關如何將遺體運回香港一事時, 真想不到入境處一樣係提供唔到任何有用的資訊, 佢地就只給了一個駐大阪的中國領事館電話我地著我們自行再打去問問有沒有什麼要跟進. 老實說, 我們身處的國家是日本啊, 難道佢地真係以為我地當中一定會有人識講日語可跟當地工作人員溝通的嗎? 再者就算打去中國領事館說的是國語, 我想問身在香港的入境處官員係唔係真的以為本港居民的三文兩語真係咁靈光呢? 算吧, 反正今次我們慶幸自己做學生時所學的語言沒有白費, 我可用日語跟當地人順利溝通, 而妹妹亦可用國語跟中國領事館的負責人交談. 但總的來說就係他們完全沒有幫到忙, 反而係日本當地的警察, JAL Staff, 同埋負責葬禮的公司真的一直給予不少支持及援助.

下一篇再講下接左爸爸番酒店後我地有乜行程!

爸爸在日葬禮 - 籌備篇

呢一篇Blog主要係講述爸爸在日本舉行葬禮前的安排事宜.

在酒店安頓好後, 我跟WT小休了兩個鐘頭便再出發到負責爸爸今次在日本葬禮安排的『公益社』, 擔當的間永先生一早就在公司等著我跟WT的到來. 他先行帶我們到安放爸爸遺體的安置室等待. 安置房的擺設給人一種很像家的感覺, 進門後的柔和燈光, 一套幾件的大型梳化椅, 還有一張小茶几, 在房間的角落還放置了熱水壺備有綠茶 / 咖啡奶茶. 若果不是房間其中一邊安放著爸爸遺體的箱子, 這間房看起來實在不像一間準備舉行喪事的房間. 間永先生在讓我們在安置室獨處了一會後才進房來跟我商談有關爸爸葬禮安排的事宜.

除了沒有法師在場訟經外, 在日本的葬禮基本上跟香港的大同小異. 間永先生先將預算及儀式的簡介跟我們解釋了一下, 除一些基本開支外, 我們還可選擇靈龕的大小, 同時亦有鮮花做的花籃供我們選擇, 為了使房間看起來多點生氣, 我跟WT決定多要兩個中型的鮮花籃, 當中有百合, 白菊 / 黃菊, 蘭花等. 而間永先生除了替我們安排好葬禮的儀式外, 還會帶我們到大阪府內的市役所交form, 申請火葬許可證等手續. 由於當日o係星期六, 政府部門負責人要專程趕回來替我們辦理申請, 所以間永先生首先安排我們到公益社附近的一間小店吃了一個輕食的lunch. 想不到呢間小店的蛋三文治又真的做得不錯.

我跟WT就在小店稍事休息到下午約1:30多就由間永先生驅車將我們帶到其中一個政府部門提交了死亡證, 之後再載我們到市役所提交火葬許可證, 此時就要再繳交30000 Yen作火葬料給市政府. 在辦妥所有文件後, 間永先生就車我們回到公益社, 再次回到安置室等待時發現原來我們之前所訂的鮮花籃已運到房間了, 多了兩個花籃安置房看來就更warm了. 之後間永先生為我們準備各種文件的copy, 領收書等等. 隨後他跟另一位工作人員再次到訪安置室並於我們在場之時替爸爸換上明天進行喪禮儀式的棺木. 日式的棺木所用的木料可能不及中式一向見到的這樣大型, 不過外型上就簡潔得多, 而且木色較白, 給人很整潔的感覺. 棺木內還有乾冰提供, 另外棺木蓋的上方還有一個小窗子, 打開後就可以見到爸爸安詳的遺容. 爸爸就好像熟睡了一樣. 另外間永先生亦告訴我們可以把爸爸之前所穿的衣服放回爸爸的身上, 如果我們有自行帶來的食物, 生果, 鮮花等亦可以放進棺內給爸爸.

當我們以為一切都差不多準備就緒之時, 卻見間永先生手上多了一個Digital Photo Frame, 心中正想這個不知有何用. 但當間永先生把Photo Frame接上電源看到出現的畫像後, 我跟WT真的不能控制的掉下淚來. 因為畫像所示的正是我之前跟間永先生提起何解會把爸爸帶到日本的原因 ....因為爸爸要看日本的聖誕燈飾. 間永先生就是從Internet下載了日本不少地方的Xmas燈飾. 眼見這麼窩心的安排, 你能不感動嗎? 實在不得不多謝他們這麼貼心的安排, 那爸爸就可以好好的欣賞到他到最後還一直嚷著要看的燈飾了, 爸爸可會滿意這個安排? 另外間永先生真的很用心的替我們print印了明天葬禮進行的行程表, 他還跟我們說公益社是開24小時的, 他們歡迎我們在任何時間來跟爸爸見面. 於是我跟WT商量後就決定先回酒店再接細妹跟媽媽到來跟爸爸見過面.

當我們回到酒店附近時如果已經差不多是下午5點多了, 剛好在回酒店房時就跟媽媽及細妹碰上了, 於是又再齊齊出發到公益社探望爸爸. 在途中我們還在一間超市買了一束鮮花及一點生果送給爸爸. 而到達公益社後, 媽媽跟細妹看來也挺滿意安置房內的一切安排. 就這樣我們一家人就好像在家中的客廳中陪著爸爸, 傾傾講講的, 之後再上一次線香給爸爸後我地就先行離開去醫肚了.

今晚晚餐就選了在公益社對面的一間燒肉店, 我地還點了50品的燒肉放題.

感覺上好像是跟爸爸一起用膳的樣子! 大家心裡都明白到爸爸今次的離開係得到解脫, 知道爸爸唔需要再受苦時, 其實係一種relief, 所以大家盡量都希望能以開心輕鬆的心情去面對今次的事件, 相信爸爸也不想大家終日愁眉苦臉咁過日子的. 爸爸, 你睇下我地今晚叫左咁多美食咖, 仲有飯後甜品柚子雪葩每人一客兩球!

我地會盡力去過每一天, 你也不用再為我們操心的了! 大家邊吃邊講, 很快90分鐘就過去了, 走時見到餐廳外呢棵咁得意o既植物.

可能之前太怱忙的關係一直都沒時間細看原來酒店附近的Xmas燈飾佈置也不錯的. 心裡總覺得有點可惜未能讓爸爸親眼欣賞到如此美景.

不過傷感過後, 生活還是得繼續的. 回到房間後就要好好休息因明天還得早點回到公益社為爸爸的葬禮作最後的打點. 可惜臨睡前的我還是忍不住在WT面前痛哭了一遍, 心中盡是對爸爸的懷念, 加上不停的自問究竟有沒有做得不足的地方, 如果沒勉強帶著爸爸到日本的話, 結局可會改寫? 不過誠如WT所講, 冥冥之中自有主宰, 今次所有事都可能正是爸爸的悉心安排, 如果真的是這樣的話, 我希望爸爸能在彼岸活得更開心快活. 當然對我黎講爸爸係永遠都活在心中的. 無論去那裡做什麼, 我相信爸爸都會伴在我左右的. 公益社, 大阪, 旅遊, 日本, 燒肉放題, 綜合, 聖誕, 葬禮, 關西

爸爸在東京的最後一刻

呢篇Blog主要係要記錄好爸爸最後跟我們在一起所發生的事.

首先爸爸於11月尾完成患病後第3次腸部手術後, 其實康復進度算不俗的, 起碼醫生都覺得爸爸進度雖慢但算理想. 所以我地一家都相信一早安排的日本東京聖誕之旅係可以如期出發的. 期間亦不停每日的徵詢著醫生的意見以確保爸爸o既狀態係 fit for travel的, 而同時當然我都已經著手安排 contingency plan的. 萬一醫生說絕對不讓爸爸出院的話, 我地係打算將東京之旅押後的. 所以其實安排今次o既行程都真係幾有難度的. o係度我要多謝我o既 travel agency - Eva, 佢今次真係幫左我好多, 除了要為我不停替我的package extend deadline之外, 仲一邊幫我check住其他日期的機位.

到最後在得到醫生的許可後, 我地一家總算能如期出發. 原定出發日期為12月10號, 行程將會直到20號為止, 期間14 - 16號仲會跟爸爸去到 Tokyo Disneyland 入住 Disney Hotel, 欣賞Disney Resort內兩個樂園的 Xmas deco. 因為上次6月之旅時爸爸在住過Disney Sea內的Mira Costa Hotel 後就講過想入住新開不久的 Disney Hotel, 我地當然立即就安排啦, 心想今次應該可以滿足到爸爸的要求了. 而爸爸亦對今次之旅係極度期盼的, 所以佢在手術後都好聽話一心要等自己康復過來, 跟大家一同出發. 最後在醫生的批准下, 爸爸於出發前一天就被安排出院了, 事前我地為左令爸爸可以在比較舒適的情況下赴日, 所以一早就在紅十字會租借了一部輪椅給爸爸, 心想這樣爸爸就可以唔需擔心體力不足而不能隨行了. 於是一家人就準備就緒的在12月10日出發了. 仲記得出發當日, 爸爸早上起床後除了有點疲倦之外, 身體上都沒有什麼太大的不適, 一行五人順利在JAL counter check in 後就在工作人員帶領下由特別通道走到登機閘口等候上機. 上機後大家安頓好後, 爸爸都開始休息一會. 下機時就在當地的JAL Staff協助下順利過關並領取行李. 之後我就先行到 JAL counter租用 mobile, 然後看看時間還來得及搭到16:15的Limousine Bus 到酒店, 時間太夾了. 當時爸爸雖然有點累, 但還可以自行走下輪椅上巴士的. 我地約於19:00到達新宿了, 立即到酒店check in, 跟酒店negotiate一輪後換到想要入住的room type, 順利將爸爸安頓好, 先行休息一會. 而我地3人就快快地趕到對面高島屋地庫的食品館買點食物再返上酒店一齊開餐. 途中見到高島屋一帶的 Xmas Deco, 真係好靚啊. 一心想著晚一點待爸爸休息過後, 可以帶佢落黎睇睇, 如果爸爸今晚太累的話就留待明晚才看吧. (那時絕對想不到原來爸爸已無緣親眼近距離欣賞到這麼漂亮的燈飾了). 回到酒店房後, 爸爸還一臉滿足的跟我們說他剛洗完澡了, 而媽媽就正在替他準備晚餐. 爸爸一邊躺在床上休息看電視, 一邊看看我們幾個忙於將從高島屋食品館買回來的食物放在?上等開餐. 正餐完成後, 我地仲將買回來的 Xmas 限定蛋糕拿給爸爸欣賞, 爸爸還說 "這件太多cream了, 我唔o岩食的, 要將cream 拎走先食得喇" 之後媽媽比左少少蛋糕爸爸試味. 不久當我地食完蛋糕後, 爸爸都差唔多時間要休息了, 於是大家就從爸爸的房間撤退, 原先諗住不如去高島屋映下 Xmas Deco 的, 不過由於有點累了所以大家都係決定先回自己o既房間休息, 明晚有機會才再映相了. 當時大家都想不到原來明晚已沒有機會跟爸爸去映相了.

休息一晚過後, 第二天早上照原訂計劃去到20/F的餐廳食早餐. 在被安排坐位時見到原來妹妹跟媽媽已經到了餐廳, 不過一看媽媽的樣子就有點心知不妙的感覺了. 果然當服務員將我們安排坐在一起後, 媽媽再也忍不住眼紅紅的跟我們說 "爸爸好像不行了" 當下真的心裡一沈, 心中想著的只是應該立即做點什麼去幫爸爸. 在向媽媽了解清楚爸爸的情況下, 我們都快快把早餐食完就番上房分頭行動了, 我就先行要跟香港的 Travel Agency 聯絡, 希望盡快安排到回港的班機. 而在 Agency 幫忙找機位的時候, 我地就分別聯絡過香港的入境處, 保險公司, 同埋林醫生, 將爸爸的情況一一交待清楚. 當中就只有林醫生係最幫到忙的. 林醫生在聽過我們敘述完爸爸的情況後, 就跟我們說會先替我們準備一封醫生信給 airline 以便安排更改班機回港, 而我的travel agency就忙於為我安排最快的班機回港. 一開始的時候, agency跟我說最快只可以安排到星期日 (13/12)的機位, 當時我心想應該也沒多大問題吧. 於是立即再趕到爸爸的房間看看爸爸的情況到底是怎樣. 誰知一進房看到躺在床上的爸爸時....我真的不知該說些什麼, 心中想到的只是絕對不能等到13/12才將爸爸送回港. 於是我又快快的跟travel agency聯絡上, 希望可以安排到今晚晚一點的班機, 不論是任何airline的我也要. 終於幾經努力, agency跟我說JAL可以讓我們改schedule 飛當晚(11/12)晚上8:45的班機回港. 我地當然係求之不得吧. 心諗只要有班機可以安排到, 問題應該不大了. 之後我們還要忙於安排包車由新宿的酒店趕到羽田空港, 期間多次探望在房中休息的爸爸, 不過眼見爸爸的氣息真的愈來愈差的樣子, 心情真的壞透了, 腦裡真的完全係亂作一團的. 最後我地順利check out 酒店, 登上包車後就出發直奔羽田機埸, 在JAL counter 等候check in 時, 工作人員其實已不停的在查看爸爸的身體狀況是否適宜飛行, 因為機程都要4 - 5 小時的. 當時爸爸的狀態係除了有點呼吸急速外, 其實都沒有太大問題的. 於是在擾攘一會後, 工作人員就將我地先行帶到閘口準備登機. 誰不知當晚不知所為何事, 羽田空港的其中一條跑道封閉了, 所以我們原訂乘搭的JL8739於8:45起飛的班機將會延至9:15. 就係咁我地就乾著急的在boarding gate等待. 由於係priority service的關係, 當飛機ready後, 我地就被安排先行登機, 期間仲要為爸爸由原本自己租用的輪椅換到JAL上機專用的輪椅, 在換椅的期間其實都不難察覺爸爸好像氣速得更厲害了.

