2010.03 東京花見 (Day 8: 千鳥ヶ淵 / 新宿) [下篇]

3月31日 (星期三) 千鳥ヶ淵 / 新宿

(重點: 初嚐殿堂級拉麵店: 斑鳩) [下篇]

分開活動後, 老公跟我很落力的在千鳥ヶ淵附近遊走. 終於都比我地搵到唔少映相位. 其實千鳥ヶ淵呢邊o既櫻花都開得好密的了. 老公就陪住我不停的走來走去攞位映相. 好彩映出黎o既相都真係唔錯!!

呢株櫻花樹又係好靚的, 除了滿開外, 佢又係一種一株樹有兩種唔同色的櫻花, 分別係白 & 粉紅, 所以好多遊人都爭住映咖. 我地當然就係其中一份子啦.

而當我地行完一邊再折返經過千鳥ヶ淵時就真的迫滿遊人了, 我地仲見到比遊人租用的划船已全數租出, 想划船的話就要排隊等了. 慶幸之前我地o係吉祥寺的井之頭公園已經一嘗鴨仔船賞櫻滋味, 今日就唔使再浪費時間等船了. 另外我諗遊人咁密集o係呢個時候出現係因為要等睇夜櫻吧. 不過我跟老公都沒有特別興趣. 所以我倆就繼續行程.

不經不覺得地兩個就行到另一賞櫻熱點 -- 靖國神社附近了, 不過我地無特別走去賞櫻, 反而係走到神社前的桜祭り小食檔睇睇有乜正野. 結果我跟老公分別o係呢度食多次我鐘意的燒魚, 另外仲食左燒雞翼. 當坐低食野時頭上滿開的櫻花樹久不久會因為一陣強風而有櫻吹雪的效果, 好靚呀.

本來都覺得飽飽地的, 但兜個圈出黎見到団子又好想試, 所以就買左兩款試下, 食後評係相當得呀, 好想再食呀.

食到夠之後就開始番新宿了. 期間跟妹妹聯絡過知道佢地番到新宿後去左高島屋地庫食品館試左以下呢款草莓Juice!

細妹話真係好足料了, 飲完上癮了! 加上佢係由當日下午2點起的頭25名客人Order 呢款草莓汁, 所以店員仲送上3粒甜到漏的新鮮草莓, 真係抵到爛啦.

返到新宿我仲有好多野行咖, 最終我地今晚o既晚餐就約左o係高島屋的築地玉壽司食放題喇. 我地大約6:15去到都要等到差唔多8:00先有得食呀. 好彩今晚早去等位, 否則又要跟放題緣慳一面了. 同埋而家等位可以先按張籌, 咁拎左籌之後就可以繼續四圍行下唔怕浪費時間嘛!

Yeah, 美味o既壽司我地又見面了.

每次黎到都會勁食的海膽壽司, 真係次次都咁有水準的. 當然蟹膏都係必食之選, 不過自從試過了蟹道樂之後...這裡的蟹膏就好像有點給比下去了.

仲有呢款鰻魚牛油果卷真係無得頂的.

食完就番酒店休息了, 明天會大約10:00就出門喇, 因為要去Disney呀. 揀4月1日係因為有新巡遊 & 新的Easter Deco. 誰不知真係人算不如天算, 想知有幾"愚人", 下一篇再慢慢講! 總之就係而家諗起都有d嬲嬲地呀.

2010.03 東京花見 (Day 8: 千鳥ヶ淵 / 新宿) [上篇]

3月31日 (星期三) 千鳥ヶ淵 / 新宿

(重點: 初嚐殿堂級拉麵店: 斑鳩) [上篇]

黎到呢日基本上想帶屋企人去賞櫻的行程都大致完結的了, 之後就會變回行街shopping之旅了. 反正去左咁多唔同o既賞櫻熱點欣賞過櫻花後, 我相信屋企人都應該感到滿意吧. 昨天晚上我已提醒過屋企人今早的早餐唔好食太飽, 因為出發去千鳥ヶ淵 賞櫻前我會先帶他們到一間位於九段下的殿堂級拉麵店- 『斑鳩』食左lunch先賞櫻的, 因為一來咁樣比較順路, 二來我怕太晏去拉麵店的話會太多人, 咁又要排隊啦, 想食o既限定特製拉麵 (好像是每日限賣25碗) 亦分分鐘完賣咖嘛.

我地大約11:15去到斑鳩就已經見到一條5, 6人的人龍在店外了, 心想不是嘛...開門不久就有人龍出現? 唔理咁多喇, 排住隊先. 之後就見到前面的食客係一個跟一個的先到店內的售票機買定食券的. 買完後又再到店外繼續排隊等候安排入座. 到我地入內買票時, 服務員還會介紹今天各款的限定拉麵. 我地就分別order左特製ラーメン 同埋 特製塩本鰹らー麺.

跟住大約等了差唔多20分鐘先輪到我地入座. 斑鳩店子不算大, 連counter位大約有18個座位吧. 桌子上有別緻的調味擺設!