在機上終於安頓好, 飛機亦順利起飛了. 爸爸就半閉上眼睛休息, 隨後覺得爸爸的呼吸好像變慢了, 過了不久就有機組人員跟我們說要跟爸爸 take pulse以確定爸爸的身體狀況是否正常. 就o係呢個時候, 媽媽就發覺爸爸好像沒有呼吸了. 而呢段期間我同細妹就忙於跟空服商議最適宜o既解決方法, 就空服而言, 佢地當然係覺得最好就折返羽田機場, 但正如機上一位來自香港的空姐May所講, 佢都好明白現在家屬最希望的當然就係想盡快將爸爸送番香港, 不過最後我地雙方都取得了一個雙方都較易接受的方案就係讓班機在關西空港緊急降落, 佢地係希望到左關西後, 醫護人員可以盡快上機幫爸爸進行急救. 但其實在機上當空姐宣佈機上發生醫療事故後已有一位自稱係護士的日本女士跟爸爸進行過基本的檢查, 當其時已差不多係確認了爸爸沒有了呼吸 & 脈搏的了. 換言之, 爸爸在機上已經離我們而去了.

o係度其實我都想感謝所有JAL的工作人員, 他們的確向我們提供了不少協助的, 當然我也想向受我爸爸呢次事件影響到班機延誤的所有乘客說聲對不起, 如果沒有這件事發生, 相信他們的行程不會受到這麼嚴重的延誤, 猶幸機上的乘客在得悉飛機要在關西緊急降落時亦沒有什麼怨言, 真的很感謝大家的體諒.

之後航班若於晚上11:15在關西空港降落, 在航機停好後就立即有一大隊的醫護趕上機, 走到我們的座位, 馬上就將爸爸從坐位上拉下來橫躺在走廊上進行一連串的急救, 之後就急急的將爸爸送落機了, 呢個時候亦係最混亂之時, 我就被安排為會跟爸爸送院的人, 而其他屋企人就會另外有車送佢地. 我緊跟爸爸的尾後落機, 到了停機坪後醫護其實仍然努力在為爸爸搶救的, 不過當時其實我已心知爸爸真的離開我們了. 過了不久有一位駐機場的醫生跟我說明了佢為爸爸進行的各樣急救都顯示爸爸已經係返魂乏術的了. 本來尚算冷靜的我在聽到醫生親口跟我說爸爸已經過身的消息後都開始忍不住, 眼淚亦不停流下. 工作人員好快將我安排上了一輛私家車等候, 而同時我亦看到醫護人員將爸爸從原定送院的救護車上轉到另一輛較小型的救護車上, 當時我還問工作人員我地將會去邊, 工作人員說由於爸爸已經確定死亡, 所以無需送院, 佢地會安排我們先到就近的空港警署落口供等等.

就係咁我坐在警方的私家車上看著載有爸爸遺體的車不停的哭, 過了不久我就被帶到了空港的警局去了, 由於我係第一個家屬跟著爸爸遺體到達警署, 警官就先安排我到放置遺體的地方跟爸爸先上線香. 當我再次親眼看到爸爸時同再親手觸摸到爸爸時, 眼淚真的立即奪眶而出, 幾經辛苦才能再次好好地控制自己的情緒. 在確認了爸爸的遺體後, 我就被帶到警署內等待隨後趕到的家人, 然後我就被帶到上2/F的生活安全課落口供, 而期間其他屋企人就在大堂等候, 事後屋企人跟我說起工作人員都好好照顧他們, 為他們買了熱飲又陪著他們一起等候, 在落口供期間我已跟警官們說明了想盡快辦妥爸爸的身後事回港. 所以在落口供期間, 警官們已一邊幫我們安排了法醫到場替爸爸作檢查並簽發死亡證, 另一方面有一位警官就為我們聯絡到在當地辦理葬禮的公司『公益社』, 他們還細心的幫我問妥了不同的處理方法及所需價錢. 在商議後我地一家決定將爸爸在當地火化再將骨灰帶回香港, 因為一來價錢上有點差異, 例如火化葬禮的安排費用就大約為30 - 40萬日元, 如要原屍帶回香港的話, 就要再加多12萬日元作防腐的程序. 而且相對時間會較長, 回港手續亦會相對的比帶骨灰回港複雜.

同時間JAL的staff亦為我們安排了住宿, 他們會為我們先付頭一晚的住宿, 酒店就book了在關西國際空港隔壁的Nikko Tower, 除第一晚住宿外, 之後就由我地自己負擔番宿泊費, 不過他們亦很有心的替我們予約了特惠的住宿plan. 到此真的不能不說句日本人的服務真的很貼心, 在這難過的時刻, 他們的確為我們提供了不少協助. 可幸自己的日語尚能跟他們溝通, 因而省卻了翻譯的時間. 但要完成所有程序都已經係早上5時多了. 在臨離開警署前亦安排到葬禮服務公司的負責人來跟我們先見一次面, 大體上講解了爸爸葬禮的安排, 然後還再次安排我們跟爸爸說句再見才將爸爸的遺體運到葬禮公司. 而呢個時候JAL亦派了兩位staff來為我們運送行李及替我們安排酒店check in.

下一篇將會講解一下爸爸在日本的葬禮安排.

再見了, 親愛的爸爸!

12月11日對我們一家人黎講將會係一個永遠都唔會忘記o既日子. 因為我最敬愛o既爸爸在經過咁長時間o既努力抗爭後, 終於都o係呢日離開左我地了.

一向愛跟家人出門遠行的爸爸今次亦係於跟我們一起到東京遊玩的期間離開, 雖然今次之旅比呢個突如其來的事情打亂了, 但我們相信呢個係爸爸o既安排, 而且之後一切o既安排都係爸爸精心策劃的. 希望爸爸滿意吧. 詳細情況就待我有時間才再慢慢在此記錄下來吧.

爸爸, 好好休息吧. 其他事我們會好好 take care的了, 你唔需要再為我們擔心的. 我們都會為你好好照顧著媽媽的. 明白到爸爸你不用再受苦後, 我們也感到很欣慰!

Daddy R.I.P.

跟爸爸在東京的最後晚餐

其實有諗過唔寫呢篇Blog的, 因為都唔係什麼愉快的記憶. 但又覺得好歹也是跟爸爸最後一次到東京的回憶, 不寫下來總覺得好像欠了些什麼. 最後還是覺得記下來等將來睇番的話可能會想起爸爸在最後一刻能跟我們同遊東京係多麼開心的. 那,好吧, 寫就寫啦!

話說2009年12月10日的早上天朗氣清的一天, 我地一家又再出發去日本東京了, 心想今次或許會是最後一次跟爸爸的家族旅行了, 因為自爸爸11月尾入院到完成第3次手術後身體狀況都係時好時壞. 在臨要出院時仲係唔太穩定咁, 但兩位負責醫生都覺得既然爸爸心願係同我地一齊出發去東京睇燈飾的話, 再加上爸爸o既身體狀況唔係太壞應該可以應付旅程的, 那就順他意思做吧. 所以在出發前一天準備出院時, 醫生已向我們講解了有可能發生的worst scenario, 算係比足心理準備我地咖喇. 同時佢地都為爸爸準備好在旅程期間要服食o既所有藥物, 林醫生更貼心的叮囑我們萬一有任何事發生都可以隨時致電點港找他! 於是我地在12月9號晚將爸爸從浸會醫院接回家了.

入院差不多有大半個月時間, 爸爸當然對能出院感到開心吧, 不過我想其實佢自己都知自己身體狀況係點的, 可從爸爸的表情看得出佢其實都係擔心 / 開心各半吧. 但係能夠出院點都係一件開心事的, 始終o係自己屋企點都舒服d o既, 我亦對爸爸能在家中甜睡了一晚感到安慰.

到左第二朝早 (12月10日),一如以往o既旅程, 大家都係先在爸媽家中集合再出發的, 爸爸的氣色看來也很不錯, 只是體力有點不足. 不過最終都能順利一同起程搭的士去到機場, 我地出發前o係紅十字會租用了一部wheelchair比爸爸, 咁樣爸爸就唔怕中途會攰又無得休息啦. 在JAL counter check in 後就有工作人員帶我地一家過關之後再帶我地去到閘口準備登機. 雖然我地今次出發時唔可以再好似往日咁先去嘆番個茶先行, 但都總算有時間走左去Burger King 買左飽留番上機食.

上到機後安排好座位後順利起飛, 望到窗外的藍天白雲, 當時真的很感恩又有機會一家五口外遊的.

當班機到著成田空港後, 再有日本方面的JAL staff帶我們由特快通道過關, 順利領回行李後, 有時間去租埋手機, 仲要趕得到搭Limousine直到酒店. 在整個過程中爸爸都應付到, 當然體力就大不如前, 不過在WT的協助下就能自行上落車, 所以我地都覺得到呢一刻爸爸都無大問題出現的. 終於到達了入住的新宿Century Southern Tower酒店了, 酒店都有好多漂亮o既 Xmas Deco, 但由於我忙於幫大家check in所以都未有時間去欣賞, 只知道家人都有推著爸爸在酒店欣賞一下Xmas裝飾, 起碼爸爸總算有親眼看過新宿酒店附近的聖誕佈置, 細妹仲幫佢映左幾張相添咖. 大家真係估也估不到爸爸的狀況竟然會在一夜之間急轉直下的.

在酒店settled down後, 我地3個就先行去到對面的高島屋外賣晚餐, 因為剛到步都想大家多點休息, 所以就無安排外食呢個環節. 我地3個o係高島屋度都買左唔少外賣咖, 當中最好味o既就係燒雞軟骨串同埋雞翼了.

仲有呢樽因為差唔多到賞味期限而減價的原味豆乳, 好味呀.

今次帶爸爸過黎玩除左為了完成爸爸想看東京聖誕燈飾的願望外, 仲想同佢試下東京o既 Xmas Cakes, 因為爸爸向來都好欣賞日本o既蛋糕, 鐘意佢賣相靚之餘仲要夠真材實料嘛. 所以我地3個買完正餐後就趕緊去買了多款唔同o既蛋糕, 當中仲有d係聖誕期間限定的款式.

雖然我地買咁多款番去當中有好多爸爸都未必o岩食的, 但心諗就算唔o岩食都買黎比爸爸欣賞下嘛! 好似呢款Xmas tree 造型的蛋糕真係又靚又好味的推介.

仲有呢幾款Xmas限定的亦都好睇又好食.

唔少得爸爸至愛的栗子蛋糕.

WT鐘情的黑森林蛋糕.

呢兩款係細妹於另一間餅店買的, 爸爸睇完後覺得個造型都係太奇怪了!

黎到日本飯後果真係唔少得的, 好似呢期旬果物係柿, 我地當晚就買了一pack3個, 真係好好食呀. 仲有就係又平又好味的士多啤梨都係我地飛佛黎咖.

回想起呢餐跟爸爸在東京的最後晚餐, 其實都幾唔錯的, 爸爸雖然唔係食得好多野, 但總算欣賞到佢鐘意o既聖誕燈飾同埋試到幾啖美味o既 Xmas cake, 最重要o既係一家人陪伴在側嘛.

當然今次之旅坦白講自己都有很多遺憾的, 遺憾未能將爸爸帶到更多地方睇燈飾, 遺憾未能帶爸爸入住早已預訂好的Tokyo Disney Hotel, 未能帶他欣賞Disney的 Xmas Parade, 未能為他送上更多日本美食..... etc etc, 我真係仲有好多野想同爸爸一齊欣賞分享的.

不過而家每當想起爸爸不用再受痛症折磨時, 心中都算有一絲安慰的!

手術後康復進度

不經不覺爸爸住院又過了兩星期了. 手術後o既進展算係理想的, 當然就比之前兩次手術後o既康復慢了, 但醫生都總算覺得可以接受的. 連日黎林醫生都為爸爸o既身體狀況而作出治療上o既修訂, o係林醫生的幫助下, 爸爸都可以開始食用Soft Diet的了, 起碼唔使餐餐都係粥了, 而家爸爸可以食到爛飯仔, 魚肉, 碎肉, 麵包等等, 當然份量就大大減少了, 所以林醫生都話將來爸爸單靠自己進食去維持體能的話應該係唔可行的, 所以遲d會安排我地屋企人學點樣利用個port幫爸爸吊營養包.

而另一位陳醫生就可能比較進取, 佢好想爸爸體力恢復得快點, 所以之前安排過佢試飲一種好似精華濃縮了的雞湯, 點知爸爸一飲就出事了, 因為有點消化唔黎, 整晚都肚谷, 最後還把雞湯全部嘔番出黎了. 所以暫時還是先跟林醫生的治療進度吧, 我們總不能操之過急的. 因為爸爸而家真係虛不受補啊.

同時爸爸被困在醫院耐左, 情緒就梗係唔好啦, 有皮四都好正常, 但去到"皮十"就真係唔係個個頂得順的了, 要知道無錯病人有壓力, 但負責照顧佢o既屋企人都一樣有壓力, 加上媽媽仲有家務要處理, 有壓力亦都係少不免的了, 但如果兩個都唔識得點樣相處遷就的話, 一硬碰就梗係出事啦. 正所謂相嗌唔好口, 而家仲成日吵吵鬧鬧咁會好開心咩?

剛剛的update: daddy 話今日(12月8號) 做了一次blood test, 基本上無乜大問題, 酵素都係正常的, 只係醫生話佢有點貧血, 而家要先輸血, 唔知係乜野原因呢?

有$$有命, 無$$等死 !?

呢個 Title 一啲都唔係誇張. 話說爸爸由10月頭去了QMH (瑪麗醫院) 做左一次放入膽管的小手術後, 身體狀況一直都唔係太理想的, 之前一直以為整左膽管後會幫到爸爸的. 點知好似有點弄巧成拙. 仲記得爸爸做完第一次膽管手術後, 有一日o係醫院係發冷發燒的, 當時護士, 醫生都認為無大問題, 手術後有咁o既情況都算正常, 仲話我地知爸爸體弱, 天氣轉冷所以有機會令到佢發燒發冷都係正常, 仲叫我地唔使咁緊張. 當時一心覺得有醫護人員睇住應該無問題啦, 佢地係專業o既, 我地又點識咁多呢? 之後QMH話幫爸爸訂到金屬管了, 於是10月20號又再入院做一次換管手術, 誰不知呢次事敗了, 因為負責今次換管的教授醫生說第一次放管入去的曾醫生將管放得太入太高, 位置唔係太好, 所以而家拔唔番出黎了, 咁換唔成管就惟有退而求其次的放多一條管落去. 放完呢枝管之後, 其實除左見到酵素o既數值係有影響外, 醫生好似對爸爸經常話o既肚痛一事完全置之不理的, 20號做完後, 22號已經叫爸爸出院了. 仲同爸爸講整左呢次膽管後, 乜野都食得咖喇. 當然我爸爸又點會信以為真呢? 所以出院後o既飲食仍然好節制的, 基本上都係食粥水為主的. 爸爸都唔敢亂食野. 因為佢一食野落肚就唔舒服, 後來仲連飲水都唔太敢, 因為唔理係固體定液體, 只要一落肚, 爸爸就唔自然, 肚谷, 腸脹, 反胃, 嘔吐 等等o既問題都相繼出現了. 眼見佢咁o既情況當然心知不妙的, 但奈何當時o既爸爸真係好抗拒再去見醫生, 因為佢覺得即使番入QMH, 醫生都幫唔到佢, 反正就係留院但又乜都解決唔到, 所以佢係極度唔願意我幫佢book時間的. 但到11月20號左右, 佢真係頂唔順了, 於是被媽媽再三發功下同意去見一見好耐無見o既陳醫生, 順道就當係問一問2nd opinion吧.

誰不知, 一係唔睇, 陳醫生一見到爸爸就已經皺眉的立即要安排爸爸入院了. 因為爸爸除了極度瘦弱外, 亦出現體內缺水o既現象, 情況真係唔太樂觀的. 當日安排入住浸會醫院後, 陳醫生便立即為爸爸先吊營養奶補充一下. 之後當晚我收工趕到醫院時咁好彩比我撞見剛剛巡房完畢的陳醫生, 我當然要抓緊機會問一問爸爸的情況了. 陳醫生亦係一貫的快人快語跟我說明了爸爸現在的情況真係好差. 佢就講明, 如果佢地唔係早d黎見佢的話, 相信爸爸今年的聖誕節已經唔o係度了. 聽到呢句我真係無晒反應了. 我之後就將爸爸過去呢年o係QMH的跟進過程跟陳醫生說明了一次, 佢一邊聽一邊都係認為QMH的處理其實有點不妥的, 當然站o係佢o既立場, 佢好明白點解公立醫院會咁樣做事, 但站在我地病人家屬o既立場, 好明顯就係QMH的醫生無盡力了. 難怪之後陳醫生講左一句 "點解有呢d病o既病人睇我地呢d私家醫生會長命d?" 無錯, 的確係o既, 無$$睇私家醫生的, 如果真係白白o係度等公家醫院醫療的話, 相信真係無乜希望了, 因為佢地唔肯放資源比有需要o既病人, 佢地只會作一般最average 又最 common 的 treatment, 唔可以做到對每個病人都personalize, 呢點我明白, 因為資源唔多嘛. 但係我想講o既係點解我爸爸係一d資源都無呢? 自從08年10月做完化療後, QMH的腫瘤科真係一d跟進都無的, 每次我地問要點樣再控制一下病情時, 佢地都係用一句 "敵不動我不動" 黎打發我地. 當然我知道各種療程對爸爸黎講都未必係百分百有效, 有時什至會有好大o既副作用, 咁當初比爸爸休息一會再作跟進亦係我地同意o既. 但之後真係每次見醫生, 每次都唔再提點樣控制下癌細胞就真係令我地百思不得其解, 我地唔止一次跟醫生們提出要求, 但佢地就係愛理不理的叫我地唔好攪咁多野. 比爸爸多休息, 舒緩下. 但事實上係見到無一樣野佢地比到爸爸係可以幫佢舒緩病情 / 痛症的. 每次當我地一提出想試下有無其他口服又好打針o既藥物都好, 醫生們就只會一推再推, 有時什至有d難相處o既醫生仲會惡言相向, 大聲質問番我地, 好似只有佢o既專業知識先會救到爸爸, 叫我地唔好再多加意見.

可惜事實係佢地o既所謂專業知識真係一d都幫唔到爸爸的. 仲記得5月時爸爸在QMH留院一個月時, 當時爸爸腸塞好嚴重, 如果唔係我地極力爭取, 相信QMH的醫生亦都唔會肯做手術, 當時我地都以為終於爭取到做手術係一件好事. 點知原來今次見林醫生時, 佢睇番5月時在QMH的record發現原來佢地果次o既手術都真係唔係做得太好, 起碼佢地唔係以病人為出發點, 佢地係以容易處理去做呢個手術的. 我地知道如果比林醫生去做的話, 相信佢係會有更好o既方法處理, 而唔係好似QMH的Dr咁直接駁在爸爸o既腸去直腸度, 咁樣當然爸爸食乜都吸收唔到, 亦都係點解佢成日都會有肚瀉o既情況出現, 因為果次o既手術後, 爸爸就真係變得 "直腸直肚" 的了. 佢係一d都吸收唔到營養的. 我真係好想知究竟點解QMH的醫生會咁樣幫爸爸做手術.

就當呢個係惟一o既方法去處理爸爸腸塞的情況, 咁之後一直到9月中, 爸爸再感不適的時候, 由於驗血報告睇到爸爸o既酵素出左問題, 醫生都係一直懷疑中藥o既影響, 我爸爸其實都停服中藥好一段時間了, 但每星期回QMH抽血後都係發現酵完全無改善, 於是係屋企人的提議下 (注意:醫生由始至終都無提出任何方法去解決的，放膽管都係我地自己提出黎試下問佢地做唔做到), 佢地話都可以試下放一條膠管落個膽度, 睇下有無幫助, 就當我地每心高興希望呢次o既手術可以幫到爸爸之際, 放左落去o既膽管原來又係求其事但放的. 結果就出現左我之前提過o既換管變加管一事啦.

之後到今次林醫生為爸爸做手術就發現原來QMH一早都知爸爸o既十二指腸係出左問題的. 據林醫生所解釋, 由於佢要先知道爸爸o係QMH做過d乜野, 所以佢幫爸爸print番d report 睇睇, 就發現原來於10月初第一次放膠管之時所做的scanning就有report寫明爸爸o既胃, 十二指腸係有腫脹 & 阻塞的情況. 但係佢地就一d野都無做去嘗試解決, 就咁放左條管入去就當task complete了. 林醫生之後跟我地講點解爸爸放完管之後會發燒呢? 原來唔係好似QMH o既醫護所講體弱, 而係因為爸爸膽管有阻塞, 所以膽汁去唔到十二指腸, 咁就塞番轉頭o係個胃度, 咁塞得耐就會發炎啦, 咁就會令爸爸出現發燒o既情況喇. 換句話講, 即係第一次放完膽管後其實QMH o既醫護都應該o係做完scanning後發現到爸爸膽管有塞同埋腸 / 胃有阻塞啦, 咁點解當時完全無人提出過, 又無人去處理呢? 係咪覺得呢件事唔夠嚴重呢? 係咪真係要攪出人命之後先夠大件事呢? 定係佢地覺得睇公家醫生就係咁咖啦, 睇得就要接受佢地呢d 不負責任o既服務呢?

老實講我係唔會就咁算數的, 不過而家爸爸正在休養中, 短期內都唔會番去覆診, 咁我會等下次夠期番QMH覆診時先一併提出我之前o既疑問, 我想知佢地會比個乜野解釋我, 最好就係講得我明, 亦都講得通啦, 我完全係接受唔到佢地呢種超級不理病人死活o既態度的. 講起都幾攪笑, 可能QMH知道有私家醫生去查證爸爸o既病歷報告, 爸爸竟然o係浸會醫院期間收到QMH的電話"問候", 果位工作人員打黎想問下爸爸而家個狀況, 點解又要入院, 同埋點解今次會入左私家醫院, 睇私家醫生, 仲有就係問下爸爸食左佢地比o既止痛藥覺得點. 真係睇咁耐公立醫院以黎, 今次都係第一次有人會打黎"問候" 病情的進展!!! 究竟佢地係改善o既服務質素, 定係心裡有鬼呢? 呢樣真係要佢地自己先知了.

而家我就乜都好少理, 只係盡力幫助爸爸復原, 趁機養好身子再進行我地o既『大計』!

又博多鋪!

正所謂有賭未為輸, 但放諸於講緊o既係人命又點呢? 係咪次次都博得過呢?

今個星期六(11月28號) 爸爸又再進行了一次腸部手術了, 今次已經係由佢確診cancer以來第3次進行同類型的手術, 爸爸身體狀況係愈來愈差的, 佢係咪真係可以好好咁handle到呢d手術? 但我地別無選擇. 唔做的話就真係完全放棄了一樣. 事原係爸爸最近經常無胃口, 一話食野就反胃咁, 由於知道唔食的話情況更壞, 所以縱使唔想食, 佢都好努力咁去食少少, 但每次一食野就會想嘔, 再咁落去真係唔對路, 但我地勸又勸過, 話又話過, 佢就係怕去睇醫生要留院, 我地都唔想迫得佢太緊. 但點知到左星期五(11月20號), 佢真係覺得唔係好妥喇, 終於o係媽媽軟硬兼師o既情況下就諗住約見好耐無見o既私家醫生 - 陳子棠醫生, 可惜陳醫生由於事忙, 唔可以即係接見爸爸, 所以 Dr. appointment 就訂於11月23號 (星期一), 結果一見陳醫生就係比安排入院了, 陳醫生都講明如果我地再拖唔睇醫生的話, 爸爸都未必過到今年的 Xmas了, 因為情況都可以話幾唔樂觀的. (至於點解會攪到咁差, 我下一篇會再詳細d講).

入院後幫爸爸照過造影的scanning, 睇到十二指腸附近有點塞了, 好彩情況唔係太壞, 起碼顯影劑都可以通過到, 只係有點慢. 之後陳醫生說會安排林志明醫生幫爸爸再研究一下可唔可以做手術去解決. 當晚林醫生都已經黎探過了爸爸, 安排再做scanning 以便確定腸塞情況, 同時佢會向QMH (瑪麗醫院) 拎番爸爸之前o既報告, 睇下究竟上次手術到最近發現過乜野事, 做過乜野手術等等 (呢樣我又係會再開一篇慢慢講番). 終於林醫生o係星期四晚黎到後就話睇完片後, 覺得仲有機會博一博的, 據林醫生解釋, 可提供o既方法有兩個:

1. 開刀做手術, 於胃部多開一個造口接駁一條小腸以便爸爸吸收食物, 同埋分擔其他部份的消化工作.

2. 唔使開刀, 但就好似放膽管一樣咁, 加多一個支架落去疏導而家十二指腸o既消化.

兩個方案都各有好 / 壞之處, 首先方案 (1), 爸爸就要再捱一刀, 當然risk會大, 復完都係未知之數; 但好處係較方法 (2)有效, 而且仲有可能 last 得耐d. 而方法(2) 好處當然就係唔使開刀, 風險相對就低好多了. 但不足之處就係因位置問題, 放入體內o既支架會較長, 咁係會影響到個效果的, 萬一放完支架後發現效果不佳, 咁爸爸同樣地都係要先將支架取出後再做番方案 (1)的.

一聽完林醫生的詳細解釋, 爸爸就決定 go for 方案 (1)了. 佢都想快d完成, 快d康復過 xmas 的. 就係咁Dr. Lam 就好快安排到爸爸o係星期六 (11月28號) 4:00 p.m. 做手術了. 話晒都係手術又點會唔緊張呢, 仲要加上手術當日早上爸爸竟然有點微燒, 佢知道後真係緊張到不得了, 好彩o係未打抗生素之前, 護士話爸爸已經退左燒了. 咁手術就如期進行了. 星期六當日就由腫瘤科病房 Block C 轉到去外科病房 Block D 了. 整個上午都忙過不停地要換手術袍, 見麻醉師, 驗呢樣驗果樣, 最後大約3:30, 爸爸就被安排落去1樓 operation theatre 了. 緊張焦慮的表情寫滿大家o既面上. 根據醫生所講手術起瑪都要3 - 4 小時的. 我地3個就於爸爸被送入手術室後在浸會慢慢的等手術完成.

約於7:15 左右, 在手術室門外見到Dr. Lam從醫生休息室行出黎. 咁即係話手術應該完成了, 爸爸隨時都會被推回病房休息的了, 我跟媽媽把握機會問問林醫生手術的情況. 林醫生說手術總算順利完成左, 但係今次應該會係係爸爸最後一次適合做手術的機會了, 因為手術期間佢發現爸爸體內狀況比之前2次手術時差了好多. 而家可見癌細胞已經擴散了去不少地方, e.g. 肝, 腸 另外仲發現腹水都開始較多了, 呢d都唔係一d好o既徵兆. 林醫生亦解釋左今次手術o既難度係在於搵到可用的腸再接落胃部o既時間耐左, 因為好多腸已經唔用得, 有好多壞細胞包圍住了, 醫生先要花唔少時間去將好 / 壞細胞分開, 再揀出可使用的腸黎做接駁, 呢個程序亦令到腸暴露在空氣中o既時間耐左, 咁樣就會令腸部o既反應變得遲緩, 所以佢今次手術後o既復原進度都會相對地變慢.