據之前所睇的資料, 這間店的店長坂井さん之前好像在TV Champion節目中優勝過的. 而在日本的拉麵 database內亦有好高的得票率. 不久一碗熱騰騰的麵就送到了, 先飲啖湯看看是否真的咁吸引. 果然真係跟之前食過的拉麵湯不太一樣的, 雖然我唔係太識點樣為之一碗好的拉麵, 但肯定這碗一定唔差. 湯頭雖濃但完全唔會油膩, 食罷再看看資料原來這家店子的特製拉麵個湯頭係『W Soup』即同時混入豚骨及和風魚系兩種湯頭! 難怪一試就覺得味道真的很不同.

最要命的是價錢啊, 一碗咁有質素咁用心做的特製拉麵只售880円, 你說抵不抵. 下次有機會再來的話, 一定要試埋店內的人氣甜品 - 杏仁布丁.

又係另一餐大滿足的離開. 之後我們便沿路向千鳥ヶ淵 進發了. 目的地不太難找, 基本上順著人潮就可以找到的了. 首先我們到了北の丸公園, 門外已有不少遊人舉機狂映, 我地都唔例外, 不過由於人太多, 還是進園之後才慢慢映吧.

入內後見到有一條長長的人龍, 蛇餅真的很誇張, 看清楚原來今晚會有人氣聲優 + 歌手 -- 坂本真綾在武道館演出啊, 相信人龍就係為左要買坂本真綾的Tour goods吧.

反正唔關我地事就繼續向前行吧. 可能之前新宿御園的櫻花 & 景色實在打了滿分, 媽媽跟妹妹說覺得這裡沒什特色, 所以見到她倆好像不太在意的隨處亂逛. 反而我跟老公仍是很落力的四處走動看看有沒有好的位置拍照.

一邊行一邊睇下邊度有靚位映相, 不過其實除左櫻花外, 仲有好多不知名的花卉都好吸引咖, 好似行行下就見到呢下呢株唔知乜野o既植物, 開滿了橙色的花球, 好得意咖.

另外地上仲有一d好細朵的花仔都唔好錯過呀.

呢片唔知乜葉, 見到葉紋好得意一於映低佢.

在映完橙色花球後, 我地就分成兩批人各自活動了, 我已跟她們說好, 如果在這裡沒什麼睇頭就可以番去新宿繼續佢地的手藝之旅. 晚一點再聯絡集合食dinner. 而我跟老公就再努力地向四周賞櫻去.

今日天氣雖然麻麻, 但好彩都無落出雨, 我地映完一邊的櫻花後又再向另一邊岸進發, 下一篇再分享餘下的靚相.

2010.03 東京花見 (Day 7: 新宿御園) [下篇]

3月30日 (星期二)  新宿御園 (重點: 揀o岩日子 & 天氣)  [下篇]

狂映完畢後大家就原路番酒店一帶shopping & lunch, 途中經過Lawson, 點知就係咁....出血了.  皆因一入到去就見到大大個鬆弛熊counter!!!  

唔使問見到咁多鬆弛熊當然就失控啦,  二話不說的就起勢拎想要的items, 點知望多兩望....咦...點解有d商品個tag係寫住 "F賞" 有d就係 "D賞" 呢????  望真d .... 原來有部份杯啦, 毛公仔啦, Travel tags 係抽賞品來的.

500円一次拎張交換券, 去cashier度比$$先. 

由店員比個盒仔你去抽張咭, 撕開虛線位就會知道你中左邊一個賞喇. 

我地見咁好玩於是就輪住黎玩, 結果細妹同媽媽都幫我抽到我想要o既 items , 反而我自己抽果次就真係有點失望.  不過好彩總的來說每件賞品都算幾精美的.  

而除左呢個 Lawson x Relax Kuma的抽獎 game外, 呢間 Lawson仲有唔少鬆弛熊o既products賣的,  當中有食的, 有用的.    我當然唔執輸入左一d啦.  可惜呢個熊仔Gum只係得番啡熊, 白熊無晒 lu ~   另外呢個啫喱都幾抵呀.  有埋隻咁精美o既瓷器杯添!   大伙兒就係咁o係 Lawson 攪左一輪先捨得走. 

之後媽媽話要行Tokyu Hands, 咁我地3個就先行去左新宿分店剛開不久的一蘭食番碗拉麵先啦.   真係好正呀. 

食飽飽後又係時候行下街, 不過o係高島屋見到間幾好o既 cafe 於是又call 埋媽咪一齊食番個tea先.  無錯呀, 呢頭食完碗拉麵, 果頭又話食 Tea, 今次之旅仲唔係變豬大行動?    今次細妹試左2款蛋糕, 賣相都唔錯的. 

而其餘3位團友就點左pancake雪糕, 好味呀!  

食埋個tea又係時候做下運動行下商場幫助消化o既時間喇.    晚餐唔使問當然又係外賣回酒店慢慢嘆啦.    飯後甜品蛋糕亦都不可少. 

今日除左抽熊仔外都有唔少斬獲的, 仲有係買到每次去日本都幾乎一定會買的Birkenstock大頭鞋, 今次呢對好春天咖, 碎花款, 一試就即買了.

聽日行程係賞櫻 @ 千鳥ヶ淵 .   雖然都知天氣普通, 但都無所謂啦, 反正唔想再押後花見了, 因為怕黎緊會有太多香港人殺到, 到時要映相就可能太多人了.   還是早一點趁遊人少一點的時候盡情去映吧.