幸運地爸爸於手術後現在正在康復中, 雖然進度比之前兩次手術時慢了, 但起碼都尚算穩定理想的. 呢兩日爸爸就不斷要輸蛋白素, 營養奶, & 兩包血, 因為怕佢血色素比較低. 而蛋白素 & 營養奶就係要協助佢有足夠營養令傷口癒合, 因為正如林醫生所講爸爸實在太瘦了, 如果靠佢自行復原應該要好耐同埋都擔心復原唔理想. 所以呢d supplement 就一定要比足爸爸的. 而林醫生亦講明到爸爸今次康復, 真係有需要考慮下每晚為爸爸吊一吊營養包的, 因為單以爸爸以後的食量 & 消化能力黎講, 佢係唔可以維持到的. 不過呢d都係後話, Dr. Lam 話最緊要係等爸爸今次手術後康復左先算了. 到左今日星期一, 爸爸已經拆左尿喉, 林醫生說明天應該可以拆埋胃喉的, 佢都吩咐左爸爸要試下活動, 咁樣做會對個傷口有幫助的. 爸爸都好聽話, 我知佢都想快d好番咖嘛.

o係度真係要再次感謝林志明醫生的幫忙, 我估如果唔係有幸遇到佢, 爸爸真係要受更多苦了.

QMH小休, 出院了

今次爸爸入院住了差唔多一個星期. 由上次第二次膽管手術完成後出院回家後的一段時間, 爸爸o既情況都唔係太理想, 成日都一食野落肚就痛, 令到佢都唔係太敢食野, 咁樣當然就跌晒磅, 成個人落晒形啦, 但勸佢早d見醫生佢又唔肯, 於是就一等等到今次11月5號回QMH肝膽胰覆診!

當日我趁lunch時走上去QMH陪左佢一陣, 因為我都想知究竟醫生會同佢講乜, 同埋我想講清楚比醫生知爸爸做完膽管手術後o既反應. 爸爸o既覆診時間係11:30, 我地結果等到1:00多先見到醫生. 今次呢位醫生都很細心, 很有耐性地聽完我地o既報告後就幫爸爸做一個簡單o既檢查, 證明爸爸o既腸又真係開始有點塞塞地的. 醫生見到我地咁concern後就安排爸爸入院觀察, 當然我知爸爸其實唔係太鐘意又要留院的. 但真係無其他更好的方法了, 我地都係想盡快幫爸爸解決佢唔舒服o既問題. 希望爸爸明白啦.

o係爸爸等緊檢查時, 我問過醫生點解第二次做膽管手術時唔用我地訂左o既金屬管, 反而又係幫佢落多一條膠管, 醫生話原來任何位置只要係第一次放管落去的話都係會用膠管的, 因為唔想到時放落去後萬一有乜差池或感染之類要拎番出黎就麻煩d. 所以都係會先試膠管的反應. 醫生話如果遲d我地鐘意的話係可以換番金屬管的. 另外佢又解釋左比我地知點解做完膽管手術後好似個效果無我地想像中咁好. 我地聽完醫生解釋後都明白左好多喇. 咁樣我地都安心d.

而今次住院期間, 醫生們都真係好幫手, 起碼會安排爸爸照左幾次X-ray去確定一下腸塞o既情況, 同埋做左一次CT scan 睇下膽管o既運作如何. 而report所示爸爸新放o既兩條膽管都算function得唔錯, 由驗血o既報告都睇到好多酵素o既讀數都有改善的. 而腸塞方面就唔係太嚴重, 估計之前出現肚瀉o既原因可能係腸胃炎所致. 同時CT scan 都睇到個腫瘤暫時都無乜大變化. 所以醫生就比爸爸o係醫院多休息幾日後就於今日(11月11日)安排比佢出院了. o係度要多謝今次照顧爸爸的醫生!

另外呢次於爸爸住院時, 其中一晚探病期間聽到有位院友在nurse station 咆哮, 聽清楚原來係正在好勞氣地投訴緊其中一位工作人員, 聽到那位院友好大聲咁講 "我都已經阿姐前阿姐後咁唔該佢幫我整野啦, 佢仲想點呀? 係咪要我跪o係度求佢呀? 而家我o係度住左50幾60日, 唔係一兩次叫佢做野佢唔願意咖啦, 大大話話都有10幾次咁o既情況, 態度使唔使咁差呀? 而家醫管局請佢番黎出糧比佢做乜呀? 叫佢坐o係度睇電視呀? 次次叫佢整d野, 佢都係托住頭o係度正眼望住部電視o既. 住o係度o既病人已經心情唔好咖啦, 係咪仲要比人呼呼喝喝咁呀?"

一邊聽一邊拍掌, 呢位院友真係講出好多人o既心聲呀!!!! 希望工作人員都體諒下留院o既病友啦, 人家都係因為病所以先要麻煩其他人o既幫忙, 如果佢自己做得黎的話, 我相信無人鐘意要人服侍的. 所以好多時我地都會自己做番換床單啦, 加熱水呀呢d野, 因為我地人多自己做番都唔成問題的, 而且我相信我地會做得比較好.

換管變加管

剛剛接到媽媽來電說已到QMH準備接爸爸出院了. 不過其實今次所謂o既換管手術並唔算成功的.

話說上回第一次將膠管放入膽管後, 在出院回家休息準備第二次換金屬管的手術呢段時間, 爸爸o既身份變得幾差, 之前所 gain o既 weight 一次過無晒, 成個人又試落晒形咁, 仲有少少肚痛要食嗎啡水止痛. 當然我地曾經提出過早點送爸爸番QMH睇下發生乜野事兼順道o係醫院休息至20號可以做手術為止. 但礙於爸爸強烈反對再入院, 我地都唔想太過勉強佢喇.

結果終於等到20號入院了, 原先諗住應該好快會攪掂o既手術, 結果係由於原本負責o既醫生撞o岩有大手術進行中, 趕唔切幫爸爸做喇, 又原本佢地諗住搵左陳詩正醫生幫手的, 但點知陳醫生睇完爸爸個case後覺得有點問題, 原因係上一次所做o既手術所放入去的膠管位置好像有點問題, 佢地唔敢貿然幫爸爸取出放好的膠管再換新的金屬管, 因為怕上次曾醫生決定所放o既位置係有特別原因的. 於是向爸爸提議多等一天, 等醫生們開會研究一下後會再作安排. 咁我地都無乜特別所謂, 反正都係多等一天.

到了21號早上, 爸爸來電說會準備好做手術的了. 當晚收工後就第一時間去睇下爸爸手術後o既情況喇. 點知上到去見到爸爸後傾計先發現.... 原來今次手術佢地都唔可以換金屬管落去呀. 負責今次手術o既係一個比較高級的楊醫生. 佢解釋比爸爸聽就係因為上次曾醫生所放o既管比較深, 而家拔出黎係有相當風險, 佢地無計可施下而家惟有幫爸爸再放多一條膠管去第二條膽管位置, 楊醫生話而家有兩條比較暢通的膽管相信對爸爸黎講係夠晒用的了, 問題應該不大. 聽到呢度, 我其實都真係幾嬲. 我好想知道點解第一個醫生幫爸爸放膠管時會放到咁差囉. 令到佢而家唔可以換條好用o既金屬管, 我覺得真係好有問題. 唔好話退唔退番$$呢d小問題, 我係想知道點解佢會好似亂咁放條管入去就算呢? 同埋點解佢會講清楚比病人或家屬知手術後會出現乜野問題呢? 原來楊醫生話用內窺鏡輔助放膠管入去時係需要將氣體泵入體內的, 再加上使用過顯影劑呢d都絛會令爸爸發生有氣谷肚的現象, 而且仲有少少肚瀉的. 點解佢地第一次手術後完全無提過呢d事呢? 等我地以為爸爸唔舒服仲食左止瀉藥所以就令佢o既氣更加谷住出唔到黎. 不過我而家嘈黎又可以點? 條膠管唔放都放左喇. 我惟一希望o既係條膠管真係幫到爸爸同埋唔好再出什麼岔子了. 否則我一定唔會放過那位曾醫生的.

今日22號爸爸話醫生見佢手術後無乜大礙會比佢出院的了. 當然我其實仲有好多問題想問清楚醫生的, 因為爸爸個肚都仲係痛. 佢地就只係話開 pain killer 比爸爸, 我唔知究竟幫唔幫到佢咖嘛, 而且我都想知道究竟係乜野問題令到爸爸出現肚痛o既情況. 但係我明白由於爸爸心急出院, 佢真係未必會如實跟醫生講清楚自己o既狀況的. 唔緊要啦, 反正11月頭起爸爸都會有好多 appointment 約好係要番去覆診的. 我希望到時醫生可以真係幫忙搵出爸爸唔舒服o既原因後再對症下藥吧.

膽管安裝 Part 1完成

又係時間匯報一下爸爸的最新進展. 話說上星期五約好了會做通膽管的手術. 而手術後係會留院觀察一晚的. 於是當晚收工後我就輕輕鬆鬆的趕到QMH諗住睇下爸爸o既手術攪成點. 去到時見到媽媽紅紅的眼睛, 心想....唔通手術不能完成? 因為之前聽過醫生講有可能膽管太塞的話會連導管都落唔到的, 如果有呢個情況出現, 咁就要考慮再用其他方法幫爸爸通膽管了, 例如要安外袋幫忙膽汁的流通. 當然就無用導管咁方便喇.

於是帶著有點擔心o既心情埋床問個明白, 發現原來導管無錯係順利放進爸爸的膽管了, 不過同時發現舊毛病 -- 腸塞! 原來又再次出現了. 每次出現腸塞我地都會好怕, 因為知道腸塞係好辛苦的, 可幸的是今次爸爸話無乜點痛, 只係脹氣之下, 爸爸無乜胃口. 另外我地亦明白腸塞再出現的話其實我地無乜可以做到, 因為爸爸已做過兩次切除腸的手術, 坦白講真係唔可以再cut的了. 結果今次做完膽管手術後, 爸爸要另外再多留院幾天, 吊鹽水令腸部自行通番.

而在留院第二晚爸爸就有點發燒 & 發冷, 好彩早上起床後已經退左燒, 不過身體就比較弱. 而留院期間醫生亦會keep住幫爸爸check住酵素的, 發現整好膽管後情況好像有點改善了, 酵素的讀數開始慢慢降了. 其中最明顯o既係一種Amylase的酵素由最高峰的3000幾退到100幾. 到左星期一開始, 醫生話爸爸可以試食粥水了. 證明爸爸o既身體開始慢慢復原過來了. 星期二晚上醫生話爸爸可以出院了, 而有另一個好消息就係醫生說導管的確幫到爸爸的, 因為睇到每次酵素o既讀數都有下降, 而且仲可以回復到正常o既水平. 所以suggest 佢地自費7000多元換另外一條金屬導管. 他們當然立即說好啦, 不過原來呢種自費o既導管要訂先有咖, 所以而家約好了下星期(10月20號) 再番QMH換新o既金屬導管.

今次要多謝答應幫爸爸做導管手術的醫生, 同時亦要再次感謝夏威醫生, 陳詩正醫生, 因為雖然今次唔係由呢兩位醫生負責爸爸o既case, 但佢地兩位都分別有去探過爸爸, 睇過佢o既情況. 對爸爸黎講真係好大o既鼓勵. 不過讚完醫生就要彈下B3病房的服務員, 尤其係星期一(10月12號)晚上收工上到去遇到o既工作人員真係完全係唔想做o既心態. 首先爸爸在換針咀時留血, 咁就整到張床有血跡. 媽媽諗住搵人幫佢換左d床單啦, 無理由咁唔乾淨咖嘛. 點知當佢去通知工作人員時, 那位女工作人員只係丟低一句 "你自己換啦." 就行左去喇. 呢d係乜野態度呢? 好彩媽媽又覺得無所謂, 真係自己幫爸爸換床單. 如果換係我, 老實講我真係唔會自己去換囉, 我唔係話想使人做野, 只係我覺得呢d係佢地o既份內事, 佢地無可能要病人家屬自己整而佢自己就坐埋一邊吹水的. 咁佢使唔使我幫佢出埋佢份糧呢?

另外一個男工作人員一樣"好好"態度的, 當爸爸好心話佢知洗手間無晒toilet paper時, 佢o既回覆係 "你咪用自己果d囉" 嘩....真係有無咁正呀? 請你番黎唔使做咖, 咁唔想做不如番屋企啦. 你唔想做呢份工我相信仲有好多人想做咖喎.

膽管阻塞

又有一段時間沒怎樣更新爸爸的病情了, 在某程度上呢個都算係好消息黎咖, 起碼證明爸爸o既病情無大變化嘛.

不過最近呢一兩個星期爸爸開始又有點小毛病出現了, 經常於飯後覺得有好多胃氣但又排唔到出黎, 谷住好辛苦咁, 曾經在往QMH 肝膽胰科覆診時跟醫生講起呢個問題, 當時醫生就開左幾種唔同o既消化丸比爸爸食, 仲有一隻好似炭一樣咁o既黑色藥丸係用黎吸番d胃氣o既, 不過問題就出現在食左呢粒炭丸後, 爸爸就成日有肚瀉o既現象出現, 一日可以瀉 7 - 8 次咁多, 最近仲覺得d便便有點偏白.

原先指定覆診日期係12月3號, 不過既然有唔妥就梗係要改期早d見一見醫生啦. 但改期都唔係打個電話咁易咖, 因為仲要o係電話度比姑娘問長問短的, 佢係好似問到想我就咁去急症睇左就算, 老實講如果急症唔使等咁耐, 我無所謂, 但既然上次係醫生自己講明話有唔舒服就咁打黎改期就得, 免我地又要去輪急症的. 所以我一定會力爭到底. 結果當然就係順利改左今日 (10月8號) 就見醫生啦.

好好彩今日等見醫生時又碰見之前幫爸爸做腸手術的兩位仁醫, 夏威醫生 & 陳詩正醫生. 兩位都好有心問候一下爸爸o既近況. 之後到見今日o既覆診醫生時, 醫生都話應該係膽管有點塞了, 所以便便會偏白, 趁情況未太惡化時都係盡早處理好d. 所以就排期幫爸爸做一個內窺鏡的檢查, 應該順道會試將導管放進用以擴闊膽管. 不過如果檢查時發現膽管太塞連導管都過唔到的話就要另想方法了. 但無論如何能及早處理都係一件好事.

爸爸明早便會入院準備, 應該明天 (10月9號) 下晝2:00左右就會做檢查的了. 希望一切順利吧! 加油呀, 爸爸!

終於出院了

真的超感謝K-21所有staff, special thx is given to Dr. Sharr (夏威), Dr. Chan (陳詩正). 我地尋晚已經知道爸爸今日可以出院了, 夏醫生不厭其真的將爸爸的情況一一詳細告知, 而且仲有問必答的解答了我跟妹妹的一堆問題. 現在暫定星期五 (5月15號) 會番去覆診及拆線. 而夏醫生亦清楚解釋左爸爸出院後暫時食野都係以粥類為主, 肉 / 魚都可以進食, 但一定要攪爛 or 要自己慢慢咀嚼. 如果唔係就好易消化唔到咖喇. 希望爸爸緊記醫生o既吩咐.

為左答謝眾人, 我跟妹妹昨天在Godiva買左朱古力比staff 同埋醫生們作為我地o既小小謝意. 很感謝在爸爸住院的這20多天內他們的悉心照顧.

爸爸, 我地今晚屋企見啦!

Home Leave @ 母親節

星期五晚收工上到QMH見到屋企人跟護士在傾談, 細聽之下先發現原來係夏醫生跟爸爸說見佢住左o係度有成20幾日喇, 而家又拆晒所有吊水o既喉, 行動自如, 而且手術後so far 情況理想, 於是提議比爸爸home leave一晚跟我地回家渡weekend, 想必係因為母親節的關係吧, 真的很感謝夏醫生的貼心安排. 就係咁我地就忙於為爸爸星期六home leave作好準備.

到左星期六(5月9號), 我跟細妹9時已到達QMH準備接爸爸出院了. 當然還得讓護士先替爸爸清洗傷口, 然後再配止痛藥以防萬一. 大約10點我地已經可以出發回家了 . 的確爸爸能夠回家小休令大家都覺得輕鬆不少, 爸爸當然就係最開心o既一個啦, 可以番屋企好好休息, 又可以跑下馬仔, 又可以睇下佢鐘意o既球賽!!! 不過飲食方面就仍要好小心處理, 我唔想home leave一天就攪到亂七八糟嘛. 惟有樣樣都小心d啦.

到左母親節正日 (5月10號), 爸爸雖然無跟我地出去飲茶慶祝, 但我地其他幾個人就終於可以去茶樓嘆番餐茶當慶祝了. 去到茶樓仲有好多相熟o既茶客同伙計向爸爸問好, 真的很有心啊. 而當日我地叫左呢幾款特色美食, 通常呢d過時過節o既時候都要比面幫手捧下場o既!!!

而爸爸就安心咁留o係屋企訓下覺, 睇下電視咁, 好耐都無見到爸爸可以咁舒適喇, 我就當然開心啦. 心情大好o既我仲捉埋WT陪我去左食好耐無食過o既車仔麵, 正呀!

晚上原先我地話左9:00會送爸爸番到QMH的, 不過後來先知原來當晚有場英超賽事幾吸引的, 由於8:30先開波, 我地就決定等爸爸睇完上半場先出發啦. 估唔到爸爸就可以睇左全場惟一的兩個入球, 因為下半場就再無新入球喇, Timing真係超 Fit. 我, WT同細妹就於9:30打的送爸爸番去QMH了. 工作人員見我地番黎都替我地放完假而感到開心!!! 安頓好爸爸後, WT就送我地番屋企了. 我地都覺得爸爸應該都唔需要再留院太耐咖喇. 因為傷口都埋得幾靚仔, 食野方面當然就自己要加倍小心&留神啦.

手術後進度

爸爸在5月1號完成左第二次切腸手術後康復進度都唔錯. 連日黎醫生都不停密密作出跟進. 最近兩日爸爸開始可以落床行下, 仲有個好似吹波仔o既儀器比佢用黎鍛鍊番肺部功能. 而昨天(5月6號) 亦係咁多日以黎最多醫生到訪o既一日, 幸好細妹請左假相伴, 有細妹在場我就放心得多喇. 起碼我知細妹一定會好落力咁去幫爸爸 clear 好多疑問. 據細妹所講, 昨天首先到訪o既係陳詩正醫生, 佢其實都唔使點跟爸爸個case o既, 不過真係好有心的順道過黎睇一睇, 佢話爸爸康復得唔錯, 最緊要就係唔好心急, 做乜都要慢慢黎. 之後就到夏威醫生喇, 佢都一樣係黎睇下爸爸於手術後o既康復進度, 佢話條腸開始有活動, 表現幾理想. 會慢慢比爸爸試下食粥, 要睇下每樣食物o既反應係點, 佢話盡量希望make sure 爸爸個status 夠穩定先會比佢出院, 因為唔想我地出出入入咁又解決唔到個問題. o係度真係要多謝佢兩位o既細心照顧同安排.

之後無耐就到腫瘤科o既廖醫生到訪喇, 昨天係原定去腫瘤科覆診o既日子, 但由於爸爸而家係in-house病人加上剛做完手術, 所以醫院幫忙安排廖醫生去病房睇爸爸. 細妹當然唔會放過呢個機會問清楚之後點處理爸爸o既腫瘤. 因為據夏醫生所講, 佢地做手術時已順帶將一d可以切除o既腫瘤清除左部份, 而家留番o既係一d散開左同埋唔太大量o既. 佢地都認為我地應該問下腫瘤科果邊會點樣去控制下其他剩番o既壞細胞. 所以今日有機會我地一定要把握去問醫生o既意見. 正如我地所料廖醫生話明唔會再為爸爸打化療針, 因為爸爸而家實在太弱喇. 呢層我地係絕對明白o既, 老實講如果你而家話幫佢打針, 我會更加驚囉. 但係佢地話連口服藥都唔會考慮時我地就有點保留喇. 要知之前佢地拖左咁耐到最終肯幫爸爸用藥時就發現一切都太遲喇, 因為果陣咁o岩爸爸d腸係勁塞, 佢地唔肯打都係正常o既決定. 但而家呢個障礙已經解決左, 點解仲咁堅持唔再用藥呢? 呢樣我地真係攪唔明囉. 唔通佢地又想一拖再拖??? o係細妹再三追迫之下, 廖醫生就只有一味在說 "到時再算" 家陣比左個期我地兩個星期後再覆診, 到時睇下個情況係點先再打算. 我地都認為再爭拗落去都無結果, 就即管睇下兩個星期之後會有乜進展同安排. 同時細妹亦表明我地係好希望爸爸繼續接受其他形式o既化療o既, even 打針o既藥唔o岩用, 咁口服o既我地都認為要試. 但為免到時又話爸爸體弱, 細妹要求安排會見營養師去跟進爸爸個case. 於是廖醫生亦好爽快地幫我地安排左營養師到訪.

而據營養師所講爸爸而家係應該多d攝取熱量去gain weight, 所以介紹左一d supplement 比我地, 會比爸爸試多幾款睇下邊一種先合適. 另外亦解釋左爸爸可以進食o既食物類別, 爸爸未來主要都係食用低渣o既食物. 好多謝呢位營養師o既講解令到我地有多d idea 知道應該點樣去照顧爸爸, 我地係想佢食得正確之餘亦都要有足夠o既營養. 而家營養師就提議爸爸當身體於手術後康復起來後可嘗試每天吸取1500卡路里, 亦都介紹左我地邊一d食物可以有助達標. 相信有左呢個guideline後, 我地會更有把握去照顧爸爸o既飲食問題. 而營養師亦話如果有需要的話, 我地可以於兩星期後覆診時再約見佢地, 到時睇下爸爸o既進度或者可以再set 一個更 fit o既飲食 plan!!!

另外仲有個surprise就係傍晚時收到陳子棠醫生的問候, 陳醫生經診所o既姑娘問候一下爸爸最新o既情況, 亦都知道爸爸剛剛又接受左一次手術, 希望爸爸可以好好休息. o係度真係要多謝晒陳醫生及診所所有姑娘的關心!

夾心人

我鐘意食夾心餅, 但唔多鐘意做夾心人, 因為做得唔好的話, 分分鐘吃力不討好. 每個人都有唔同o既性格, 硬要一方改變去遷就自己係好唔實際o既諗法. 當然大家一齊生活需要o既就係互相遷就, 但忍都有個限度o既, 忍到頂點時咪會爆煲囉. 一個人係絕對唔應該覺得問題永遠出於另一方, 咁樣諗法只會令大家關係更僵. 試想想可能自己都有不是o既地方, 咁又何苦太執著呢? 我明白要照顧病人唔係易事, 大家都無受過什麼專業訓練, 有時做得唔好, 做得唔足夠係一定咖喇, 問題係一定要做得開心, 做得順氣. 唔好有被迫去照顧o既感覺. 咁樣大家都會好辛苦. 呢個係無形壓力黎o既.

好似今日咁我偷lunch time 上左去探爸爸, 果時媽媽都未上去, 比著係往日佢已經坐左o係度啦, 有時我會覺得真係咁無野好講就見少d面啦, 唔係真係要日對夜對先叫好咖嘛. 見面唔在乎時間長短問題, 反而心情先緊要, 如果日日無時無刻咁見面但成日都係嘈交o既咁見黎做乜? 重質不重量係我o既 idea, 唔想見o既真係唔好勉強, 而家呢個唔係責任, 亦唔係強制性o既, 有時間有心情咪去陪下囉. 自己都有野忙緊又或者心情唔好o既就麻煩唔好見面, 費時到時撩交嗌.

當然身為病人o既爸爸亦好應該學識點樣去appreciate人地為佢所付出o既一切, 有時做左d野唔一定要講出黎, 而家唔係講左就會加分. 唔好成日都以為人地幫唔到手, 要照顧病人唔係易事黎咖. 大家都係學習階段, 當中一定有d野做得唔好, 又或唔識處理, 比d耐性大家嘛!

順順利利

感謝一眾Blog友的支持. 爸爸的手術已順利完成了!!

不過o係完成手術前都遇到一點小波折的. 話說夏醫生之前說過手術安排在5月1日早上8時左右進行. 所以之前一晚媽媽留宿醫院以便照顧爸爸. 而到左5月1號當日早上, 夏醫生亦曾到訪替爸爸打氣. 而我跟妹妹就約於10時左右去到醫院, 一來想媽媽可以早少少番屋企休息番一陣, 二來希望o係度等爸爸手術完成出黎. 點知上到去爸爸都仲未被推落手術室, 咁媽媽見我地黎齊佢就先行回家, 叫我地有消息再通知佢. 於是我地就o係病房一直等..... 等呀等....等到過左1:00 p.m. 都無動靜.... 心諗可能之前一個手術未完所以有點delay啦....點知再等到3:30 p.m. 都無聲氣喎...情急之下就惟有問一問護士啦. 佢地就話幫爸爸排o既係emergency queue, 但係如果有一d超緊急o既手術, 例如突發性o既又或病人生命有即時危險o既, 咁就會打左尖先. 而我地就會被delay喇. 我都知無辦法o既, 眼見到爸爸一早就準備好, 尤其係心理上o既準備, 由佢o既血壓都睇得出佢係超緊張咖嘛. 但而家就唔知要等到幾時, 什至仲有機會要等到第二日先有得做, 爸爸當堂成個人都無晒mode啦, 而我地就只有乾著急. 到左晚飯時間, 我地惟有先行到1/F canteen食完飯先再上番去一齊等. 點知咁o岩落到去又比我地o係 canteen 見到夏醫生喎. 佢話我地知, 佢地都等緊手術室 available. 不過如果太夜的話, 佢地就提議不如第二朝先做. 我地都無得揀, 惟有睇下點啦, 心裡邊當然就唔希望再有delay啦. 就當我地食食下飯期間 (其實都差唔多食完), 見到一班醫護人員同夏醫生離開, 當夏醫生經過我地果時就話我地聽手術室call左佢地話而家ready喇. 果陣已經係8:30 p.m. 喇, 咁我地梗係即刻走番上房幫爸爸 get ready 啦.

上到房幫爸爸準備好所有野之後無幾耐就有工作人員上黎推爸爸去手術室喇. 細妹, WT 同埋 我就當然係跟住行啦, 沿路都要幫爸爸打氣, 等佢個心定d呀嘛. 爸爸好攪笑地o係要推入手術室時仲高舉V手先入去添!!!! 之後我帶埋媽媽過黎就一行4人坐o係手術室外等爸爸完成個手術喇. 就咁樣一等就等到11:30 p.m. 先見到夏醫生從手術室走出來向我地簡單說明了手術已順利完成, 最塞o既部份已經於今次手術時截斷了, 但就不會切除出黎, 而係會由它自行枯死的. 即係話爸爸而家會係bypass左最塞o既地方喇. 之後夏醫生話要再等一個鐘等爸爸差唔多完全由麻醉狀態清醒過來先會推回病房休息的. 我地千多謝萬多謝醫生o既幫忙後就繼續o係手術室外等候. 咁樣一等又等到差唔多凌晨1:45先見到有位於K21的護士走到手術室, 原來就係佢黎接爸爸番上病房咖. 最攪笑o既係等緊爸爸期間, 新聞剛宣佈了第一宗確診的豬流感, 所以我地都立即被要求在醫院範圍內要戴上口罩!!! 無幾耐見到爸爸喇. 佢已清醒得七七八八, 仲可以跟我地打眼色, 見到佢安全出黎我地都放下心頭大石, 齊齊番上病房等佢過床.

大約於2:00 a.m.時爸爸就被安置好了, 身上插了很多喉管, 有止痛用o既, 有輔助氧氣, 之後仲有血壓計, 今晚都會幫佢check住血壓以防手術後有乜野突發事. 待爸爸一切settled down後我地3個就差唔多走, 留低媽媽一個留宿喇. 爸爸見我地臨走時仲同我地 Say Bye添呀. 雖然經歷了一整天的等待, 但能夠見到爸爸順利完成手術真係好開心呀.

第二日(5月2號), 一大早就再到醫院探爸爸, 由於昨晚動完手術, 所以今日爸爸都係處於休息狀態, 傷口當然還有點痛, 所以久唔久就見到爸爸要按一下止痛藥. 但整體黎講順係氣色唔錯的了. 而媽媽就話今早陳詩正醫生都有黎到睇過爸爸, 並略略解釋過完成左o既手術, 現階段就係要等爸爸慢慢康復, 同時亦提醒我地可以約見番腫瘤科o既廖醫生睇下佢地會有乜野 further 安排. 而今日我地都明顯地感受到爸爸o既心情輕鬆了不少, 雖然傷口還在隠隠作痛, 但都有心情同我地傾下計. 今日惟一有concern o既係爸爸o既血壓有點偏低, 原本媽媽想再多留一晚睇住爸爸o既, 但因豬流感o既關係, 醫院規定晚上8時後就唔可以有人留宿 (雖然我地後來知道有人仍然順利可以留在病房), 所以我地一干人等夠鐘時還得暫時離開爸爸, 不過醫護人員話會幫我地monitor住爸爸個case的.

到了假期的最後一天, 我地如常到醫院探爸爸, 看來爸爸今天o既精神又再好多了. 有時還能借少少力就轉換下姿勢並成功將痰吐出, 醫生話咁樣係好事, 唔會驚d痰倒流番體內. 不過到左夜晚就明顯見到爸爸開始無乜心機, 原因係佢覺得因為自己o既關係令我地三天o既假期白白浪費了, 無得出去玩之餘仲要一干人等全日困o係醫院無無聊聊咁, 佢覺得唔好意思, 一方面當然想有人陪啦, 但另一方面就覺得自己好麻煩咁囉. 不過我都同左佢講, 我地如果真係唔想黎o既就唔會勉強啦, 反正我地又唔係有約, 如期留o係屋企, 咁倒不如過黎醫院陪下佢咪仲好. 希望佢明白我地係真心黎陪佢o既, 我唔想佢胡思亂想嘛.

暫時到今日(5月4號)為止, 爸爸手術後o既情況 / 進展都幾良好, 今日仲話我知已經拆左止痛針同埋輔助氧氣咖喇. 而家就係要一步一步咁等身體慢慢復原. 呢樣野唔心急得黎咖嘛. 另外原定約左5月6號會見Dr. Liu的, 而家會睇下點樣安排, either 就internal咁推爸爸過去見醫生 or 要麻煩醫生遷就一下到K座跟爸爸會面, 我地當然唔想再改期啦, 因為一改又唔知要改到幾時. 呢樣就要有待護士們晏少少o既安排喇.

o係呢度要誠心多謝幫爸爸做手術o既醫生們. 仲有就係多謝WT o係呢個假期期間每日都同我地一齊陪住爸爸, 為爸爸打氣. 當然各位Blog友的支持與鼓勵亦都係不可得的. 感謝大家啊.

一絲希望

雖然未知結果如何, 但呢一線轉機對我們一家人黎講真的很鼓舞!!

昨天傍晚時份, 陳詩正醫生與夏威醫生一同跟兩老見面了, 由於我放工未及趕到, 所以就由兩老跟醫生商討完後轉告比我地聽. 幸而兩位醫生都解釋得好清楚. 兩位醫生說電腦底片仲未沖好, 但係佢地已經初步寫好報告喇, 基於我地都幾強烈要求動手術, 而佢地睇完報告及相關scanning後都覺得應該可行. 所以暫定會5月1號(星期五)進行一次手術, 希望可以幫爸爸切除某部份腫脹 / 阻塞o既腸, 對上一次私家醫生幫爸爸做手術切除o既部份係胃接小腸那段. 今次就發現係小腸未端比較塞得嚴重d. 同時佢地亦都解釋左做完手術後另一個會出現o既問題係接駁o既事宜, 而家由於爸爸o既腸都已經腫脹了好一段時間, 佢地擔心切除後駁番腸部會出現接駁不理想o既情況, 為免出現呢個情形, 兩位醫生都真係好幫忙的說會先為爸爸做手術前下一點工夫, 就係先吊一些用來消腫o既藥水, 等腸部盡量平伏一點. 咁樣就可以減低呢個風險喇. 雖然呢 一切都其實係要等今日(4月30號) 底片出好再行研究方可作實. 但醫生們作出的offer令我地暫時燃起了一絲希望. 當然我地都好明白以爸爸而家咁o既身體狀況要去做一次都幾大型o既手術係有一定o既風險, 心中亦作好最壞打算就係正如夏醫生所講今次手術可能係open & close case, 即係開刀後發覺情況不妙乜都做唔到就要close case, 亦有可能係手術期間出現岔子等等, 但正如我地之前所講, 有試過就唔會後悔, 總好過真的坐以待斃!

而今早(4月30號)最新消息就係夏醫生confirm了明天(5月1號)早上8:00就會為爸爸進行手術了. 在此誠心希望一切順利, 我唔期盼有大奇蹟出現, 只希望手術順利完成, 爸爸又可以過回一點安穩o既生活, 咁我就好滿足的了.

充滿矛盾

其實都無乜新進展可以講, 星期一(4月27號)果日爸爸就係由早到晚咁不停要做scanning, 原來9:00照到1:00多後, 2:00, 4:00, 6:00 及 9:00分別都要再照. 原因係顯影劑仲未落到去小腸位置, 所以每隔一段時間又要落去照下睇下究竟d野去到邊個位. 就係咁爸爸就算想休息都唔得, 因為隔一陣又會比人叫醒. 而且因為成個process未完, 所以完全唔準飲食, (雖然爸爸而家都唔食到野, 因為一食落肚就會痛). 但連水都唔比飲就真係太過份喇. 而且落到去3樓做scanning o既地方好大冷氣, 試問一個幾日無野落肚, 身上只穿一件單薄o既手術衣o既病人又點會頂得住呀? 所以細妹下晝去陪佢時就盡量拎多d氈比佢蓋住, 希望會暖番d. 而據妹妹所講, 爸爸經過咁多折磨後, 意志力真係弱晒, 家陣可以話無晒鬥志可言. 呢樣都唔難理解, 唔係個個都可以長期地比痛症咁樣折騰落去咖嘛.

到晚上我收工上到去時, 爸爸已經呼呼入睡了, 我亦不便打擾, 因為知道佢再休息多一陣到9:00又要再落去照過. 醫生亦話左第二日(4月28號)早上9:00仲會照多一次先叫完成個scanning. 睇見爸爸瘦弱o既身體真係好難過. 往日爸爸係一個幾大隻o既人黎咖, 而家就瘦到得番d排骨咁, 體重亦只係淨番44kg左右, 實在太弱喇, 愈睇真係愈心痛, 但我又無乜野可以做到去幫佢, 呢樣先令我覺得沮喪. 而細妹就同我講佢地問過夏醫生o既情況, 醫生亦表明唔好諗住有乜好消息, 因為照睇爸爸o既腸都真係幾塞下, 所以果d顯影劑咁耐都落唔到去小腸位置. 佢話一切都要等28號早上做埋果轉scanning先再有定案. 就係咁媽媽就o係醫院再陪爸爸過夜, 方便第二朝幫手帶爸爸落去做scanning.

到左28號早上爸爸如期做埋最後一round scanning 後就可以安心d休息番一陣喇. 之後細妹下晝去陪佢地順便等見醫生. 不過夏醫生仍然未有好正面o既回覆關於點樣處理爸爸個case, 佢只係一味講話開刀做手術的話會有風險, 而且個result 未必會係我地expected. 同埋而家佢話爸爸條腸又唔係全塞, 所以會盡量等爸爸自己食到幾多就幾多, 唔主張吊營養奶或其他substitute o既方法. 而細妹就好清楚咁表面左我地o既意願係想爸爸往後o既日子可以舒服d. 試想想, 如果有人話你知你有3個月命但係每一日都要比劇痛所折騰, 又或者你有一個月命但唔會再出現身體不適的話, 你又會點揀. 我覺得我地o既意願係好正常o既, 做手術o既風險我地都預計到亦到心中有數. 所以我地先會有強烈要求希望佢地可以真係做d野去幫我爸爸. 而唔係每一次都係話睇定d先, 如果真係咁唔o岩做手術, 咁理論上身為醫生係咪應該諗個方法去幫個病人呢? 而唔係話由得佢自己食到幾多就幾多, 因為其實仲有其他方法可做去幫爸爸吸取足夠o既營養咖嘛.

我可以講經過呢兩個多星期o既折騰, 爸爸由原先充滿鬥志到而家可以話係處於半放棄o既狀態, 我作為佢o既家人真係好心痛亦好矛盾, 一方面我當然希望爸爸個病情得到舒緩令佢o既生命得以延續多一點, 但另一方面每日睇住爸爸受痛症折磨得不似人形時, 我真係有想過比爸爸早日有個解脫. 究竟我地應該點樣面對, 選擇, 幫忙, 大家都真係無晒頭緒, 除左盡量抽時間去探爸爸, 比多d鼓勵佢之外, 我地真係做唔到d乜. 唔好話爸爸, 就算連我都開始覺得信心有點動搖!!! 但不論如何, 我都會先睇睇所有scanning report出晒後, 再聽多一次醫生總結佢地o既recommendation後, 如有需要我當然會再另尋專業意見, 之後先會決定應該為爸爸再做點什麼. 我而家唔係要求有乜野突破令爸爸身體一下子康復起來, 我要求o既係好簡單的 ~ 只要爸爸唔會再受痛苦咁我就心滿意足的了.

每況愈下

爸爸由4月15號入院至今, 情況都係唔太穩定, 有時仲會覺得每況愈下. 好似星期日咁, 又再一次還原基本步, 再要插番胃喉. 原因係星期日清晨時份起爸爸腹部又再出現劇痛, 已經打左止痛針, 貼左止痛貼但情況都未見改善. 星期日早上當我地三母女食緊早點時曾經打過比爸爸的, 佢仲好似無乜野咁傾左幾句. 飯後媽媽回家打理家務, 而我跟妹妹就先行乘車去QMH陪爸爸. 點知入到房我就見到爸爸好似訓左覺咁曲起個身o係床上面, 原本我以為佢休息中, 點知行埋d睇, 見到又再消瘦了一點的爸爸面容有點扭曲的按著肚子說好肚痛. 一睇見咁o既情形除了心痛外, 當然就係要盡快call護士啦. 之後先發現原來爸爸今早已經打過止痛針了, 可惜唔係好得, 而家想再打, 於是我就幫佢安排下啦. 點知有位林姑娘跟我地講爸爸打完無幾耐, 唔可以咁快再打, 要等到1:45先可以用針咖. 咁我問佢而家爸爸咁唔舒服, 唔打得針咁你地係咪應該睇下仲有乜其他方法去幫下手呢? 無理由一句唔打得針就丟得個病人唔理咖嘛. 咁呢位林姑娘就話幫我地call Dr. 期間我跟細妹乜都做唔到就係默默地睇住爸爸受苦.

大約12:00幾, 終於有位醫生到診, 佢就話會安排爸爸抽血再照X-ray, 而現階段會幫爸爸插左胃喉先放d氣出黎, 希望佢會舒服少少. 當醫生走後我地醒起想問佢可唔可以開止痛藥比爸爸食, 果位林姑娘又係態度唔好地講 "開緊啦" okay, 呢d小問題我都費時同你嘈, 只要你真係做到野幫我爸爸的話, 我無所謂. 無幾耐就有工作人員幫爸爸抽血喇. 插好胃喉後, 爸爸就好似舒服左d咁, 起碼可以稍為休息左一陣. 晏少少媽媽黎到見到爸爸個情況當然就超worry啦. 最後佢決定留宿一宵睇實爸爸, 因為最大問題係今早爸爸曾經起身想去買份報紙睇時有點頭暈, 血壓亦偏低. 最後媽媽擔心爸爸晚上萬一去洗手間時再頭暈的話就麻煩喇. 而且今日(4月27號)醫生幫佢安排左會照顯影劑, 所以媽媽覺得佢留o係爸爸身邊照顧住佢會安心d. 咁我地都唔反對o既. 眼見媽媽擔心爸爸o既病情而變得好落寞, 真係好心痛. 畢竟要看著老伴受苦, 相信佢一定係比我地更唔好受.

到左今早媽媽跟我講醫院9:00多已經接爸爸落去3/F檢查喇. 一路整到成1:00幾先推番上房, 不過原來都仲未照完咖. 但呢個時候爸爸個肚又開始有d痛喇, 所以要求左2粒止痛藥, 媽媽話爸爸又肚餓又凍, 因為3/F 果度冷氣好大, 爸爸身上又只係著住一件好薄身o既手術衫, 雖然蓋左張氈但一定唔夠暖囉. 所以番上房時已即是搵熱心幫佢暖番個身. 下午2:00幾爸爸又再被推回去繼續喇. 媽媽仲話今早見過夏威醫生, 亦都將爸爸呢兩日o既情況講左比醫生知, 夏醫生都覺得幾大問題, 所以今日安排o既scanning會盡量做得detailed少少, 希望搵得到令爸爸成日腹痛o既真正原因. 方便佢地研究黎緊點樣幫爸爸, 當然我地就梗係希望佢地肯爸爸做一次手術睇下可唔可以將受影響o既腸部切除, 咁樣可以令爸爸暫時得到舒緩. 否則我地覺得呢個cycle只會無止境咁不停循環落去.

救得太遲??

尋日(4月22號)晚當我收工趕到上QMH一入房就見到Dr. Liu 坐左o係爸爸床邊跟兩老討論緊黎緊o既可以做o既治療法. 我放好手袋後轉身就已經見到雙眼有點紅紅的媽媽, 然後就聽到佢嗚咽著跟Dr. Liu 說希望佢地多想辦法幫爸爸. 那時我已經心知不妙了. 果然Dr. Liu再跟我講佢地開完會後決定爸爸現階段係唔再適合用任何化療藥了. 主要原因係爸爸腸塞o既情況令佢地有concern, 而且腸部腫脹的話打化療針o既風險係相對地大左. 所以經佢地專家會診後, 一致認為唔可以打, 只會用其他途徑去幫爸爸延命. 開初一聽到佢地唔再為爸爸進行化療時, 真係幾嬲. 因為攪到今時今日爸爸d腸腫晒, 腸塞嚴重左都係皆因佢地唔一早就幫爸爸打針, 我地自去完旅行番黎後每次到QMH覆診佢地都拖我地, 話唔到最後一步唔好諗打針, 因為化療副作用好大, 往往會得不償失. 所以提議除非病情轉壞, 否則佢地係唔打算o係果段時間落藥o既. 好啦, 咁一拖又拖左兩個月, 到而家眼見勢色不對喇, 諗住打針會有用啦, 點知原來一切都太遲喇, 爸爸而家無論體力同身體狀況都唔再適合further treatment. 比著你聽到, 你又會有乜反應呢?

不過我知而家要鬧番轉頭誰是誰非都無作用, 更重要o既係之後o既路要點行. 既然化療唔得喇, 咁係咪應該諗d方法令爸爸後期o既生活可以舒服d, 起碼唔再需要受腸痛o既煎熬!! 而呢方面我覺得暫時今次入院後醫生們都好盡力. 特別係尋晚咁除左Dr. Liu黎睇過爸爸兼詳細地向我們講解過病情後, 跟著另一位負責爸爸腸部治療o既夏威醫生亦到訪告知佢地而家會用乜野方法去幫爸爸, 而且仲出力幫爸爸爭取一個快d o既時間去接受其中一項療程. 而之前另一位顧問醫生陳詩正醫生亦不時到訪查問爸爸病情進展. o係呢度我都要多謝佢地幾位o既幫忙.

幸運的是據Dr. Liu所講爸爸o既驗血報告顯示爸爸o既紅白血球, 肝腎功能理想, 暫時應該唔會有太壞o既情況出現. 正如Dr. Liu所講, 而家佢地會盡量嘗試多種方法去減低爸爸o既痛症. 例如提議我地只係比流質食物比爸爸, 並清楚解釋左爸爸現階段所需o既食量, 主要係避免再令爸爸o既腸受到刺激. 另外仲會開一d止痛貼比爸爸, 份量會加大一d, 希望可以有效地舒緩到爸爸腸痛o既問題. 希望呢一切都可以幫到爸爸啦.

爸爸, 你要好好頂住呀. 我知你都超級期待6月13日那天的到來, 我相信到時你一定會精精神神咁出現o既!!!

稍有進展

今個星期一 (4月20號) 爸爸又再開始禁食, 由於無野落肚o既關係, 咁就梗係唔會點痛啦. 而醫生亦算有良心幫爸爸安排照一個scan, 睇下究竟有腸塞情況點, 於是下晝爸爸做左一次scan, 晚上原先我約左醫生7:00見面, 不過醫生早到了, 所以我未能面談, 唔通醫生怕我煩會問長問短? 不過佢總算都見左媽媽, 粗略交代了爸爸現況. 一切都要等scan report出左先再有定案. 約7:30另一位醫生到訪, 佢應該係負責幫爸爸做scan的. 佢話報告無咁快ready, 之後就幫爸爸做一次檢查. 而我地就陪爸爸直到8:00左右先走. 番到九龍果邊跟WT會合食完老麥番屋企之際, 爸爸打黎話醫生又再上黎話報告雖然未出, 但睇過片, 發現只係有幾個位好似有d黏腸. 如果真係得幾個位就會提議做手術, 但若黏腸位置太多就覺得唔適合做手術喇, 因為risk 太高. 聽到呢個消息都總比無止境咁等為好. 起碼覺得情況唔太壞, 應該都可以做手術啦, 問題係公立醫院會唔會肯冒險幫你做呢? 呢個就係後話喇.

果然世事又點會咁完美呢, 正當我地諗住爸爸應該可以有機會接受手術去解決部份腸塞問題之時. 今早(4月21號) 醫生再巡房時就話當中有d黑影位唔敢100% sure 係顯示腸部被腫瘤黏著, 所以貿然開刀的話可能會得不償失. 跟住醫生話已經安排左爸爸o係QMH睇開o既廖醫生 (腫瘤科) 再開會研究一下. 佢地覺得最好就係廖醫生同意現階段比爸爸打針, 咁睇下打左針落去之後會唔會有改善, 咁爸爸就唔使白捱一刀. 又或者情況差d, 一打針爸爸就出現腸穿情況 (據廖醫生講腸穿機會為2%), 咁到時就真係想唔開刀都幾難喇. 咁如果到時開左刀就梗係會順便睇下腸塞o既問題可唔可以整埋啦.

老實講, 我唔知咁樣做係咪對爸爸最好o既治療, 因為我無咁o既專業知識, 但起碼今次醫生o既處理手法我覺得仲可以接受, 佢地唔會就咁照完片就算, 總算都有人肯主動跟進同埋幫忙安排專科醫生提供意見. 我一直為爸爸爭取o既亦都係盡快接受合適o既療程, 我唔想一拖再拖咁浪費時間同機會. 坦白講如果佢地真係肯爸爸打針而又解決到爸爸腸塞 / 腸痛o既問題, 我地都唔想霸住個床位, 我情願爸爸做完手術後可以早d番自己屋企休息咁就最理想喇.

我希望聽日廖醫生跟今次o既負責醫生 (夏醫生)開完會後會比到我地一個合理又滿意o既方案啦. 麻煩晒喇, 醫生們!

唔好再拖得唔得!!

爸爸自上星期三入院後就一直留院到而家. 呢幾日都忙於一收工就上去QMH探佢, 好彩之後於星期五幫佢轉番上私家房, 環境同設備當然就好好多啦. 而爸爸就於星期五開始就唔使禁食轉做流質食物. 不過一飲粥水落肚就有好似行雷咁大聲o既腸鳴!!! 不過醫生按完佢個肚後就話暫時都叫正常, 腸鳴都係代表條腸開始郁動, 當然太大聲o既就係代表條腸有點阻塞. 跟住到星期六就話可以比爸爸試軟身食物即係有渣o既粥. 咁媽媽就好聽話咁整左少少有米花o既粥比爸爸食啦, 另外就再加埋醫院當日提供左o既魚粥. 點知到我地星期六晚陪完爸爸番到屋企打比佢之時佢就話個肚開始有d唔係好舒服, 當然痛o既程度就唔似之前o係屋企咁o既劇痛. 但我心諗只係食左呢d咁o既易消化o既食物都會痛, 咁爸爸唔通唔食野咩, 唔食野又邊夠營養去打針呢? 但係so far醫生們都好似無任何其他更有效o既對策去處理爸爸腸塞o既問題. 我覺得一日一日咁拖落去真係唔對勁. 醫病當然梗係希望爭取一分一秒咖嘛.

到左星期日我地一大早去到QMH搵爸爸, 爸爸就話尋晚痛到半夜3點之後就停左無再痛喇. 我覺得咁樣都唔係辦法, 真係無可能食少少野會痛得咁緊要. 醫生係咪真係應該做番d野去解決呢個問題呢? 而當我地將媽媽煲好o既粥倒比爸爸食時, 佢只係食左一杯仔就覺得唔想食, 因為佢個肚開始又脹又唔舒服. 其後爸爸一直都係咁唔妥, d腸成日都勁響, 仲整到佢個人好攰無晒胃口. 如果比你見到你屋企人咁辛苦, 相信邊個都會覺得唔好受啦. 更何況而家話晒都係醫院留緊醫都好似無野做到咁, 咁留醫又有乜意思呢? 學我之前咁講, 如果留醫都只係就咁叫爸爸禁食幾日再試粥水, 無事就試下有渣食物, 咁我使乜去睇醫生呀? 乜醫生o既所謂專業就係咁? 我真係攪唔明. 爸爸o既痛症亦好似愈黎愈勁咁. 而約莫於5時多爸爸就先被安排去做一次X-ray, 可能係想睇下條腸塞到乜野情況啦. 而到我地o係canteen食完dinner番上房後, 爸爸都一樣係咁辛苦, 我就叫爸爸如果晏少少真係好唔妥的話就叫醫生打止痛針啦, 自己咁樣頂落去都唔係路咖嘛. 另外媽媽亦因為爸爸o既病情而同爸爸發生左爭執. 我真係覺得呢個時候仲黎嘈交係完全無意思o既. 不如認真d諗下有乜野可以做到去幫佢仲好啦. 於是我就決定約見醫生, 因為好多時醫生巡房時我都不在場, 所以我向nurse提出想約見醫生, 希望當面問清楚究竟我爸爸而家個情況係點, 而醫生們又會點樣去幫我爸爸. 我唔係想要求醫生一定要醫好我爸爸, 但最低限度都希望佢地講到比我聽佢地會再為爸爸做d乜野治療, 我係唔想見到爸爸就咁o係度留醫又無野做到幫佢. 如果醫生講一聲佢地公立醫院唔會幫我爸爸做手術, 我都可以盡量出去搵番林志明醫生睇下佢有乜其他意見. 唔好再o係度拖我時間, 延誤我爸爸o既治療進度. 當然我亦都希望爸爸了解我地都係想幫佢, 我明做手術係有一定風險, 而且效果係點, 無人guarantee. 但係唔通真係坐以待斃咩? 人生就係一場賭博, 即使知道成功機會係微o既, 我都希望去試一試. 唔試就一定唔得, 試左就或是有機會OK. 希望爸爸明白我地o既心意啦.

之後爸爸都痛到好累想休息喇, 所以作為最後梯隊o既我跟WT都打道回府喇. 番到去打比爸爸, 果陣係8:45 p.m. 佢話好辛苦, 所以call左nurse搵醫生諗住打止痛針. 咁我就叫佢暫時抖一抖, 睇下打完針會唔會好d. 到左9:50 p.m. 我再打比佢果陣佢話莫講話要止痛, 就連醫生都未黎睇佢, 聽到佢咁講我真係火黎啦. 大佬呀, 唔好玩啦, 人命黎咖, 我爸爸都痛到傻晒, 頂唔順先叫nurse打針, 點知nurse又話佢地唔可以話事幫病人打針, 要call醫生黎睇下先. Ok, fine 無問題, 你係nurse只係跟Dr. order 做野呢層我明白, 但點解call左醫生後等左足足個幾鐘都無人去睇下個病人呢? 而家個病人唔係玩緊野喎, 佢真係好唔舒服喎. 如果再大件事d, 會唔會失救咖? 乜而家公立醫院就係提供呢d醫療比市民o既咩? 我當然二話不說就打去私家病房o既 nurse station 問個究竟啦. 佢地就話已經盡快幫我call左醫生, 但頭先醫生o係樓下做緊搶救, 趕唔到咁快上黎睇爸爸, 我心諗成間QMH咁大, 唔係想話我知星期日晚只係得番一個當值醫生掛!!!!!! 咁樣會唔會太離譜呢? 係咪太唔 make sense!!!!! 講講下佢就話醫生o岩o岩上到黎而家會即刻去睇下我爸爸先.

之後我就大約10:45再打比爸爸, 佢就話醫生黎睇過佢, 但就唔主張佢打針, 而家幫佢抽左血, 會去配番止痛藥比爸爸頂住先. 老實講佢地o既所謂止痛真係唔會有太大作用囉, 因為爸爸唔係第一次o係QMH拎pain killer咖喇, 而且仲試過幾款咁多, 可以話係無一款 work o既. 而咁o岩爸爸o既腸痛就過左最劇烈o既時候, 所以佢都準備休息咖喇. 希望爸爸可以好好訓番一覺先喇.

而今早(4月20號)上午7:45爸爸就打左番屋企話醫生黎睇過佢, 就話要再禁食!!!! 又係呢招, 仲有無其他招數呢? 另外就話晏少少會安排佢去做一次scanning, 我估係睇下佢條腸塞到乜野程度, 我希望今次scanning之後佢地會話到比我聽可以點樣幫我爸爸囉. 真係唔好再話我聽無野做到!!! 另外nurse亦同我confirm左今晚7:00跟醫生o既會面, 到時就即管睇下佢地有乜野"有用"資料同我講啦.

一拖再拖

經過一整天o既等待與折騰, 爸爸終於由早上8:30分等到晚上7:30才被安排到床位暫時收留. 有時我真係唔明公立醫院係點樣做野o既. 好似爸爸呢個case佢o係腫瘤科已經有醫生寫晒信要入院, 但都要照舊將佢地拋去急症果邊呆等大半日. 老實講要去急症果邊等床位無問題, 我地都明白床位好緊張. 但點解等床位之前又一定要佢地見一見急症果邊o既醫生之後先再安排等床位呢? 果度都浪費左唔少時間啦. 而且爸爸仲被編為非緊急類別, 即係話要輪候o既時間更長.

好喇, 埋到櫃位登記, 果d工作人員o既態度又真係惡頂到不得了, 我真係好想知有乜方法係可以作出投訴呢? 如果大家知道有乜途徑就請告知, 我真係唔太滿意佢地咁o既工作態度. 到見急症o既醫生時又係一流, 病人同家屬有時唔會知道一直食o既藥物對病人黎緊要接受o既療程有無衝突, 咁多口交帶一聲係咪真係咁煩呢? 點解一開聲講多少少資料比醫生聽就會比醫生示意唔好咁多聲氣呢? 到時萬一真係用錯藥咪又係會怪病人無及早揚聲!!! 再加上我地真係知道果d所謂醫護人員係會將病人有藥物敏感呢樣野miss左咖, 我地唔止一次要再三番四次咁提完又提每一個負責o既工作人員. 我唔知佢地點解唔會將呢d資料好好 save o係病人o既 data file 內??

終於等到7:30先有臨時分流床位提供. 幫我地辦理上房o既阿姐就真係好服務喇, 真係成日所遇最好o既一個工作人員呀. 之後上到B5遇到o既護士同護士長都好好人, 起碼真係會好有心機咁解答我地o既疑問. 我地就一直陪住爸爸到8:30先離開. 再一次留低爸爸o係醫院o既感覺真係唔好受.

到左今早打比爸爸了解新進展, 可以講話係勁無癮囉. 首先未轉到房我地無所謂, 醫院床位緊張係可以理解o既事. 但係當我問爸爸而家情況點o既時候, 佢話尋晚開始又係吊水插胃喉咁囉. 我問係咪用個port呀今次. 點知爸爸話 "佢地話唔識用喎, 所以都係拮番手囉" 我心裡面真係狂爆粗囉. 唔係下化. 我幫爸爸整左個port就係唔想黎緊o既療程無論要抽血又好, 打化療又好, 吊水又好都唔使爸爸比護士們左拮右拮咁, 因為爸爸第一輪o既療程已經令到佢o既血管好弱, 有時好難拮到咖嘛, 亂拮的話會出血又會整痛我爸爸, 所以就接受林志明同陳子棠醫生o既提議整左個port比爸爸, 我地仲專登o係準備打針前幾日搵林醫生幫忙 Flush 一下個 port 確保個 port 係 無阻塞同埋 ready to use o既. 據林醫生所講, 爸爸個port 好"靚仔" 完全無問題咖嘛. 咁而家你地一句唔識用, 又浪費左個 port, 兼仲要整到爸爸又要拮住隻手咁唔方便. 咁點做野咖d人, 糧就識出, 野就一句唔識做就唔做, 唔識使唔使去學呀? 之前難為廖醫生仲拍晒心口咁話佢地呢度o既護士個個都受過專業訓練一定識用,等我地鬼咁高興仲即刻買定特定o既針句諗住等爸爸無咁辛苦啦. 點知原來做乜都係廢o既, 皆因遇著o既都係廢柴同盟!!!!

另外我最唔順氣o既就係今早醫生黎見過爸爸後又係無 further instruction given. 即係又係照舊吊下水, 插下喉舒緩下喎. 大佬呀, 呢d技倆真係我都識點做啦. 上年又係咁, 結果我地就揀左出去搵私家o既林志明醫生幫手, 為爸爸切除左一部份塞左o既腸. 令爸爸可以有d好日子過, at least 仲可以跟我地去沖繩玩左轉喎. 等佢地就真係乜都唔使做啦, 又係入院吊下水, 出番去一食野咪又係唔得. 我想知究竟公立醫院o既醫生係咪有心醫好病人呢? 點解每次我地都要自行再搵私家醫生幫手呢? 咁如果無能力搵私家醫生o既病人係咪要o係度等死呢? 老實講今次爸爸因為腸塞又要再令療程延至5月6日先進行, 坦白講爸爸o既情況係咪真係可以o係呢兩個星期就咁禁食吊水就會改善到呢? 唔食野又何來體力去應付化療呢? 咁QMH係咪到底唔想幫我爸爸打針呢? 我始終唔明點解要一拖再拖咁囉. 我真係好怕爸爸o既生命會o係佢地手上一點一滴咁消失呀. 我真係好想知道有乜野途徑可以比我問清楚醫生有關爸爸o既療程 / 病情, 如果我真係想提出投訴又真係有無方法呢? 我係一定要為爸爸爭取到佢應得o既服務o既!!

心痛．難過

自上一次有關爸爸病情update後, 爸爸o既身體狀況可以講係未好過. 有時收工番屋企見到比痛楚折騰得骨瘦如柴的爸爸趟在床上休息時真係好心痛. 我好希望我知道有乜野做到去令佢無咁辛苦, 可惜我真係唔知可以點做. 每晚番去我都會扮作輕鬆的問候一下爸爸. 但心底裡實在不忍見到佢咁樣受苦.

今日爸爸又到期覆診了, 上次廖醫生替佢安排o既舒緩療法好像沒太大成效, 所以最終我地都係選擇左會繼續接受新一輪o既化療. 當然我地都知道今次o既治療係有一定o既風險, 但如其坐以待斃, 倒不如博一博, 起碼我地試過就會心安理得一點. 不過正如昨天見陳醫生所講, 爸爸而家有可能再度腸塞, 咁醫生係未必認為爸爸適合o係呢個時候落藥的. 咁究竟我地要點做先得呢?

另外媽媽亦因為爸爸病情惡化而經常情緒不穩. 好多時我地都被變作出氣袋一樣. 雖然我地係一家人都無得計, 但始終我覺得咁o既環境, 咁o既心理質素只會令成件事更難處理. 當然我都好清楚明白媽媽都有一定壓力, 加上眼見身邊呢位一起生活了30多年o既伴侶比病魔折磨得咁厲害, 佢心裡係一定唔好受的了.

而家只有寄望爸爸身體夠壯受得用藥, 咁就 at least 可以睇下打針食藥後有乜反應, 總比乜都做唔到為好吧.

Just an update from them a few minutes ago. 佢地已經見過Dr. Lui喇, 但由於爸爸太痛, 所以Dr. Lui suggests 佢去照張 X-ray先. 之後會再見佢地, 到時就會睇下下一步應該點做.

再further update at 17:10:

話說lunch time時我忍唔住都係跟老闆單聲就拿拿聲打的上去QMH搵佢地, 點知去到仲見到佢地拎住剛剛照好o既X-ray片等緊, 其實果陣都已經好多人喇, 上晝等睇醫生o既人都未睇晒, 下晝又開始登記, 你諗下要等幾耐呢? 結果等到14:30都仲未見到醫生而我又要趕番落去開工. 雖然今次見唔到醫生, 但能夠爭取到少少時間見一見面支持下佢地我覺得都係值得o既.

結果最後要等到17:00先收到爸爸來電說要安排入院吊水, 不過全院滿座咁點算呢? 廖醫生就寫左信叫佢地去急症睇左先, 之後會分流佢地去內 / 外科. 暫時除左要吊水外就唔知可以做d乜喇. 就係咁爸爸終歸又係要再一次入院, 呢樣係佢最唔想o既事, 不過我地真係無晒方法. 希望今次吊下水後爸爸條腸會通番, 咁之後就可以開始打針啦.

過關斬將

好耐都無update過爸爸o既近況喇, 其實去完旅行番香港後爸爸已經進行左兩次o既scanning喇, 第一次就係番香港後第3日o既CT scanning, 另一次就係最近3月28號o既QMH做o既超聲波掃瞄. 第一次於St. T所做o既scanning, 報告顯示到腫瘤係有跡象開始活躍o既, 不過情況未致於失控. 我地都覺得好開心. 但係之後兩星期即3月中開始, 爸爸腸痛o既情況又再加劇, 好多時都食唔到野, 因為只要一有野落肚, 無論係水定係飯都痛到好緊要. 但係爸爸又極度唔想入醫院, 因為佢好唔鐘意留o係醫院o既感覺, 即使我地成家人一有時間就陪住佢, 佢都係非常唔願意留院, 一來佢覺得悶, 二來佢認為每次因為腸痛入院, 醫院都無乜野做到, 每次都係同一個pattern 就係禁飲食兩日, 吊下水, 之後開始流質食物如粥水, 如果無乜特別, 再試下軟性食物如有渣o既粥. 跟住就打發你出院咖喇. 所以佢認為不如自己o係屋企休息, 自己禁飲食都一樣可以. 咁既然佢咁堅持唔想入院, 我亦覺得無謂逆佢意, 強行將佢送院我覺得係解決唔到問題o既. 如是者, 爸爸呢兩個多星期就反反覆覆咁, 時好時壞, 當然成家人都好擔心啦, 媽媽見到咁o既情形當然就更加係處於崩潰o既狀態. 呢樣老實講我係唔鐘意o既. 我覺得作為屋企人o係呢個時候應該更加要堅強d, 唔可以咁快就失去信心, 失去希望的. 而呢段期間我地惟一可做o既野就係幫爸爸打氣啦, 見一見中醫, 同埋將新進展話比陳醫生知. 真的很感謝陳醫生的跟進同意見.

而今日又再到QMH見番廖醫生, 比起第一次見面, 今次我覺得廖醫生無咁Cool 喇, 當然公家醫生o既口吻有時還是令人覺得很難受的, 因為佢地講o既好多都係事實, 有時聽o係病人 / 家屬耳中係好難接受的. 今日覆診主要係睇番星期六o既報告, 而廖醫生亦講左佢同陳醫生已經聯絡過, 而QMH醫生都開左會, 決定係可以為爸爸打針o既, 不過唔好開心住, 因為廖醫生都解釋得好清楚, 打針唔係萬試萬靈, 而且副作用好大, 爸爸係未必會負荷得到o既. 所以佢地都仲係想做一d舒緩性o既治療先, 最基本的當然就係希望可以解決到爸爸腸痛o既問題啦. 所以佢地會再開止痛藥比爸爸試, 但我地另一個concern就係呢種止痛藥係會便秘的, 咁呢個issue廖醫生亦開左另一種藥去爸爸試下解決. 所以我地會跟廖醫生指示, 先試下呢個舒緩方法o既治療兩個星期, 如果效果理想的話, 我地可以考慮遲一下先打針. 若果無效的話, 廖醫生亦已經幫爸爸安排好4月16號可以打針咖喇, 今次呢種化療針唔需要過夜o既, 除打針外仲會跟食2個星期o既口服藥. 但效用有幾大, 正如廖醫生所講, 唔好太高期望. (註: 今次用o既藥為以下3種: Carboplatin, Xeloda & Avastin)

暫時我地就惟有見步行步, 希望新o既舒緩治療真係可以幫到爸爸, 老實講我都怕比佢再打針, 因為我都好驚佢而家身體咁弱, 一針打落去真係未必頂得順, 有可能仲會有反效果添. 所以如果舒緩到爸爸腸痛 + 便秘o既問題, 咁爸爸就可以keep到 life quality喇.

爸爸, 你要努力加油呀, 要知我地黎緊仲有重要任務assign左比你咖.

禍從口入

正當我星期五(年廿八)下晝4點幾輕輕鬆鬆地等待收工後一連五天長假的來臨之際, 接獲媽媽來電, 起初以為佢想話我知佢同爸爸睇完中醫後準備去睇林醫生覆診. 點知 ... 媽媽o係電話中好緊張的跟我說爸爸在睇完中醫後往林醫生診所途中覺得頭暈, 想嘔. 而家正在路邊休息, 有好心途人加熱心警察正幫爸爸搵的士, 我地就決定還是先送爸爸到診所, 稍事休息看看情況怎樣. 而我當然就等唔切收工就提早走人去診所跟佢地會合. 去到診所見到爸爸躺在床上休息中, 原來又係腸痛作怪. 之後一直等到6時多林醫生才有時間見爸爸. 誰知林醫生一看就覺情況不妙, 說要爸爸馬上入院留醫觀察. 我地聽到呢個消息個心當堂往下一沉. 有邊個想新年前夕入院? 而且仲唔知乜野事, 又唔知要留幾耐? 個心即刻就亂晒. 林醫生初步睇黎就話爸爸腸又塞住左, d腸都腫起晒喇. 所以要入院禁食, 吊水. 而在林醫生幫忙下終於安排到即時入院, 否則就要等到明早先可能有床位了. 不過暫時爸爸要入住二等房, 因為所有其他床位都爆滿了. 於是我地三個又急急腳等的士番去St. T 登記. 而細妹聽到消息後亦即時取消飯局於放工後趕到醫院跟我們會合. WT當然都好擔心啦. 大家於是就o係年廿八齊集o係St. T 了.

由於林醫生之後會放假外遊, 所以佢安排了上次幫爸爸整port的司徒醫生接手跟進. 照完X-Ray發覺腸真的塞著了. 所以呢兩天都要禁食, 睇下條腸會唔會自行鬆番. 就係咁爸爸就要繼續留院觀察, 大家都好擔心係咪癌魔又再次向爸爸伸手了呢? 之後年廿九那天, 爸爸情況係改善左, 不過都係要禁食. 醫生話一定要睇定d先比佢出院的. 而到左年三十晚那天早上爸爸已經吵著要出院了. 當我10點多到醫院時爸爸就叫我快d問護士究竟醫生幾時先到, 佢唔想過年都要留o係醫院. 我心諗而家醫生就算黎到都無話一定比你出院啦, 不過我都有幫佢問o既, 結果護士話醫生好快就到咖喇. 叫我地多等一會. 最後司徒醫生就於11:30黎到睇爸爸. 結果一如所料, 醫生並唔贊成爸爸出院, 因為雖然X-ray睇黎就已經無咁塞, 但係爸爸條腸仲係郁得好慢, 醫生認為應該今日唔再吊水開始食流質食物後睇睇反應係點. 但爸爸又點會就範呢? 而司徒醫生亦很明事理, 知道老人家唔想o係醫院過年, 所以最終都同意比佢出院番屋企休息, 但就再三叮囑我地飲食要非常小心, 糕點係絕對掂不得. 先行試飲粥水, 睇下反應點, 如果無問題, 可以加多少少渣. 但一定要少食多餐咁樣先得, 唔可以食一d 難消化o既食物. 爸爸聽到有得出院後心情大佳, 當然乜都應承啦. 而我亦很感謝司徒醫生o既詳細解說.

就係咁爸爸終於如願可以o係過年前出院了. 希望佢經過今次o既教訓後真係唔好再咁為食喇. 我地黎緊仲有任務要執行咖, 一定要小心飲食, 好好保重呀.